YoShLAR YeTAKChILARI ShIFOXONADAGI BOLALARNI BAYRAM BILAN TABRIKLAShDI

Bolalik – hayot ummonining musaffo sarchashmasi. Boisi, u har bir murgʻak qalb uchun tashvishlardan yiroq, ezgulikka toʻla lahzalardir. Goʻdaklarning bahor tongi misol qalbi faqat yaxshiliklarga yoʻgʻrilgan boʻladi. Shu sabab 1-iyun – Xalqaro bolalarni himoya qilish kuni eng quvonchli bayram sifatida butun dunyo boʻylab keng nishonlanadi.
Aslida oʻsib kelayotgan yosh avlodni himoya qilish zamirida hayotni, uning davomiyligini asrab-avaylash mohiyati yotadi. Ular toʻgʻrisida har qanday gʻamxoʻrlik esa yurt ravnaqi uchun qoʻyilayotgan mustahkam poydevor demakdir. Donishmandlardan biri “ Millatning kelajagini bolalarga qarab anglash mumkin”, degan edi. Bugun ertamiz egalariga koʻrsatilayotgan eʼtibor kelajakda ularning Vatanga sadoqatli, jismonan va maʼnan barkamol boʻlib yetishishida muhim omil hisoblanadi.
Sana munosabati bilan Bosuv, Olmazor, Daryoboʻyi, Yangi obod mahallalari hamda Choykoʻl ovuli  yoshlar yetakchilari tashabbusiga koʻra tuman Markaziy shifoxonasida davolanayotgan 30 dan ortiq bolalar holidan xabar olindi va shirindan-shakar bolajonlarga sovgʻalar ulashildi.
Bolalarning bu tashrifdan quvonchlari nihoyatda cheksiz boʻldi.

Nigora Bozorboyeva, Bosuv mahalla fuqarolar yigʻini yoshlar yetakchisi.