Shermonovlar oilasi “Vatanparvar oila” nominattsiyasi sohibi boʻldi

Oilalarni mustahkamlash, ularni qoʻllab-quvvatlash, oilaviy qadriyatlarni targʻib qilish borasida keng koʻlamli loyihalar amalga oshirilmoqda.

Maʼnaviy-ahloqiy muhitni yaxshilash, farovonlik darajasini oshirish, xotin-qizlarni har tomonlama qoʻllab-quvvatlashning huquqiy asoslari yaratilmoqda.

Oʻzbekiston Respublikasi Prezidentining joriy yil 7-martdagi “Oila va xotin-qizlarni tizimli qoʻllab-quvvatlash borasidagi ishlarni yanada jadallashtirish chora-tadbirlari toʻgʻrisida”gi farmoni bu boradagi ishlarni tizimli yoʻlga qoʻyishda dasturilamal boʻlmoqda. Mazkur farmonga koʻra, “2022-2026-yillarda xotin-qizlarning mamlakat iqtisodiy, siyosiy va ijtimoiy hayotining barcha jabhalarida faolligini oshirish boʻyicha Milliy dasturni 2022-2023-yillarda amalga oshirishga qaratilgan kompleks chora-tadbirlar rejasi” tasdiqlangan.

Unda xotin-qizlarni ijtimoiy-siyosiy qoʻllab-quvvatlash bilan bir qatorda, oilalarni mustahkamlashga qaratilgan tadbirlar, jumladan, “Yangi Oʻzbekistonning ibratli oilasi” koʻrik-tanlovini oʻtkazish belgilangan.

 Amudaryo tumanining Jumurtov shaharcha fuqarolar yigʻini hududida istiqomat qiluvchi Shermonovlar oilasi ham ushbu koʻrik-tanlovda munosib ravishda ishtirok etishdi.

Dastlab, mahallada soʻngra tuman miqyosida ibratli oila sifatida eʼtirof etilib, Qoraqalpogʻiston Respublikasida “Vatanparvar oila” nominattsiyasi sohibi boʻlgan ushbu oila haqiqatdan ham tumanimizdagi yosh oilalarga har tomonlama namuna boʻlib kelmoqda.

Oila ustuni Shermanov Bahrom 1973-yilda ziyoli oilada dunyoga keldi. U oʻrta maktabni 1990-yilda tugatib, Qozogʻiston Davlat Universitetiga oʻqishga kirgan. Mazkur Universitetni 1996-yili tugatib, “Jumurtov Farfared” tosh maydalash koni rahbari lavozimida ish faoliyatini boshladi. 1998-yilda turmush oʻrtogʻi Nilufar Saidova bilan oila quoishdi. Ushbu oila 24-yildan buyon ahil va inoq boʻlib tinch-totuvlikda yashab kelishmoqda.

Bahtli oilaning 3 nafar qizi va bitta oʻgʻli bor.

Toʻngʻich farzandi Farida Nukus davlat pedagogika institutining xorijiy filologiya fakulʼtetida 4-kurs talabasi, ikkinchi farzandi Anora esa, Toshkent axborot texnologiyalari universitetining 2-bosqich talabasi, uchinchi farzand Shoira ham katta opasi Faridaning izidan ergashib, xorijiy til fakulʼtetiga oʻqishga kirdi. Kenja farzand Dilshodbek esa, 86-sonli umutaʼlim maktabining 10-sinfida tahsil oladi.

Jumurtov shaharcha fuqarolar yigʻini tuman markazidan uzoqda joylashgan boʻlishiga qaramasdan ota-ona farzandlarining uqib bilim olishi va kasb-hunar egallashlari uchun barcha sharoitlarni yaratib berishgan.

Oila boshi Bahrom Shermonov 2016-yildan buyon Xalq deputatlari Amudaryo tuman Kengashi deputati sifatida mahalla raisi, hokim yordamchisi, xotin-qizlar faoli bilan doimiy hamkorlik qilib, mahalla hududidagi kam taʼminlangan, ijtimoiy yordamga muhtoj aholiga oʻz yordamini koʻrsatib kelmoqda.

Deputat oʻz faoliyati davomida saylov okrugi hududidagi 3 ta maktabning taʼmirlanishida oʻzining moddiy yordamini koʻrsatib, mahalladoshlarining yuksak hurmat va eʼtiboriga sazovor boʻldi.

Aholidan kelib tushayotgan turli mazmundagi murojaatlar yuzasidan tegishli tashkilotlarga  deputat soʻrovi bilan murojaat qilib, koʻplab muammolarning hal qilinishiga erishdi.

Turmush oʻrtogʻi Nilufar Saidova hozirgi kunda 43-sonli umumtaʼlim maktabda boshlangʻich sinf oʻqituvchisi. Oʻz hamkasblari va oʻquvchilar orasida fidoiy va mehribon ustoz sifatida tanilgan, maktab jamoasining doimiy hurmat va eʼtiborida boʻlgan ayol, oʻquvchilarini oʻz farzandlaridek koʻradi. Ularga taʼlim va tarbiya berishdan hech ham charchamaydi.

Turmushning eng yaxshi va ibratli udumlari, anʼanalari, hayot sinovidan oʻtgan talab va taqozolari asosiga qurilgan ushbu oila ishonamizki, hali uzoq yillar yosh oilalarga ibrat va namuna boʻlib qoladi.

Niyatimiz, har bir oila maʼnaviy sogʻlom, baxtli va xotirjam hayot kechirsin. Oila bagʻrida ulgʻayayotgan farzandlar komil inson sifatida voyaga yetib, davlatimizning kuchiga kuch, qudratiga qudrat qoʻshaversin.

 Zero, oila jamiyatning asosiy boʻgʻini ekan, uning mustahkam boʻlishi, farovonligi davlatimiz va jamiyatimiz ravnaqiga xizmat qilishi, shubhasizdir.

Tuman hokimligining Axborot xizmati