Yoʻllar ravon, koʻchalar yorugʻ

Mamlakatimiz mustaqillikka erishganidan soʻng barcha sohalar obodlik va bunyodkorlik sari yuz tutdi. Shahar va qishloqlarda, ovul va mahallalarda yangi obʼektlar qurilib, zamonaviy binolar qad rostlamoqda. Olib borilayotgan bunyodkorlik ishlari natijasida shahar va qishloqlarimiz tanib boʻlmas darajada oʻzgarib ketdi. Bu boradagi amalga oshirilayotgan ishlar tumanimizda ham oʻz aksini topdi. Olib borilayotgan bunyodkorlik ishlari tumanimiz aholisining ayni dilidagi orzularning ijobatidir.

Olis manzillarga tutashib ketgan yoʻllarni kuzatar ekansiz, uning ikki yonida bunyod etilayotgan zamonaviy aholi turar joylari, taʼlim muassasasi va maishiy xizmat koʻrsatish binolari eʼtiboringizni tortadi. Bularning barchasi zamonaviy shaharsozlik talablari asosida qad rostlayotgani tumanimizga oʻzgacha koʻrkamlik baxsh etmoqda.

Tumanimizning keng va ravon koʻchalari, soʻlim tabiat bagʻridagi madaniyat va istirohat bogʻi, bir-biridan hashamdor koʻp qavatli uylari bu yerga kelgan har bir kishida oʻzgacha havas uygʻotishi tabiiy.

Keyingi yillarda tumanda transport infratuzilmasini yanada yaxshilash, aholiga qulaylik yaratish hamda yoʻl-transport hodisalarining oldini olish maqsadida mahallalarda umumfoydalanuvdagi avtomobil yoʻllarini zamon talablari darajasida taʼmirlash ishlariga ham alohida eʼtibor qaratilmoqda.

Tuman boʻyicha 42,9 km yoʻlning taʼmirlanishi uchun 12 mlrd. 370 mln. soʻm miqdorda mablagʻ ajratilgan boʻlib, bugungi kunga taʼmirlash ishlari 50 foizga bajarildi. Yaʼni, 11 ta mahallada 18 km uzunlikdagi ichki yoʻllarni taʼmirlash ishlari toʻliq va sifatli qilib yakunlandi.

Bundan tashqari, yoʻllarning ikki yon tomoni koʻkalamzorlashtirilib, gul va daraxtlar ekilmoqda. Mangʻit shahrining Beruniy, Olmazor, Gulzor mahallalaridagi shohkoʻchalarda qurilgan 9 km uzunlikdagi piyodalar yoʻlakchasi va salomatlik yoʻlkachalari yoʻlovchilar va avtomashinalarning harakatlanishi uchun qoʻshimcha qulaylik yaratmoqda.

Qolaversa, Barkamol avlod, Humoyun koʻchalariga tungi yoritgich chiroqlari, velosiped yoʻlaklari qurilgani koʻchalarning yanada fayzli va koʻrkam qiyofa kasb etishida muhim omil boʻldi. 7 mlrd. 113,3 mln. soʻmlik qiymatga ega mazkur qurilish ishlari pudratchi tashkilotlar tomonidan sifatli hamda tezkor ravishda amalga oshirildi.

Ayniqsa, mustaqillik bayrami arafasida tuman Obodonlashtirish boshqarmasi tomonidan koʻchalarga qoʻshimcha ravishda tungi yoritish uskunalari, bayrogʻimiz rangidagi bezaklar va turli shakldagi yorqin chiroqlarning oʻrnatilishi yurtdoshlarimizga bayramona kayfiyat baxsh etdi.

Oʻrnatilgan tungi yoritgich chiroqlari koʻchalarni kunduz kabi yoritib turishi bilan birga, shahrimiz chiroyiga chiroy baxsh etmoqda.

Qolaversa, bu xayrli ishlar piyodalarning keng va ravon yoʻllardan, yorugʻ koʻchalardan yurib, qiynalmay manzillariga yetib borishlarida hamda aholining veloyoʻlakchalardan foydalangan holda oʻz salomatliklarini tiklashlarida muhim vosita boʻlmoqda.

Yurtimizda, xususan Amudaryo tumanida amalga oshirilayotgan bu kabi bunyodkorlik va obodonlashtirish ishlari avvalo, xalqimiz uchun munosib turmush sharoitlarini yaratishga qaratilgani bilan ahamiyatlidir.

Zamonaviy koʻrinishdagi yangi-yangi binolar, uy-joylar, tekis va ravon yoʻllar hamda yoʻlakchalarning mustaqillik bayrami arafasida foydalanishga topshirilishi esa xalqimiz uchun chinakam bayramona sovgʻa boʻldi.

Tuman hokimligining Axborot xizmati.