AYoLLARI QADR TOPGAN JAMIYaT MUSTAHKAM BOʻLADI

Yurtimizda xotin-qizlarni qadrlashga alohida eʼtibor qaratilmoqda. Boisi, rivojlangan jamiyatlarda madaniyatlilik darajasi xotin-qizlarga boʻlgan munosabat va ular uchun yaratilgan imkoniyatlarga qarab belgilanadi. Shu bilan birga ayollari qadr topgan, eʼzozlangan jamiyat doim mustahkam boʻladi.

Tuman Ichki ishlar boʻlimining xotin-qizlar masalalari boʻyicha katta inspektori Gavhar Oʻtemuradova ham Ichki ishlar boʻlimida profilaktik hisobda turgan xotin-qizlarni ijtimoiy hayotga moslashtirish, ularning muammolarini oʻrganish, aniqlangan muammolarini ijobiy hal etish orqali, sogʻlom turmush tarziga qaytarish choralarini koʻrib kelmoqda. 

Inspektor oʻz faoliyati davomida tumanda ajrashish yoqasiga kelib qolgan 122 ta oilalarning barchasi bilan manzilli profilaktik ishlarni amalga oshirdi. Olib borilgan ishlar natijasida 44 ta oilani yarashtirishga erishildi.

Yurtimizda xotin-qizlarga nisbatan zoʻravonlik ishlatilishining oldini olish maqsadida himoya orderi instituti joriy etilib, ichki ishlar tizimida tazyiq va zoʻravonlikka duch kelgan xotin-qizlarning huquq va erkinliklarini taʼminlash maqsadida himoya orderlari berila boshlandi. Shunga koʻra, oʻtgan yil davomida 164 ta, joriy yilning 2 oyida 29 ta  xotin-qizlarga himoya orderlari berildi.

Joriy yil fevral oyida G.Oʻtemuradova kam taʼminlangan va ijtimoiy himoyaga muhtoj, yashashga joyi boʻlmagan 70 yoshli ayol N.Otajonovaning vaqtincha uy-joy bilan taʼminlanishiga   koʻmaklashdi.

Inspektor probatsiya guruhida hisobda turgan 9 nafar, spirtli ichimlikka ruju qoʻygan 3 nafar, tajovuzkor, ruhiy kasal sifatida ruyxatda turgan 3 nafar ayollar, farzand tarbiyasiga salbiy taʼsir koʻrsatuvchi ota-ona, ajrashish yoqasiga kelib qolgan 46 ta, notinch boʻlgan  1 ta oila, sudlangan 9 nafar, kam taʼminlangan 301 nafar, bandligi taʼminlanmagan 697 nafar xotin-qizlar bilan doimiy davra suhbatlari, psixologik treninglar, tadbirlar tashkillashtirib kelmoqda.

Ayniqsa, Probatsiya guruhi nazoratida axloq tuzatish jazosini oʻtayotgan  A.Shermanova, A.Kamolovalar oʻzlarining bandligi taʼminlanishiga amaliy yordam berilganidan juda mamnun.

G.Oʻtemuradova ayol-qizlar bandligi taʼminlanishiga yaqindan yordamlashib, har bir mahalladan pishiriqlar tayyorlash, tikuv tsexlari, sartaroshxonalar, issiqxonalar tashkil etish, parrandachilik, chorvachilik, quyonchilik bilan shugʻullanish tashabbusi bilan chiqqan ayollarga bankdan kreditlar ajratilishiga ham koʻmaklashib kelmoqda.                                                                                                                                         Oʻz ishini fidoyilik bilan bajarib kelayotgan G.Utemuradova har bir ayol-qizni opasi, singlisidek koʻrib, imkoniyat darajasida koʻmak berishga harakat qiladi. Buni mahalla va ovullarga ayollar bilan uchrashishga borgan kezlarida ularning inspektor qarshisiga oʻz yaqinini koʻrgandek peshvoz chiqishlaridan ham ilgʻash mumkin.

Tuman ayol-qizlari huquq va erkinliklari, qonuniy manfaatlarini himoya qilish bilan birga ularning hayoti ham yaxshilanishiga maʼnan koʻmak berib kelayotgan G.Oʻtemuradova namunali oilaning bekasi. U umr yoʻldoshi S.Seyitov bilan birga ichki ishlar sohasida 20-yildan ziyod vaqtdan beri xizmat qilib kelmoqda. Farzandlar ham ota-ona izidan borib, shu kasbni tanlashgan. Oʻgʻli Yergʻali, hatto oilaga kelin boʻlib tushgan Ravshanoy ham ichki ishlar xodimi boʻlib xizmat qilishadi. Katta qizi Milliy gvardiya tizimida xizmat qilayotgan boʻlsa, kichik qiz hali talaba, Qoraqalpoq davlat universitetida tahsil olmoqda.

Oʻz sohasi jonkuyari boʻlish bilan birga oilasida ham sogʻlom muhit yaratishga erishgan G.Oʻtemuradovaning ishlariga muvaffaqiyat tilab, 8-mart – ayol-qizlar bayrami bilan samimiy tabriklaymiz.

O.Xudoyberganova.