BOBUR NOMLI OVULDA “BIBIXONIM MAKTABI” QIZLARI IShTIROKIDA TANLOV OʻTKAZILDI

Yurtimizda oʻsmir yoshdagi qizlarni hayotga tayyorlash, turli vaziyatlarda toʻgʻri qaror qabul qilish koʻnikmalarini shakllantirish, yetakchilik qobiliyatini oshirish hamda zamonaviy kasb-hunar egallashlariga koʻmaklashish maqsadida “Bibixonim maktablari” tashkil etilib, mashgʻulotlar yoʻlga qoʻyilmoqda. Mashgʻulotlarga jamoatchilik asosida Zulfiya nomidagi Davlat mukofoti, “Moʻʼtabar ayol” koʻkrak-nishoni sovrindorlari, ijtimoiy-siyosiy, maʼnaviy-maʼrifiy soha mutaxassislari, obroʻ-eʼtiborga va katta tajribaga ega boʻlgan targʻibotchi xotin-qizlar, taʼlim muassasalarining malakali oʻqituvchi hamda psixologlari jalb etilib borilmoqda.

16-aprel kuni Bobur nomli ovul fuqarolar yigʻinida boʻlib oʻtgan tadbirda hududdagi qizlarning “Bibixonim maktabi” mashgʻulotlarida oʻzlashtirgan bilimlari sinovdan oʻtkazildi. Koʻrik-tanlov tarzida oʻtkazilgan ushbu tadbirda 6-, 60-, 86-sonli maktablarning oʻquvchi-qizlari ishtirok etdilar hamda mashgʻulotlar davomida egallagan bilimlarini namoyish qildilar.

Tadbirga tuman hokimi oʻrinbosari, oila va xotin-qizlar boʻlimi boshligʻi Goʻzal Saburova, Ayollarni reabilitatsiya qilish va moslashtirish tumanlararo markazi direktori Gavhar Chimbaychiyeva hamda fuqarolar yigʻinlari raislarining oila va xotin-qizlar masalalari boʻyicha oʻrinbosarlari, ovul hududidagi maktablar oʻqituvchilari va oʻquvchilari tashrif buyurdilar.

Tadbirda soʻzga chiqqan masʼullar tumanimizda ham qizlarning isteʼdodlarini roʻyobga chiqarishga koʻmaklashish, oʻsmir yoshdagi qizlarni hayotga tizimli tayyorlash, ularda turli hayotiy vaziyatlarda munosib qaror qabul qilish koʻnikmalari va zamonaviy kasb-hunar egallashga boʻlgan intilishlarini rivojlantirish maqsadida Xalq taʼlimi boʻlimi bilan hamkorlikda Xotin-qizlar jamoatchilik kengashlari huzurida va fuqarolar yigʻinlarida “Bibixonim maktablari” tashkil qilinganini aytib oʻtdilar. Har bir hududda belgilangan reja va dasturlar asosida mashgʻulotlar tashkil qilinib, 18-22 nafargacha qizlar ushbu mashgʻulotlarga jalb etilayotgani, bilim, koʻnikma va malakalari oshirilib borilayotganini eʼtirof etdilar.

Tadbir davomida ovulda tashkil etilgan “Bibixonim maktabi” qizlari oltita shart boʻyicha bellashdilar. Qizlar birinchi shartga koʻra oʻzlarini sheʼr va qoʻshiqlar ijro etib, oʻzlarini tanishtirdilar. Ikkinchi shartga koʻra turli mavzularda savol-javob oʻtkazilib, qizlarning bilimlari sinovdan oʻtkazildi.

Shundan soʻng, qizlar oʻrtasida bahru-bayt oʻtkazilib, sheʼriyat borasidagi bilimdonliklari aniqlandi. Milliy raqs shartiga koʻra qizlar oʻzlari sevib ijro etadigan raqslarini namoyish etdilar.

Oxirgi shart boʻyicha ''Buvijonlar oʻgiti'' deb nomlangan sahna koʻrinishini ijro etishib, shu orqali keksa onaxonlarning oiladagi oʻrni, pandu-nasihatlarining tarbiyadagi ahamiyatini koʻrsatib berishga harakat qildilar.

Tadbir davomida qizlar oʻzlarining qoʻl mehnati bilan yasalgan biri-biridan chiroyli ijod namunalarini ham namoyish etdilar. Har bir qizning tanlovdagi ishtiroki hakamlar tomonidan odilona baholab borildi.

Tanlov natijalariga koʻra, 6- va 86-sonli maktab qizlari 59 ball, 60-sonli maktab qizlari 50 ball toʻplashga muvaffaq boʻlishdi hamda bir xil natijalarga erishgan 6- va 86-sonli maktab qizlari gʻolib deb topildi. Gʻoliblarga faxriy yorliqlar va sovgʻalar topshirildi.

Tadbir Bobur nomli ovuldagi madaniyat markazida tashkil qilingan toʻgaraklar havaskorlari tomonidan ijro qilingan kuy va qoʻshiqlar bilan yanada maroqli va mazmunli oʻtdi.

O.Xudoyberganova.