ADABIY KEChA OʻTKAZILDI
Mamlakatimizda xalqimiz maʼnaviyatini yuksaltirish, yosh avlodni Vatanga muhabbat, milliy qadriyatlar ruhida kamol toptirishda badiiy adabiyotning oʻrni, taʼsiri va ahamiyatini yanada oshirish, ularning ravnaqiga hissa qoʻshish hamda yosh shoir yozuvchilarning ijodiy salohiyatini roʻyobga chiqarish, ularni har tomonlama qoʻllab-quvvatlash orqali jamiyatda ijtimoiy-maʼnaviy muhitni yanada yaxshilash borasida koʻplab amaliy tadbirlar oʻtkazilmoqda.
Tumanda faoliyat yuritayotgan “Jayxun ilhomlari” nodavlat notijorat tashkiloti tomonidan bu borada olib borilishi lozim boʻlgan ishlar rejasi tayyorlangan. Tashkilot tomonidan turli mavzularda 12 marotaba maktablarda, 18 marotaba ovul va mahalla fuqarolar yigʻinlarida davra suhbatlari oʻtkazish koʻzda tutilmoqda. 6 marotaba maktab oʻquvchilari oʻrtasida insholar tanlovlari oʻtkazilib gʻolib va sovrindorlar munosib taqdirlandi.
Keng omma orasida oʻtkazilayotgan “Oilada farzand tarbiyasining ahamiyati, yoshlarni zararli illatlar va turli axloqsizliklardan himoya qilishda ota-onalar va mahallaning oʻrni”, “Yoshlar maʼnaviyatini yuksaltirish, ularni kitobxonlikka jalb qilish orqali giyohvandlik, ichkilikbozlik, turli axloqsizliklardan himoya qilish”, “Yoshlar oʻrtasida sogʻlom turmush tarzi koʻnikmalarini keng targʻib qilish, ularni giyohvandlik, ichkilikbozlik va turli axloqsizliklardan himoya qilish” mavzularidagi suhbatlar barchada katta qiziqish uygʻotmoqda.
Tashkilot aʼzolari tomonidan yoshlar, maktab oʻquvchilari orasida ijodiy uchrashuvlarning oʻtkazilib turilishi yosh ijodkorlarning ijodiy salohiyatini oshirishga yaqindan yordam bermoqda. Tumanimizda yashab ijod qilayotgan ijodkorlarning hayotiy tajribalari, ijodiy mahoratlarini oʻrganish yoshlarning ijodiga oʻzining ijobiy taʼsirini oʻtkazmoqda. Bugungi kunga kelib bir necha kitoblarning muallifiga aylangan Saʼdulla Xoʻjaniyozov, Tursunboy Abdullayev, Ahmad Nafasov, Robiya Yoʻldosheva, Shomurod Xoʻjanov, Zulfiya Ollayorovalarning ijodi koʻpchilik yoshlarga oʻrnak boʻlmoqda.
Navbatdagi yosh ijodkorlar bilan uchrashuv tuman Xalq taʼlimi boʻlimiga qarashli 28-sonli maktabda boʻlib oʻtdi. Ijodiy uchrashuvni maktab direktori Bahodir Sobirov kirish soʻzi bilan ochib berdi. Uchrashuv mehmoni, “Jayxun ilhomlari” nodavlat notijorat tashkilotning raisi Oʻrozali Reyimov yosh ijodkorlarni tumandagi ijodiy jarayon, yosh ijodkorlarga yaratilayotgan keng imkoniyatlar bilan tanishtirdi.
“Ilk parvozim”, “Mehr” nomli sheʼriy toʻplamlar muallifi, 35-sonli maktabning 11-sinf oʻquvchisi Barno Samandarova oʻzining ayni kunlardagi ijodiy faoliyati bilan barchani tanishtirib oʻtdi va yangi sheʼrlaridan oʻqib berdi.
Maktabdagi ijodiy toʻgaraklar faoliyati haqida soʻz yuritildi. Maktab oʻquvchilari ijrosida bahri-bayt aytishuvi oʻtkazildi. Bugungi kunda oʻzlarining jajji sheʼrlari bilan tumanimizda tanilib ulgurgan ushbu maktabning 9-sinf oʻquvchisi Abrorbek Gulmirzayev, 5-sinf oʻquvchisi Gulshoda Bahodirovalar oʻzlarining yangi yozgan sheʼrlaridan oʻqib berdilar.
Ijodiy kechaning asosiy qatnashuvchilari maktabning bitiruvchilari boʻlganligi uchun ular oʻzlarining kelajakdagi orzu-umidlari bilan oʻrtoqlashdilar. Maktab oʻqituvchilari, ijodiy kecha mehmonlari tomonidan bitiruvchi yoshlarga ulkan umid va yutuqlar, omadlar bildirildi.
Ana shunday ijodiy uchrashuvlarni tez-tez oʻtkazib turishga kelishib olindi.
Oʻrozali Reimov
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
