YoNGʻINGA QARShI SUV OLGICh (GIDRANT)LARNING TEXNIK HOLATI OʻRGANILIB, SUNʼIY TOʻSIQLAR OLIB TAShLANMOQDA

Amudaryo tumani Favqulodda vaziyatlar boʻlimiga qarashli  Kasbiylashtirilgan yongʻin qutqaruv qismlari tomonidan tumandagi ovul yoki mahallalar hududlarida yongʻin xavfi yuzaga kelganida tezkor qutqaruv ishlarini olib borish va birinchi navbatda yongʻinlarni tezlik bilan bartaraf etishga xizmat qiluvchi suv olgich, yaʼni gidrantlar holati tez-tez nazorat qilinib, mazkur inshootlardan samarali foydalanish boʻyicha zarur chora-tadbirlar amalga oshirib kelinmoqda.

Lekin shuni alohida taʼkidlash kerkki, koʻpchilik holatlarda mahallalar hududlarida joylashgan yongʻinga qarshi suv olgichlar joylashgan hududlardagi koʻchalarda qurilish ishlari amalga oshirilishi  natijasida bu kabi inshootlarga zarar yetkazilmoqda. Koʻpchilik hollarda suv olgichlar ustidan asfalt qoplamali yoʻl va yoʻlaklar qurilib, inshootlar koʻmilib qolmoqda. Yoʻl quruvchilar, obodonlashtirish boʻlimi ishchilari va aholi ushbu masalaga yuzaki yondoshib, suv olgichlarga eʼtiborsizlik bilan qarash holatlari yuz bermoqda.

Chunki yongʻinga qarshi suv olgichlar yongʻin sodir boʻlganda yongʻin oʻchirish avtomashinalarini suv bilan taʼminlash va yongʻinlarni tezda bartaraf etishda muhim oʻrin tutadi.

Amudaryo tumani hududida jami 272 ta yongʻinga qarshi suv olgichlar mavjud boʻlib, 2022-yilning 5 oyi davomida ularning texnik holatini amalda oʻrganish maqsadida Amudaryo tumani Favqulodda vaziyatlar boʻlimiga qarashli 3-sonli va 4-sonli Kasbiylashtirilgan yongʻin-qutqaruv qismlari va Suv tarmoqlari korxonasi bilan hamkorlikda yoʻl xaritasi ishlab chiqilgan.

Ushbu yoʻl xaritaga asosan yongʻinga qarshi suv olgichlarning texnik holati Amudaryo tumani Favqulodda vaziyatlar boʻlimining 3- va 4-Kasbiylashtirilgan yongʻin-qutqaruv qismlari shaxsiy tarkibi va suv tarmoqlari korxonasi xodimlari  ishtirokida doimiy ravishda amalda oʻrganib borilmoqda.

Oʻrganish jarayonlari tumanimizning Beruniy nomli mahalla fuqarolar yigʻini hududidagi Beruniy nomli koʻchada joylashgan 3 dona yongʻinga qarshi suv olgichlarning texnik holatini nazorat qilindi. Oʻrganish natijalariga koʻra 1 dona yongʻinga qarshi suv olgich asfalt yoʻli tagida qolib ketganligi aniqlandi va nosozliklar tuman Favqulodda vaziyatlar boʻlimi xodimlari va Suv tarmoqlari korxonasi xodimlari tomonidan joyida bartaraf qilinib, uzluksiz suv bilan taʼminlanishi yoʻlga qoʻyildi.

Navbatdagi oʻrganish jarayonlari tumanimizning Daryo boʻyi mahallasida davom ettirildi. Mazkur mahallada joylashgan Amudaryo tumani Xalq taʼlimi boʻlimiga qarashli 65-sonli oʻrta maktabga borish yoʻlida sunʼiy toʻsiq aniqlanib, Amudaryo tumani Favqulodda vaziyatlar boʻlimining 3- va 4-Kasbiylashtirilgan yongʻin-qutqaruv qismlari shaxsiy tarkibi tomonidan olib tashlandi.

Muhammad YuSUPOV, Amudaryo tumani Favqulodda vaziyatlar boʻlimi 3-Kasbiylashtirilgan yongʻin-qutqaruv qismi boshligʻi.

Rashid KAZAKOV, Amudaryo tumani Favqulodda vaziyatlar boʻlimi 4-Kasbiylashtirilgan yongʻin-qutqaruv qismi boshligʻi.