“Qaldirgʻoch” bolalar oromgohi bolajonlarni oʻz bagʻriga chorladi

Yurtimizda yoshlarning bilimli, zukko, shu bilan birga sogʻlom boʻlib voyaga yetishi uchun barcha sharoitlar yaratilgan. Jumladan, ularning yozgi taʼtilini maroqli va mazmunli oʻtkazish maqsadida respublikamizning barcha hududlarida boʻlgani kabi Amudaryo tumanida ham “Qaldirgʻoch” bolalar yozgi oromgohi ish boshladi. Oromgohda bu yilgi sogʻlomlashtirish mavsumiga puxta tayyorgarlik koʻrildi. 3-iyun kuni ushbu oromgohning ochilish marosimi boʻlib oʻtdi.

Tadbirda sektorlar rahbarlari — tuman prokurori, 2-sektor rahbari Aziz Roʻzmetov, 3-sektor rahbari, tuman Ichki ishlar boʻlimi boshligʻi Ulugʻbek Xudoyberganov, 4-sektor rahbari, tuman Davlat soliq inspektsiyasi boshligʻi Aydos Seitov, Davlat xavfsizlik xizmati xodimlari, tuman hokimi oʻrinbosari Mahmud Shermetov, Xalq taʼlimi boʻlimi mudiri Akmal Ismailovlar ishtirok etishdi.

Dastlab tuman hokimi oʻrinbosari Mahmud Shermetov barcha bolajonlarni ushbu oromgohning ochilishi bilan samimiy tabriklab, bolalarni oromgohga qabul qilish va ular bilan ishlashish borasida oromgoh maʼmuriyatining rejalari haqida batafsil toʻxtab oʻtdi.

Taʼkidlab oʻtilganidek, oromgohda bolalarning dam olishi uchun barcha shart-sharoitlar yaratilgan. Ayniqsa, koʻrkam suv havzalari, shaxmat maydonchalari va turli yangi turdagi argʻamchoqlar ularning sevimli dam olish maskaniga aylanishi shubhasiz.

Tuman Halq taʼlimi boʻlimi mudiri Akmal Ismailov bolalarga taʼtil bekorga berilmaganligini, ushbu uzoq tanaffusdan foydalanib, bilim olish uchun kuch toʻplashlari, issiq yoz imkoniyatlaridan kelib chiqib, tanasini chiniqtirib olishishlari kerakaligini, koʻproq badiiy kitoblar oʻqib, dunyoqarishini kengaytirishlari zarurligini aytib oʻtdi.

Huquq-tartibot organlari vakillari bolalarga oromgohda xavfsizlik qoidalarga rioya qilgan holda harakatlanishlari zarurligini eslatib, zaruriy tavsiyalarini berishdi.

Ushbu oromgohda tumanimizda mavjud 87 ta maktablarning 7 yoshdan 14 yoshgacha boʻlgan oʻquvchilari qamrab olingan. Ahamiyatli jihati, oromgohda bolajonlarga tajribali shifokorlar xizmat koʻrsatishadi. Ularning salomatligi, tozaligi, orastaligi, ovqatlanish tartibi shifokorlarning doimiy eʼtiborida boʻladi. Shuningdek, dam oluvchilarning xavfsizligini taʼminlash ham doimiy nazorat qilib boriladi.

Oromgohda bolajonlarga oliy maʼlumotli, tajribali tarbiyachilar, yetakchilar jalb etilgan boʻlib, ular ham oʻquvchilarning maroqli dam  olishlariga, intellektual bilim va salohiyatlarini oshirishlariga qaratilgan turli tanlov va musobaqalar oʻtkazadilar. Mazkur oromgohda 9-avgustga qadar 500 nafar oʻquvchi dam olishi rejalashtirilgan. Ushbu vaqt mobaynida ular vaqtlarini mazmunli oʻtkazish bilan birga koʻplab doʻstlar orttiradilar.

Oromgohda haftaning har bir kuni alohida tassurotlarga boy tarzda kechadi. Yosh kitobxon, xorijiy tillar, musiqa, rasm va boshqa toʻgaraklar mashgʻulotlari orqali bolalarning bilim darajasi mustahkamlab boriladi. Oʻgʻil-qizlarning futbol, voleybol, basketbol, badiiy gimnastika, shaxmat-shashka, stol tennisi, suzish va boshqa sport turlari bilan shugʻullanishlari uchun barcha imkoniyatlar yaratilgan boʻlib, bunday shart-sharoitlar ularning sogʻlom oʻsishi, bilim va dunyoqarashini kengaytirib, ona yurtimizga, uning betakror tabiatiga mehrini yanada oshirishga xizmat qiladi.

Oʻz tengdoshlari orasida miriqib dam oluvchi bolajonlar uchun bu yilgi dam olish mavsumi bir umrga unutilmas lahzalar bilan yodda qolishi shubhasiz.

Tuman hokimligining Axborot xizmati.