“Besh muhim tashabbus olimpiadasi”ning tuman bosqichi gʻoliblari munosib taqdirlandi
Mamlakatimizda yoshlarga oid davlat siyosati izchillik bilan amalga oshirilmoqda. Soʻnggi yillarda kelajagimiz egalarini har tomonlama qoʻllab-quvvatlash, tashabbuskor, shijoatli yoshlarni tarbiyalash borasida alohida tizim yaratildi.
Prezidentimiz tomonidan ilgari surilgan yoshlarning madaniyat, sanʼat, sport, axborot texnologiyalari va kitob oʻqishga boʻlgan qiziqishini har tomonlama qoʻllab-quvvatlashga qaratilgan “Besh muhim tashabbus” doirasida ham keng koʻlamli ishlar amalga oshirilmoqda.
4-iyun kuni Amudaryo tumanining Doʻstlik mahallasi hududidagi 2-sonli Bolalar-oʻsmirlar sport maktabi oʻyingohida “Besh muhim tashabbus olimpiadasi”ning tuman bosqichi yakunlanishi munosabati bilan tantanali tadbir oʻtkazildi.
Tadbirda tuman hokimi Sultonboy Yoʻldashev, sektorlar rahbarlari, Davlat xavfsizlik xizmati xodimlari, hokim oʻrinbosarlari hamda musobaqalarda faxrli oʻrinlarni qoʻlga kiritgan shijoatli yoshlar ishtirok etishdi.
Tadbir avvalida tuman hokimi Sultonboy Yoʻldashev barcha yoshlarni “Besh tashabbus olimpiadasi”ning mahalla, sektor hamda tuman bosqichlarida muvaffaqiyatli qatnashib, faxrli oʻrinlarni qoʻlga kiritgani bilan samimiy tabrikladi. Shuningdek, 17 ta yoʻnalishda oʻtkazilgan bellashuvlar, tanlovlar va musobaqalar yuqori saviyada tashkil qilinib, unda 27 ming dan ortiq yoshlar faol ishtirok etishganini eʼtirof etib oʻtdi.
Shundan soʻng, “Besh tashabbus olimpiadasi”da faol qatnashgan va yuqori natijalarga erishgan yoshlarni taqdirlash jarayoni boʻlib oʻtdi.
Maʼlumot uchun aytish kerakki, tadbirlarning tuman bosqichida 405 nafar yoshlar gʻolib va sovrindarlar qotoridan joy olib, ular orasidan 1-oʻrinni qoʻlga kiritgan 144 nafar yoshlar hududiy bosqichga yoʻllanma oldilar. Bugungi kunga qadar hududiy bosqichning 4 ta yoʻnalishi boʻyicha yakuniga yetgan musobaqalarda 3 nafar yoshlar Respublika bosqichiga yoʻllanmani qoʻlga kiritishdi.
Xususan, professional shaxmat boʻyicha ayol-qizlar oʻrtasida oʻtkazilgan musobaqalarda Oʻzbekiston mahallasidan Rayxona Shamuratova, “Yosh kitobxon oila” tanlovida Doʻrman ovulidan Oʻrinboyevlar oilasi alohida eʼtirofga sazovardir.
“Besh tashabbus olimpiadasi” doirasidagi sport musobaqalarini tizimli tashkil etish va oʻtkazish uchun davlat byudjetidan har yili 50 mlrd. soʻm miqdorda mablagʻ ajratilishi yoshlarga berilayotgan katta eʼtiborning yorqin namunasidir.
Shuningdek, “Besh tashabbus olimpiadasi” hamda boshqa maxsus umumrespublika sport musobaqalari davomida gʻolib va sovrindorlarni tayyorlagan jismoniy tarbiya fani oʻqituvchilari va trenerlar malaka attestatsiyasiga jalb etilmasligi hamda va ularga toʻgʻridan-toʻgʻri malaka toifalari berilishi ustoz va murabbiylarimiz uchun ham katta imkoniyatdir.
Aytish kerakki, “Besh tashabbus” doirasida oʻtkazilayotgan musobaqlar, tanlovlar va bellashuvlar zukko kitobxonlarni, madaniyat va sanʼat sohasining yetuk vakillarini, axborot texnologiyalari boʻyicha yetakchi mutaxassislarni hamda dunyo tan olgan sportchilarni kashf qilish va saralashda muhim vosita boʻlib xizmat qiladi.
“Besh tashabbus olimpiadasi”ning tuman bosqichda faxrli 1-oʻrinni qoʻlga kiritgan intiluvchan oʻgʻil-qizlarga keyingi bosqichlarda ham omad tilaymiz.
Amudaryo tumani hokimligining Axborot xizmati.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
