DXX Raisi kubogi uchun oʻtkazilgan futbol musobaqalarida 3-oʻrinni egallagan Xolimbeg ovuli jamoasi ragʻbatlantirildi

Joriy yilning aprel oyida 16 yoshdan 30 yoshgacha boʻlgan yoshlar oʻrtasida Davlat xavfsizlik xizmati Raisi kubogi uchun futbol musobaqalariga start berilgan edi.

9-avgust kuni mazkur musobaqalarning Qoraqalpogʻiston Respublikasi bosqichida 3-oʻrinni egallagan Amudaryo tumanining Xolimbeg ovuli jamoasi bilan uchrashuv tashkil etildi.

Mahalla yoshlarini birlashtirish, boʻsh vaqtlarini koʻngilli oʻtkazish, ular orasida sportni ommalashtirish, isteʼdodli futbolchilarni kashf etish maqsadida keyingi yillarda anʼanaviy tarzda oʻtkazib kelinayotgan bu musobaqa joriy yilda ayniqsa uyushqoqlik bilan oʻtkazildi va nufuzi oshdi. Mamlakatimiz miqyosida barcha mahallalar futbolsevarlar yoshlari jamoalari ishtirokidagi bahslar mahalla, sektor, tuman, shahar, viloyatlar va Qoraqalpogʻiston Respublikasi miqyosida oʻtkazildi va mamlakat bosqichida ishtirok etadigan jamoalar aniqlandi.

Shunisi quvonchliki, yaqinda ushbu musobaqaning Qoraqalpogʻiston bosqichida faxrli 3-oʻrin uchun daʼvogar boʻlgan Taxtakoʻpir va Amudaryo tumanlari futbolchilari oʻrtasida oʻtkazilgan bahsda Amudaryo tumanining Xolimbeg ovuli yoshlari raqiblar darvozasiga 7-marta toʻp kiritib, ishonchli gʻalabaga erishdilar.

Ovulning 16 nafar yoshlaridan tuzilgan jamoa avval ham koʻpgina nufuzli musobaqalarda qatshanib, gʻolib va sovrindor boʻlib kelayotgan edi. Qoraqalpogʻiston miqyosida 424 mahallaning yosh futbolchilari orasida uchinchi oʻrinni egallash ham oson boʻlmadi. Jamoaning 16 nafar aʼzosi ham ushbu  bahsda bor iqtidorini namoyish etishga intildi, gʻolib chiqish uchun kurashdi. 7:0 hisobi bilan bahsni yakunlaganlarida charchoqni ham unutib, quvonganlaridan bir-birlarini qutladilar.

Davlat Xavfsizlik xizmati Raisi kubogi uchun oʻtkazilgan futbol musobaqasi Qoraqalpogʻiston bosqichi gʻolib va sovrindorlarini tantanali taqdirlash marosimi xolimbeglik futbolchilar uchun oʻchmas taassurotlar qoldirdi. Taniqli futbol hakami, instruktor, Oʻzbekiston futbol Federatsiyasi vitse prezidenti Ravshan Ermatov ularni bu gʻalabasi bilan qutlab, qimmatbaho sovgʻalar topshirdi, murabbiylari chuqur minnatdorchilik bildirdi.

Xolimbeg ovul fuqarolar yigʻini binosida sovrindor futbolchilar uchun tashkil etilgan tantanali tadbirda fuqarolar yigʻini raisi Zarifboy Ollamov sportchilarni erishgan gʻalabasi bilan fuqarolar yigʻini hamda ovul aholisining nomidan qizgʻin qutladi.

Ayniqsa, yakuniy bahsda raqib darvozasini bexato nishonga olgan Joʻrabek  Togʻayev, uning jamoadoshlari Abdulla Doʻschanov, Akmal Komilov, Azamat Davlatboyev, Farrux Matkarimov, Behzod Hayitboyev, Shamshiddin Oʻrozboyevlarga ovul sport sharafi yuksalishiga munosib hissa qoʻshgani uchun rahmatlar aytdi.

Yana bir eʼtirofga arzigulik maʼlumot: Davlat xavfsizlik xizmati Raisi Kubogi musobaqasining Qoraqalpogʻiston bosqichi bahslarida aynan xolimbeglik Shamshiddin Oʻrozboyev “Eng yaxshi oʻyinchi” deya eʼtirof etildi.

Yosh futbolchilarni murabbiy Yangiboy Eshimbetov, jamoa sardori Gʻafur Yangiboyevlar ham qizgʻin qutlab, kelgusi yilda ushbu anʼanaviy musobaqaning mamlakat miqyosidagi gʻolibi boʻlishini tiladilar.

Sevara Ismoilova.