“BIR NURONIY OʻN YoShGA MASʼUL” NOMLI TABDIR OʻTKAZILDI

Mamlakatimizda keksalarni har tomonlama qoʻllab-quvvatlash, ularning turmush darajasi va ijtimoiy faolliklarini yanada oshirish maqsadida Prezidentimizning qator Farmon va Qarorlari qabul qilingan. Tumanimizda ushbu hujjatlar ijrosini taʼminlash boʻyicha hokimlik va tegishli tashkilotlar tomonidan tizimli ishlar olib borilmoqda.

Jumladan, “Bir nuroniy oʻn yoshga masʼul” tamoyili asosida mahallalarda hayotiy va katta amaliy tajribaga ega boʻlgan obroʻ-eʼtiborli nuroniylar va ziyolilarni ishsiz, tarbiyasi ogʻir va muammoli yoshlarga biriktirish orqali ularni jamiyat uchun foydali insonlar boʻlib yetishishlariga koʻmaklashish amaliyoti yoʻlga qoʻyilgan boʻlib, bugungi kunda tumandagi mavjud 49 ta ovul va mahalla fuqarolar yigʻinlarida istiqomat qiluvchi 490 nafar muammoli yoshlarga 70 nafar faol nuroniylar biriktirildi.      

Joriy yilning 3-iyun kuni tumandagi “Xon saroy” mehmonxonasi restoranida fuqarolar yigʻinlarida jamoatchilik asosida faoliyat yuritib kelayotgan, mahallalarda “Bir nuroniy oʻn yoshga masʼul” tamoyilini qaror toptirishda tashabbuskorlik koʻrsatayotgan ijtimoiy faol nuroniylar ishtirokida tadbir boʻlib oʻtdi.

Nuroniylarga toʻkin dasturxon yozilib izzat-ikrom koʻrsatildi.

Tadbirdan koʻzlangan maqsad– fuqarolar yigʻinlaridagi “Keksalar maslahati” guruhlari va “Buvijonlar maktabi” jamoatchilik kengashlari aʼzolarini, katta hayotiy tajribaga ega boʻlgan nuroniylarni “Bir nuroniy oʻn yoshga masʼul” tamoyili asosida tarbiyasi ogʻir, maʼnaviy koʻmakka muhtoj, uyushmagan, ishsiz, muammoli yoshlarga biriktirish orqali ularga koʻmak berish boʻyicha oʻzaro tajriba va fikr almashishdan iborat.

Tadbirda Qoraqalpogʻiston Respublikasi Mahalla va nuroniylarni qoʻllab-quvvatlash vaziri oʻrinbosari, “Nuroniy” jamgʻarmasi raisi Tursinbay Abdijabbarov, tuman hokimi Sultonboy Yoʻldashev hamda bir guruh faol nuroniy otaxonlar qatnashdilar.

Tadbir davomida Tursinbay Abdujabbarov nuroniylarga yoshlar tarbiyasiga befarq boʻlmaganligi, ayrim muammoli yoshlarni otaliqqa olib, ularga har tomonlama koʻmak berayotganliklari uchun oʻzining chuqur minnaddorligini bildirdi.

Shu bilan birga, tadbirda belgilagan ishlar samaradorlagini oshirish maqsadida mahallalarda keksa avlod vakillari va yoshlar ishtirokidagi uchrashuvlarni oʻtkazish orqali yoshlarni milliy qadriyatlarimizga hurmat ruhida tarbiyalash hamda hayotda oʻz oʻrnini topishga koʻmaklashish borasidagi ishlarni yangi bosqichga koʻtarish lozimligini taʼkidlab oʻtdi.

Shuningdek, yoshlarni diniy bagʻrikenglik va millatlararo totuvlik ruhida tarbiyalashga qaratilgan turkum tadbirlar tashkil etishni anʼanaga aylantirish, “Bir nuroniy oʻn yoshga masʼul” tamoyili asosida har bir mahalla fuqarolar yigʻinida nuroniylarni yoshlarga biriktirish boʻyicha yangi tizimni joriy etishda amalga oshirilayotgan ishlar haqida batafsil toʻxtalib oʻtdi.

Tadbir davomida keksalarni davlat tomonidan qoʻllab-quvvatlash, ular uchun mamlakat boʻylab sayohatlarni tashkil etish, imkoniyati cheklangan hamda yolgʻiz keksalarga moddiy yordam koʻrsatish va ularni manzilli ijtmoiy himoya qilish maqsadida pensiya, ijtimoiy va tibbiy taʼminot xizmatining taʼsirchan mexanizmlarini yaratish hamda nazorat oʻrnatish kabi muhim masalalar boʻyicha soʻz yuritildi.

Shuningdek, tadbirda jamoat ishlarida faol, mahallalardagi ijtimoiy-maʼnaviy muhitni sogʻlomlashtirishga, jinoyatchilik va ajrimlarning oldini olishga munosib hissa qoʻshib kelayotgan tuman Mahalla va nuroniylarni qoʻllab-quvvatlash boʻlimi qoshidagi “Nuroniylar” jamoatchilik kengashi raisi oʻrinbosari, Bekmon ota Allabeganov 75 yoshga toʻlishi munosabati bilan Qoraqalpogʻiston Respublikasi Mahalla va nuroniylarni qoʻllab-quvvatlash vazirligi, tuman hokimligi hamda Mahalla va nuroniylarni qoʻllab-quvvatlash boʻlimi tomonidan pul  mukofoti va qimmatbaho sovgʻalar bilan taqdirlandi.

Tadbirda tuman Mahalla va nuroniylarni qoʻllab-quvvatlash boʻlimi boshligʻi Gʻulomjon Duysenbayev, boʻlim boshligʻi maslahatchisi, “Mahalla” xayriya jamoat fondi tuman boʻlinmasi raisi, “Nuroniylar” jamoatchilik kengashi raisi Bahadir Baltabayev, Respublika Maʼnaviyat va maʼrifat markazi tuman boʻlinmasi rahbari Mahsud Sadullayev, Yoshlar ishlari agentligi tuman boʻlinmasi raisi Sardor Ismailov, “Buvijonlar maktabi” jamoatchilik kengashi raisi oʻrinbosari, Sanobar Xoʻjamuratovalar loyihani amalga oshirish borasida oʻzaro fikr almashib oʻz taklif va mulohazalarini bildirishdi.

Tadbir tuman Madaniyat boʻlimi sanʼatkorlari tomonidan tayyorlangan kontsert dasturi  bilan davom etdi.

Mahalla− ajdodlarimizning yuksak tafakkurini, urf-odatlar va anʼanalarini oʻzida mujassam etgan, jahon ahli havas qiladigan ezgu qadriyatlarimiz koʻzgusidir. Bugungi kunda bu noyob tuzilmaga yangicha maʼno-mazmun baxsh etilayotgan “Bir nuroniy oʻn yoshga masʼul” tamoili yoshlarning barkamol avlod boʻlib voyaga yetishlari, hayotda oʻzining munosib oʻrnini topishlari uchun muhim ahamiyat kasb etmoqda.

B.Baltabayev,

Amudaryo tumani Mahalla va nuroniylarni qoʻllab-quvvatlash boʻlimi boshligʻi maslahatchisi,

“Mahalla” xayriya jamoat fondi tuman boʻlinmasi raisi