“Yangi renessans ishtirokchilari” deb nomlangan grant loyihasi doirasida tadbir oʻtkazildi

Hayotda shunday insonlar borki, ularning sabr-toqati, matonati, jasoratini koʻrib, oʻz hayotingizni tahlil qilasiz. Boshiga tushgan musibatni yengib oʻtib, olgʻa intiladigan, yon-atrofga, dunyoga muhabbat bilan qaraydigan, jamiyatda oʻz oʻrnini topishga harakat qiladigan bunday kishilardan har qancha ibrat olsa arziydi.

 Oʻzbekiston Respublikasi Nogironlar jamiyati Amudaryo tuman boʻlinmasi tomonidan imkoniyati cheklangan fuqarolarni ijtimoiy-maʼnaviy qoʻllab-quvvatlash, ularning oʻz imkoniyatlari darajasida kasb-hunar oʻrganishlari, intiluvchan, bilimga chanqoq, nogironligi boʻlan yoshlarning bilimlarini oshirish, dunyoqarashlarini kengaytirishlari uchun zarur shart-sharoitlar yaratishga alohida eʼtibor qaratilmoqda.

20-may kuni Amudaryo muhandislik texnikumi binosida Oʻzbekiston nogironlar jamiyati Amudaryo tuman boʻlimi hamda bir qancha hamkor tashkilotlar bilan birgalikda “Yangi renessans ishtirokchilari” deb nomlangan grant loyihasi doirasida oʻquv tadbiri boʻlib oʻtdi.

Unda Oʻzbekiston nodavlat notijorat tashkilotlari milliy assotsiatsiyasi Qoraqalpogʻiston hududiy boʻlinmasi rahbari Gulsara Jollibekova, tuman Xalq taʼlim boʻlimi, Yoshlar ittifoqi, Maʼnaviyat va maʼrifat markazi masʼullari va boshqa hamkor tashkilot vakillari shuningdek, ota-onalar ishtirok etishdi.

Tadbir davomida soʻzga chiqqanlar tumanimizning turli hududlarida istiqomat qiluvchi imkoniyati cheklangan iqtidorli oʻsmirlar va yoshlarning oʻz qobiliyatlarini namoyon etishlari uchun ularni intellektual mehnat faoliyatiga jalb etish borasida amalga oshirilayotgan ishlar haqida toʻxtalib oʻtishdi.

Shuningdek, “Nogironligi boʻlgan shaxslarning huquqlari toʻgʻrisida”gi Oʻzbekiston Respublikasining Qonunida sport, maʼrifiy va madaniy tadbirlarni tashkil etishning huquqiy asoslari toʻgʻrisida batafsil maʼlumot berdilar.

Oʻquv-tadbirida 14 yoshdan 17 yoshgacha nogironligi boʻlgan oʻsmirlarning kompyuter savodxonligini oshirish boʻyicha koʻnikmalari shakillantirildi. Shuningdek, oʻquvchilar kasbga oʻrgatilib, umumtaʼlim fanlari boʻyicha bilimlarini mustahkamladilar.

Tadbir yakunida oʻquvchilar homiylar tomonidan tayyorlangan esdalik sovgʻalari va faxriy yorliqlar bilan taqdirlandi.

Shu oʻrinda aytish joizki, jismoniy imkoniyati cheklangan, turli sabablarga koʻra nogiron boʻlib qolganlarning jamiyatga qoʻshilishi uchun sharoit yaratib berish, atrofdagilarning ularga nisbatan mehr-oqibatli boʻlishini taʼminlash hamda ularni ragʻbatlantirish jamiyatning komillik darajasini belgilab beradi.

Oʻzbekiston Respublikasi Nogironlar jamiyati Amudaryo tuman boʻlinmasi xodimlari ham nogironligi boʻlgan shaxslarning jamiyatda faol ishtirok etishiga koʻmaklashish orqali ular uchun har tomonlama qulay sharoitlar yaratishga hissa qoʻshib kelishmoqda.

F.Eshimbetova.