FIRIBGAR JAZOSINI OLDI

Amudaryo tumanidagi fermer xoʻjaliklaridan birini yuritayotgan K.G.(ismlar oʻzgartirilgan) anchadan beri yangi traktor sotib olishni moʻljallab yurgan edi. Ammo yetarli mablagʻ boʻlmagani uchun bu ishni keyinroqqa surib yurgan kunlaridan birida sotiladigan traktorning daragi chiqib qoldi. Darhol yoniga oʻgʻlini va tanishini olib traktorni koʻrishga bordi.

Oʻzini ushbu texnikaning egasi deb tanishtirgan S.B. narxni 150 mln.ga baholaydi. Bu narxga rozi boʻlgan K.G. 5 ming AQSh dollarini berib, qolganini boʻlib toʻlashga kelishadi va traktorni uyiga olib ketadi. Shu tariqa S.B.ga boʻlib-boʻlib 150 mln. soʻm pulni bir necha oy mobaynida toʻlab beradi.

Aslida traktor S.B.ning ukasiga qarashli fermer xoʻjaligiga lizing hisobiga olingan boʻlib, berilgan pullar lizing hisobiga toʻlanishi va lizing hisobidan chiqarilib, keyin sotib olgan shaxs nomiga rasmiylashtirilishi kerak edi. Ammo u K.G.dan pullarini boʻlib-boʻlib olib, bergan vaʼdasini amalda bajarmasdan va traktorning lizing oldi-sotdi sharnomasini bajarmasdan, olgan pullarning hammasini oʻzining ehtiyojlari uchun ishlatib yuborgan. Buning natijasida, tegishli sudning ajrimi boʻyicha traktor sotgan tashkilotga qaytarib olinib, fuqaro K.G.ga juda koʻp miqdorda moddiy zarar yetkazilgan.

Moddiy zarar koʻrgan K.G. tumandagi huquqni muhofaza qilish organlaridan yordam soʻrab murojaat qilishga majbur boʻladi. Ish oʻrganib chiqilganidan soʻng, S.B. oʻzining ushbu jinoiy harakatlari bilan Oʻzbekiston Respublikasi Jinoyat Kodeksining tegishli moddasida koʻrsatilgan jinoyatni qasddan sodir qilganlikda ayblandi va qonunga muvofiq jazosini oldi.

S.Davletmuradov, Qoraqalpogʻiston Respublikasi Jinoyat ishlari boʻyicha sudi sudyasi.