Diydor quvonchi

52-sonli umumiy oʻrta taʼlim maktabining 11-sinfini 1994-yilda bitirgan sobiq oʻquvchilari 2014-yil 13-avgust kuni jonajon maktabi bagʻrida toʻplanishib, oʻzlariga 11-yil davomida taʼlim-tarbiya bergan ustozlari bilan uchrashdilar. Sobiq oʻquvchilar oradan yigirma yil oʻtib maktabga, jonajon sinfxonalariga oʻzgacha bir kayfiyatda, ichki hayajon bilan birin-ketin kirib kelishdi. Sinflari ozoda, partalari yangi, bugungi kun talabi darajasidagi kompyuterlar va texnik vositalarga ega sinf hayoti va bugungi taʼlim jarayonini aks ettirgan devoriy gazetalar, stendlar, bannerlarga boy sharoitni koʻrib sobiq oʻquvchilarning havaslari kelib ketdi.

Uchrashuv maktab binosida ertalabki soat 9 da boshlandi. Tadbirda sobiq bitiruvchilar bilan birgalikda mehnatfaxriylari, maktab pedagogika jamoasi, mahalla faollari ishtirok qildilar. Tadbirni sobiq oʻquvchi, hozirda shu maktabning direktori lavozimida ishlayotgan Qodirbergan Yeshchanov ochiq deb eʼlon qildi. Sobiq oʻquvchilarni oʻzlarining sinf rahbarlari, mehnat faxriysi, tarix fani oʻqituvchisi Xolboy aka Ahmedov va hozirgi kunda mazkur maktab direktorining oʻquv-tarbiya ishlari boʻyicha oʻrinbosari vazifasida ishlayotgan Bahrom Rajabov, birinchi oʻqituvchisi marhum (oxiratlari obod boʻlsin) Ibrohim aka Matyusupovning rafiqasi Soporgul opa va Gulnora opa Artiqovaning qizi Rayhonlar diydor onlari bilan qutladilar. Uchrashuvga hayotdan bevaqt koʻz yumib ketgan sobiq sinfdoshlari Muxtorjon va Husanjonlar (oxiratlari obod boʻlsin)ning ota-onalaridan Tursunboy aka Abdullayev, Gulora opalar ham tashrif buyurdilar.

Sobiq sinfdoshlarning yigirma yillik ayriliqdan soʻnggi diydorlashuvi, vaqtning tezkor va uchqurligi, har kim har tarafga hayot taqozosi bilan tarqalib ketishlariga qaramay, hammalari bir-birlari bilan doʻstlik, oʻrtoqlik rishtalarini uzmasdan saqlashning oʻzi ular uchun bir baxt ekanligi koʻrinib turar edi.

Maktab hayoti bilan tanishuvdan va doʻstona diydorlashuvdan soʻng, tuman markazidagi "Osiyo” toʻyxonasida sobiq oʻquvchilar-u ustozlar yoqimli kuy-qoʻshiqlar ogʻushida ancha payt suhbatlashib oʻtirdilar, maktab va yoshlik damlarini eslashib, esda qolgan voqealarni yana bir bor yodga oldilar. Bugungi dorilomon zamon va insonga yaratilgan shart-sharoitlar, imkoniyatlar toʻgʻrisida shirin suhbatlar qurildi. Tursunboy aka va Xolboy akalar oʻzlari ijod qilgan sheʼrlarini kecha qatnashchilariga oʻqib berdilar.

Gulmirza BOBOJONOV,

52-sonli maktab direktorining maʼnaviy va maʼrifiy ishlar boʻyicha oʻrinbosari.