YuRIDIK XIZMAT KOʻRSATILAYoTGAN TAShKILOTLAR MASʼULLARIGA SEMINAR OʻTKAZILDI

Tuman Adliya boʻlimining inson huquqlarini himoya qilish, ijtimoiy huquqni qoʻllash amaliyotini oʻrganish boʻlinmasi va Yuridik xizmat koʻrsatish markazi xodimlari tomonidan tumanimizdagi yuridik xizmat koʻrsatilayotgan 18 ta tashkilotlar masʼul xodimlariga seminar tashkil etildi.

Shu yil 20-iyun kuni tuman Davlat xizmatlari binosi majlislar zalida boʻlib oʻtgan mazkur seminarda Markaz boshligʻi Nilufar Jumaniyozova tomonidan “E-huquqshunos” tizimi orqali hujjatlar almashinuvidagi oʻzgartirishlar haqida soʻz yuritildi. Yuridik xizmat koʻrsatish markaziga yangidan qoʻshilayotgan tashkilotlarga “E-huquqshunos” tizimi orqali hujjatlar almashinuvining afzalliklari tushuntirildi.

Taʼkidlanganidek, tashkilotlarga yuridik xizmat koʻrsatish asosan “E-huquqshunos” elektron tizimidan foydalangan holda amalga oshiriladi. Elektron tizimga ichki buyruq, shartnomalar va boshqa yuridik tusdagi hujjatlarning namunalari kiritiladi hamda mavjud hujjatlar loyihalari namunalaridan erkin foydalanish mumkin. Elektron tizimdan foydalanuvchi tashkilotlar shaxsiy kabinetga kirib, har qanday hujjat loyihasi va unga tahliliy materiallarni tayyorlash, qayta ishlash va xulosa olish uchun Markazlarga yuborishlari kerak. Markazlarning masʼul xodimlari tegishli xulosa tayyorlash, hujjatlarni elektron raqamli imzo bilan tasdiqlagan holda, elektron tizimga biriktiradi hamda oʻzaro hujjat almashishni amalga oshiradi.

Elektron tizimdan foydalanuvchi tashkilotlar tomonidan Markazlardan ijobiy xulosa olinganidan soʻng, takrorlanmaydigan maxsus raqam berish va elektron tarzda qabul qilinadi hamda ushbu hujjatlar avtomatik tarzda izchil ketma-ketlikda raqamlanadi. Davlat tashkiloti faoliyatini takomillashtirish boʻyicha takliflarni tizimga biriktiradi, ularni tahrir qilib, takliflarni elektron raqamli imzo bilan tasdiqlaydi. Oʻtkazilgan targʻibot tadbirlari bilan bogʻliq materiallar ham elektron tizim orqali almashiladi.

Seminar davomida xodimlarning ishga masʼuliyatini oshirish, tizim orqali aniqlanayotgan xato va kamchiliklar toʻgʻrisida soʻz yuritildi va ularni bartaraf qilish yuzasidan takliflar berildi.

Undan tashqari, tuman Adliya boʻlimining inson huquqlarini himoya qilish, huquqni qoʻllash amaliyotini oʻrganish boʻlimi yetakchi maslahatchisi Bahrom Sobirov tomonidan Oʻzbekiston Respublikasi Vazirlar Mahkamasining 2022-yil 12-apreldagi “Yoʻl harakati qoidalari toʻgʻrisida”gi 172-son qarori mazmun-mohiyati tushuntirib berildi. Shuningdek, Oʻzbekistonda yangi tahrirdagi yoʻl harakati qoidalari tasdiqlanganligi, unga shu yil 1-maydan boshlab, amal qilina boshlanganini taʼkidlab oʻtdi. Qarorga koʻra kiritilgan oʻzgartirishlar haqida ham keng tarzdagi tushuntirishlar berib oʻtildi.

 Seminarda majburiy mehnatning taʼqiqlanishi, mehnat taʼtillarini berish tartiblari ham huquqiy tushuntirib oʻtildi. Shuningdek, seminar qatnashchilarini qiziqtirgan savollarga atroflicha, batafsil va qonuniy asoslantirilgan javoblar berildi. 

N.Jumaniyozova, tuman Adliya boʻlimi Yuridik xizmat koʻrsatish markazi boshligʻi.