1-sonli maktabda huquqshunoslar ishtirokida “Konstitutsiya – farovon hayotimiz qomusi” mavzusida targʻibot tadbiri oʻtkazildi

Oʻzbekiston Respublikasi Prezidentining 2018-yil 13-apreldagi “Davlat huquqiy siyosatini amalga oshirishda adliya organlari va muassasalari faoliyatini tubdan takomillashtirish chora-tadbirlari toʻgʻrisida”gi Farmoni bilan tuman adliya boʻlimlarining asosiy vazifalaridan biri qabul qilinayotgan qonunlar va boshqa normativ-huquqiy hujjatlarning mazmun-mohiyati va ahamiyatini tumanlar tuzilmalaridagi ijrochilarga yetkazish qilib belgilandi. Qolaversa, “respublika - viloyat - tuman - mahalla» tamoyili boʻyicha huquqiy targʻibot olib borish va aholining huquqiy savodxonligini oshirish, fuqarolarning Konstitutsiyaviy huquqlarini tushuntirish borasida chora-tadbirlarni amalga oshirish boʻyicha ham vazifalar belgilab berildi.

Ushbu Farmon ijrosini taʼminlash maqsadida Amudaryo tuman Adliya boʻlimi tomonidan aholining huquqiy ongi va huquqiy madaniyatini yuksaltirish, yangidan qabul qilinayotgan normativ-huquqiy hujjatlarni keng aholi qatlamiga yetkazish, ularning Konstitutsiyaviy bilimlarini oshirish boʻyicha rejaviy targʻibot tadbirlari amalga oshirilib kelinmoqda.

Yaqinda Amudaryo tumani Adliya boʻlimi bosh maslahatchisi Jamshid Bekimbetov, yetakchi maslahatchisi Baxrom Sobirovlar 1-sonli umumtaʼlim maktabida oʻquvchi-yoshlar bilan uchrashib, huquqbuzarliklar profilaktikasi va korruptsiyaga qarshi kurashish sohasida qilinayotgan ishlar, yoshlarning huquqiy ongini oshirish, yangidan qabul qilinayotgan qonunlar yuzasidan huquqiy suhbat oʻtkazdilar.

Tadbir davomida Qoraqalpogʻiston Respublikasi Konstitutsiyasi, Oʻzbekiston Respublikasining “Korruptsiyaga qarshi kurashish toʻgʻrisida”gi, “Huquqbuzarliklar profilaktikasi toʻgʻrisida”gi, “Odam savdosiga qarshi kurashish toʻgʻrisida”gi qonunlari, Oʻzbekiston Respublikasi Jinoyat Kodeksi hamda Maʼmuriy javobgarlik toʻgʻrisidagi Kodeksi yuzasidan tushuntirishlar berildi.

Shuningdek, Amudaryo tumani Adliya boʻlimi bosh maslahatchisi Jamshid Bekimbetov, oʻquvchi-yoshlarga Qoraqalpogʻiston Respublikasi Konstitutsiyasining xalqimiz hayotida tutgan beqiyos katta oʻrni, ayniqsa, yoshlarning bilim olishlari, oʻz sogʻliklarini mustahkamlashda malakali tibbiy xizmatdan foydalanish boʻyicha Konstitutsiyaviy huquq va erkinliklari, shuningdek, farzandning ota-ona oldidagi, ota-onaning oʻz farzandlari oldidagi burch va majburiyatlari, gender tenglik, tabiat boyliklariga boʻlgan munosabatlari, bu boyliklardan oqilona foydalanish boʻyicha belgilangan kafolatlar xususida batafsil maʼlumot va tushunchalar berdi.

Oʻz navbatida tadbir ishtirokchilari masʼullarga oʻzlarini qiziqtirgan savollar bilan murojaat qildilar. Oʻquvchi-yoshlar tomonidan tushgan savollarga huquqshunoslar batafsil va hayotiy misollar asosida javoblar berishdi.

Qoraqalpogʻiston Respublikasi Konstitutsiyasi qabul qilinganining 29 yilligi munosabati bilan tashkil etilgan mazkur targʻibot tadbiri oʻquvchi-yoshlarning huquqiy va konstitutsiyaviy bilimlarini yanada mustahkamlab, ularning huquqiy savodxonligini oshirish imkonini berdi.

Robiya YOʻLDOShEVA.