"Oq oltin"da Navroʻz bayrami keng nishonlandi

Ayni kunlarda oʻlkamizning har goʻshasida koʻklam shukuhi kezmoqda. Xalqimiz qadimiy va navqiron Navroʻz ayyomini nishonlamoqda. Navroʻz – yangi kun ekanligini, musulmon xalqlari uchun yangi kun – yangi yil boshlanishini hisobga oladigan boʻlsak, bu sana bizning eng sogʻinib kutadigan ayyomimiz ekanligi yana bir bor isbotini topadi. Bahorning goʻzal va sevimli Navroʻz bayrami xalqimizning har bir goʻshasida, har bir xonadonida oʻzgacha tarovat baxsh etmoqda.

Hamma joyda Navroʻzga bagʻishlangan tadbirlar, bayram sayillari davom etmoqda. Tumanimizdagi Oq oltin ovulining “Jiydali qulon” mahallasi fuqarolari oʻzlarining mehnatsevarligi, ahililigi, bir-birlariga mehribonligi bilan alohida ajralib turadi. Bu mahallada har bir bayram, toʻy, madaniy-tadbirlar tartibli, ixcham, shodiyona ruhda oʻtkazilishi bilan tahsinlarga loyiq boʻlib kelmoqda.

Bu elatda kattalar izzatda, yoshlar xizmatda boʻlib, bayram tadbirlari uyushqoqlik bilan tashkil etiladi. Bu yilgi Navroʻz bayrami munosabati bilan hududdagi 71-sonli maktab binosi oldida oʻtkazilgan bayram tadbiri ham soʻzimizning yaqqol isbotidir.

Bu yilgi bayramga ham puxta tayyorgarliklar koʻrildi. Koʻcha va xiyobonlar tozalandi, ariq, zovurlar qazilib, yoʻllar tekislandi, mevali va manzarali daraxtlarga bayramona shakl berildi. Har bir xonadon obod va ozoda boʻlish borasida bir-birlariga namuna boʻlishdi.

Bayram oldidan xalqimizning milliy va sevimli taomi sumalak tayyorlandi. Bayram dasturxonini elatning qoʻli gul qiz-kelinchaklari tomonidan tayyorlangan milliy taomlar bezadi.

Bayram tadbirida mahallaning mehnat faxriylari, keksa otaxon-u onaxonlari, turli kasb egalari, taklif qilingan mehmonlar jamul-jam boʻldilar.

Tadbirni mahalla faoli Yangiboy Shukurullayev kirish soʻzi bilan ochib, barchani qutlugʻ ayyom bilan muborakbod qildi, ishlarida omad, mustahkam sihat-salomatlik tiladi.

71-sonli maktab direktori Ruslan Kamolovning tabrik soʻzidan keyin maktabning oʻqituvchi va oʻquvchilar jamoasi hamda mahalla fidoyi yoshlarining ishtirokidagi kontsert dasturi, qiziqarli oʻyin tomoshalari boshlanib ketdi.

71-sonli maktabning ijodiy-madaniy masalalar boʻyicha targʻibotchisi Rabigʻa Toʻrayeva, ona tili va adabiyot fani oʻqituvchisi Muhabbat Madatovalar tomonidan tayyorlangan bayram dasturi, unda ijro etilgan kuy-qoʻshiqlar barcha bayram ishtirokchilariga birdek manzur boʻldi.

Bayram dasturini 11-sinf oʻquvchilaridan Umida Matniyozova, Diyorbek Oymuradovlarning  mohirona boshqarib borishlari bayramga yanada fayz qoʻshdi. Bayram tantanasida Oq oltin fuqarolar yigʻini raisi Raxim Oʻrozboyev ham ishtirok  etdi va mahalla ahlini qutlugʻ ayyom bilan qizgʻin muborakbod etdi.

Bayram tadbirida “qoʻli shirin kelinchak” mavzusida bellashuv oʻtkazildi. Unda mahallaning yosh kelinlari tomonidan tayyorlangan milliy taomlar koʻrgazmasi namoyish qilindi. Bellashuv gʻoliblari va qatnashchilari tashkilotchilar tomonidan munosib taqdirlandi.

Mahalla yoshlari nafaqat bilim olishda, balki harbiy mashqlarda, sport oʻyinlarida ham ancha uddaburon ekanligini ishtirokchilar oldida namoyish qildilar. 9-sinf oʻquvchilari tomonidan bajarilgan murakkab harbiy mashq oʻyinlari barchani lol qoldirdi. Bu harakatlar esa oʻz oʻrnida mahallada Vatanimizga sodiq harbiy posbonlar yetishib kelayotganidan darak berib turibdi. Oʻquvchilarning oʻktam va chaqqon harakatlari tomoshabinlarning zoʻr olqishlariga sazovor boʻldi.

Bayram tadbiri mahalladoshlar koʻngliga olam-olam quvonch baxsh etdi. Tinch yurtga bayramlar yarashadi degan soʻzlar yana bir bor oʻz isbotini topdi.

Mahalla ahli bir-birlariga eng aʼlo kunlarni, yaxshi kayfiyatni tilagan holda bu bayramni ulkan koʻtarinki ruhda nishonladilar.

Oʻrozali REYIMOV.