“Matniyoz Oxun” qabristoni obodonlashtirildi

Oʻtgan davr mobaynida Prezidentimiz va hukumatimiz tomonidan diniy bagʻrikenglikni taʼminlash, diniy urf-odatlarni hurmat qilish, ayniqsa muqaddas qadamjolar, ziyoratgohlar, masjidlar va qabristonlarni yanada obod qilish borasida ulkan ishlar amalga oshirilmoqda. Shuningdek, ushbu sohadagi ishlarni rivojlantirish va faoliyatni tartibga soluvchi bir qator qonun hujjatlari qabul qilingan boʻlib, ular doirasida koʻplab tizimli ishlar amalga oshirilmoqda.

Amudaryo tumanida ham muborak Ramazon oyi hamda “Navroʻz” umummilliy bayrami oldidan ajdodlarimiz qoʻnim topgan muqaddas qadamjolar va qabristonlar obodonlashtirilmoqda.

Jumladan, Amir Temur ovulida joylashgan “Matniyoz oxun” qabristoni ham hashar yoʻli bilan obodonlashtirildi. Obodonlashtirish ishlari bir necha kun davomida uyushqoqlik bilan oʻtkazilib ushbu savobli ishga tuman obodonlashtirish boshqarmasi ishchilari, mahalla imomlari hamda ovul hududida istiqomat qiluvchi yosh-u qari  oʻz hissalarini qoʻshishdi.

Aslida obodlikka intilish, poklik ayniqsa, qabristonlarni ozoda saqlashga doimo eʼtibor qaratish xalqimizning ming yillik qadriyatlaridan biridir.

Maʼlumot uchun, qabristonning umumiy yer maydoni 10,7 gektarni tashkil qiladi. Hashar davomida, hasharchilar tomonidan 150 metrlik paxsa devorlar koʻtarilib, yoʻlaklarga tosh yotqizildi. Ziyoratchilar uchun tahoratxonalar taʼmirlanib, pardozlash ishlari olib borildi.

 Shuningdek, daraxt va butalar oqlanib, shakl berildi hamda, ortiqcha shox-shabbalar, qurib qolgan oʻt-oʻlanlar qabriston tashqarisiga chiqarib tashlandi. Har bir qabr atrofi tozalanib, ayrimlari taʼmirlandi.

Shu oʻrinda aytish joizki, mazkur qabristonga Amir Temur ovulining ziyoli, obroʻli insonlari va ularning ajdodlari dafn etilgan. Oʻz davrida ovuldagi maʼnaviyat va maʼrifatga intiluvchan insonlarga toʻgʻri yoʻlni koʻrsatgan ziyolilar sulolasi vakili Matniyoz oxun boboning muborak qabrlari ham shu yerda joylashgan.

Hashar davomida Yusuf Eshon bobo jomeʼ masjidi imom-xatibi Abdurahmon Matsafoyev xalqimiz azal-azaldan bunday xayrli ishlarni koʻpchilik boʻlib, bamaslahat bajarib kelganligini, oʻtganlarni yodga olib, ularning ruhlarini shod etish – savobi ulugʻ amallardan ekanligini, marhumlarning hoki poklari qoʻnim topgan maskanlarni obod qilish va ularning haqlariga duolar qilish insoniy burch ekanligini taʼkidladi.

Bundan tashqari, islom dini taʼlimotlariga koʻra, atrof-muhitni koʻklamzorlashtirish, uning tozaligiga, savobli va ezgu ishlarni ado etmoqlikka, ziyoratgoh-u qabristonlarni obod qilishdek xayrli ishlarga kamarbasta boʻlish farz ekanligi, bu kabi hayrli ishlar koʻpchilikka manfaatli boʻlgani bois, savobi ham mislsizligi haqida ibratli soʻzlarini soʻzladi.

Dunyodan oʻtgan ota-bobolari, yaqinlari xotirasiga hurmat koʻrsatish har bir insonning  zimmasidagi farzandlik, qarindoshlik, qolaversa, insoniylik burchidir. Buni yaxshi angalagan fuqarolar hashar ishlarida uyushqoqlik bilan qatnashib, ziyoratgohlar obodligiga oʻz hissalarini qoʻshdilar.

Tuman hokimligining Axborot xizmati