Umumxalq xayriya hashari uyushqoqlik bilan oʻtkazildi

Oʻzbekiston Respublikasi Vazirlar Mahkamasining 2022-yil 26-aprel kungi farmoyishiga asosan 30-aprel kuni "Mahalla obodligi — yurt farovonligi" obodonlashtirish va koʻkalamzorlashtirish umumxalq xayriya hashari oʻtkazildi.

Darhaqiqat, bayramlar, qutlugʻ kunlar oldidan hovlisi chor-atrofini tozalash, tartibga keltirish, xonadonini sarishta qilib qoʻyishdek xalqimizning azaliy qadriyatlari davlatimiz siyosatida ham aks etmoqda. Ramazon hayiti arafasida umumxalq xayriya hasharining oʻtkazilishi ham fikrimizning isbotidir.

Hashar barcha joylarda boʻlgani kabi, Amudaryo tumanida ham uyushqoqlik bilan oʻtkazildi. Zero, xalqimizning azaliy udumlaridan biri sanalgan hashar odamlar orasidagi mehr-oqibat, pokizalik va uyushqoqlik ramzidir. Qolaversa, hududlarni obodonlashtirish va aholi uchun qulay sharoitlar yaratish Yangi Oʻzbekistonda kundalik masalaga aylangan.

Erta tongdan boshlangan hasharga tuman hokimligi, tumandagi muassasa, korxona va tashkilotlar xodimlari, taʼlim muassasalari jamoasi hamda ovul va mahallalar faollari qatnashdilar.

Ularning saʼy-harakatlari bilan koʻchalar, yoʻl boʻylari, ariqlar tozalanib, sanitariya holati yaxshilandi. Koʻp qavatli binolar, hovlilar atrofi tartibga keltirildi. “Yashil makon” aktsiyasi doirasida yoʻllar boʻylari, yashil hududlarga gullar, mevali, manzarali daraxtlar koʻchatlari oʻtqazildi. Ijtimoiy himoyaga muhtoj keksalar, nogironligi boʻlgan shaxslar, yakka-yolgʻiz yashovchi shaxslarning, boquvchisini yoʻqotgan oilalarning uy-joy sharoitlarini yaxshilashga koʻmak berildi.

Obodonlashtirish, koʻkalamzorlashtirish va tozalash ishlarini amalga oshirish jarayonida ovul va mahallalar hududida toʻplanib qolgan chiqindilar maxsus belgilangan hududlarga chiqarib tashlandi.

Hashar kunida ushbu harakatlarda jami 35 mingdan ziyod yurtdoshlarimiz qatnashdilar. Ularning saʼy-harakatlari tufayli 72 gektardan ziyod maydonlarda obodonlashtirish ishlari olib borildi. 66 tonnadan ziyod maishiy chiqindilar chiqarib tashlandi. Amalga oshirilgan ishlarga 50 ga yaqin texnikalar jalb etildi.

Shuningdek, 19 ta uy-joylar taʼmirlandi, 79 ta ehtiyojmand oilalarga moddiy yordamlar berildi. Shu jumladan 13 nafari yolgʻiz qariyalar va nogironligi boʻlgan shaxslardir.

Ozodalik, saranjomlik tobora goʻzallashib, obod boʻlib borayotgan yurtimiz koʻrkiga koʻrk qoʻshadi. “Mahalla obodligi — yurt farovonligi” shiori ostida boʻlib oʻtgan umumxalq xayriya hashari davomida hududimiz qiyofasi oʻzgaribgina qolmay, mehrga, eʼtiborga, koʻmakka muhtoj koʻngillarga ham shodlik ulashildi.

Hashar-saranjom-sarishtalik, ahillik va hamjihatlik ramzi ekanligi xalqimizning hamjihatlikdagi mehnatlari timsolida yana bir bor namoyon boʻldi.

Tuman hokimligining Axborot xizmati.