Tuman Tarix va oʻlkashunoslik muzeyiga sayohat tashkil qilindi

Nogironligi boʻlgan va imkoniyati cheklangan shaxslarga avvaldan yurtimizda jamiyatning ajralmas bir qismi sifatida eʼtibor qaratib kelinadi. Ayniqsa, soʻnggi yillarda respublikamizda ijtimoiy himoyaga muhtoj aholi qatlamini har tomonlama qoʻllab-quvvatlash, jumladan, tadbirkorlik faoliyati bilan shugʻullanishlari uchun koʻmak berish borasida katta ishlar qilindi.

Prezidentimiz rahnamoligida ogʻir ijtimoiy-maishiy sharoitlarda yashovchi oilalar arzon uy-joylar bilan taʼminlanayotgani, tibbiy xizmat, turli maishiy texnikalar sotib olishida begʻaraz yordam koʻrsatilayotgani fikrimiz dalilidir.

 Oʻzbekistonda nogironligi bor shaxslarga nafaqa toʻlanayotgani, shu bilan birga, mehnat qilishlariga zarur shart-sharoitlar yaratib berilayotgani ham insonparvarlik siyosatining bir koʻrinishi, desak, ayni haqiqat boʻladi.

 Shuningdek, ular uchun grand loyihalar doirasida koʻngilochar tadbirlar, seminar-treninglar oʻtkazilishi ular ham oʻzlarini jamiyatning toʻlaqonli aʼzosi sifatida his qilishlariga hamda jamiyatning ijtimoiy-siyosiy hayotida faol boʻlishlarida yordam berib kelmoqda.

 26-avgust kuni Amudaryo tumani Nogironlar jamiyati tomonidan “Yangi Renessans ishtirokchilari” deb nomlangan grand loyihasi doirsasida imkoniyati cheklangan, nogironligi boʻlgan jamiyatimizning faol aʼzolari uchun Olmazor mahallasi hududidagi Tarixiy-oʻlkashunoslik muzeyiga sayohat tashkil qilindi.

 Sayohat davomida faxriy ustoz, mustaqil izlanuvchi tarixchi va oʻlkashunos Shavkat Chorshamov qatnashchilarga ushbu muzeyning qurilishi, muzey eksponatlari, bezak ishlari, muzey hovlisidagi zamonaviy meʼmoriy uslubdagi barcha koʻrinish va manzaralarni bunyod etish borasida amalga oshirilgan keng qamrovli ishlar va bu boradagi tuman hokimligi tomonidan koʻrsatilgan begʻaraz yordam haqida batafsil maʼlumot berdi.

Qatnashchilar muzey eksponatlarini katta qiziqish bilan tomosha qildilar.

Xususan, tumanimizning bir necha yuz yillik tarixini oʻzida aks ettiruvchi osori atiqalar, xalqimiz oʻtmishidan to bugunga qadar yetib kelgan bebaho yodgorliklar, hali ham aslini, qadr-qimmatini yoʻqotmagan turfa liboslar, turli davrlarga xos ish qurollari, roʻzgʻor buyumlari, tadbirkor ota-bobolarimiz tomonidan ishlatilgan yogʻ ishlab chiqarish juvozlari, suv haydovchi chigʻir va charxpalak, madaniy-maʼrifiy hayotni oʻzida aks ettirgan noyob qoʻlyozmalar, mangʻitlik sanʼatkorlarga tegishli qadimiy sozlar, ularda juda katta qiziqish uygʻotdi.

Imkoniyati cheklangan insonlar uchun tashkil etilayotgan bu xildagi sayohatlar, koʻngilochar tadbirlar ularga madaniy hordiq beribgina qolmasdan, tumanimiz tarixini yanada chuqur bilishga, ota-bobolarimiz yaratgan hunarmandchilik anʼanalarini oʻzida mujassam etgan kulolchilik sanʼati durdonalarini, Amu boʻyi ayollari kiygan turli davrlarga xos turfa liboslarning qadr-qimmatini yoshlarga yetkazishda muhim omil boʻlib xizmat qiladi.

Tuman hokimligining Axborot xizmati.