OʻQUVChI-YoShLAR TANIQLI IJODKORLAR BILAN UChRAShDILAR

Yetuk ijodkorlar, xususan, shoirlar katta shaharlarda yashab, ijod etadi, deyishadi. Lekin asl ijodkor uchun katta shaharlardan koʻra, oʻzi tugʻilib-oʻsgan zamin, qadrdon eldoshlari, ana shu zaminda yuz berayotgan oʻzgarishlar bitmas-tuganmas ilhom manbaidir. Buni joriy yilning 27-aprel sanasida 42-sonli umumtaʼlim maktabida boʻlib oʻtgan amudaryolik shoir va yozuvchilar ishtirokida oʻtkazilgan ijodiy uchrashuvda yaqqol his etdik.
Maktabning ijodga, sheʼriyatga ixlosmand oʻquvchi-yoshlari hamda oʻqituvchilari ishtirokidagi mazkur uchrashuvda taniqli ijodkor, Amudaryo tuman maʼnaviyati fidoyisi, Xalq taʼlimi aʼlochisi, “Mehnat faxriysi” koʻkrak nishoni sohibi, koʻplab insonlarning, ayniqsa, yoshlarning sevimli ustozi Tursunboy Abdullayev, shoir va yozuvchi, faxriy ustoz Ahmad Nafasov, Oʻzbekiston Yozuvchilari uyushmasi aʼzosi, Qoraqalpogʻiston Respublikasida xizmat koʻrsatgan jurnalist Robiya Yoʻldoshevalar qatnashdilar.

Qizgʻin va samimiy muloqot, sheʼrxonlik asosida oʻtgan uchrashuvni maktab direktori Qurol Mamutov ochdi va ishtirokchilarni tadbir mehmonlari bilan tanishtirdi hamda maktabda ijodiy-madaniy masalalar boʻyicha amalga oshirilayotgan ishlar xususida toʻxtalib oʻtdi.
Ijodkor yoshlar bilan uchrashuv tadbirini Robiya Yoʻldosheva biri-biridan ibratli adabiy hikmatlar, shu bilan birga mazkur maktab oʻquvchilarining ijodlaridan namunalar aytib berish orqali chiroyli tarzda boshqarib bordi.
Uchrashuv ishtirokchilari Tursunboy Abdullayevning sheʼriy chiqishlarini olqishlar bilan kutib oldilar. Oʻzining betakror ijodi, ayniqsa, xalqona ruhda yozilgan toʻy-marosimlar qoʻshiqlari, kelin salomlari, “Xitoyqishloq hangomalari” turkumidagi hajviyalari bilan xalqimiz qalbidan munosib joy olgan hikmatnavis shoir, ajoyib hajv ustasi Tursunboy Abdullayev  oʻquvchi-yoshlarga yangi sheʼrlaridan oʻqib berdi. Amudaryo tumanining oʻziga xos xalq ogʻzaki ijodini mukammal oʻrganib, hatto tadqiq qilgan, ana shu bebaho durdonalardan ilhomlanib “1001 salom” kitobini yozgan Tursunboy Abdullayev ijodidan nafaqat oʻquvchi-yoshlar, hatto maktab oʻqituvchilari ham bahra oldilar...
Uchrashuvda “Salomchi mening unvonim”, “Keldim, dovonlar oshib” kitoblarining muallifi, shoir va faxriy ustoz Ahmad Nafasov oʻquvchilarga oʻzining ustozi Tursunboy Abdullayev hayoti va ijodiy faoliyati, uning shaxs sifatidagi shakllanish jarayoni, bundan ham muhimi, shoirlik maqomi haqida hikoya qiluvchi “Salomchi mening unvonim” kitobining yozilishi tarizi, kitobda jam boʻlgan har bir satr kelin salomlarining xalq maʼnaviy hayotida tutgan oʻrni haqida soʻzlab berdi. Shu bilan birga, Ahmad Nafasov oʻzining yangi sheʼrlaridan oʻqib, oʻquvchi-yoshlarning savollariga javob berdi.
Eng koʻp savollar Tursunboy Abdullayev ijodi bilan bogʻliq boʻldi. Oʻquvchi-yoshlar “Taraqqiyot koʻzgusi” va “Mening oilam” gazetalarida chop etilgan “Xitoyqishloq hangomalari” turkumidagi hajviyalarning hayotda prototipi bor yoki yoʻqligi bilan qiziqdilar. Shuningdek, Ahmad Nafasovning “Salomchi mening unvonim” kitobidagi kelin salomlari qachon yozilgan, bu kelin salomlarida nomlari zikr etilgan insonlar xususida soʻradilar. T.Abdullayev oʻquvchilarni qiziqtirgan barcha savollarga batafsil javob berib, “Xitoy qishloq hangomalari”dagi soddadil qahramonlarning barchasi oʻzimizning eldoshlarimiz ekanligini, ana shunday chapani, goh shaddod, goh sodda va samimiy yurtdoshlarimiz oʻziga ilhom baxsh etishini faxrlanib soʻzladi.

Uchrashuv davomida oʻquvchi-yoshlar Oʻzbekiston Xalq shoirlari M.Yusuf, A.Oripov, E.Vohidov sheʼrlaridan ham oʻqib berishdi.
Sheʼrxonlik, samimiy muloqot tarzida oʻtgan uchrashuvda ijodkor yoshlar ham oʻz ijodlaridan namunalar oʻqishdi. Ustoz shoirlarning samimiy suhbatlari. sheʼrlari va ibratli hikoyalari oʻquvchilar qalbida adabiyotga, sheʼriyatga ixlos tuygʻularini uygʻotib, ona Vatanga muhabbat, oʻzaro mehr-oqibat rishtalarini yanada mustahkamladi. Muhimi, oʻquvchi-yoshlar nazmiy va nasriy suhbatlardan katta maʼnaviy oziq oldilar.

Risolat Ibragimova,
42-sonli maktabning ijodiy-madaniy ishlar targʻibotchisi.