Xotin-qizlar faollari bilan matbuot anjumani oʻtkazildi

15-sentyabr kuni tuman hokimligining Axborot xizmati tomonidan “Hududda xotin-qizlarning ijtimoiy hayotda faolligini oshirish, ularning kasb-hunar egallashi va bandligini taʼminlash, sogʻlom ona va sogʻlom bola kontseptsiyasini amalga oshirish borasida amalga oshirilayotgan ishlar” mavzusida matbuot anjumani oʻtkazildi.

Unda tuman hokimining oʻrinbosari, Oila va xotin-qizlar boʻlimi boshligʻi Goʻzal Saburova, tuman Ichki ishlar boʻlimining Xotin-qizlar masalalari boʻyicha inspektori Inobat Oʻrazmatova, tuman hokimligining Axborot xizmati rahbari Fotima Eshimbetova hamda tumandagi 49 ta ovul va mahallalarning xotin-qizlar faollari va ommaviy axborot vositalari vakillari ishtirok etdilar.

Anjumanda “Ayollar daftari”ga kiritilgan ayollarga koʻrsatilayotgan yordam turlari, jinoyatchilikning oldini olish, ularning jamiyatdagi ijtimoiy-siyosiy faolligini oshirish borasida amalga oshirilayotgan ishlar xususida soʻz yuritildi.

Taʼkidlanganidek, shu kungacha 3-bosqich “Ayollar daftari”ga kiritilgan 3 810 nafar xotin-qizlarning 3 537 nafariga yordamlar koʻrsatilib, shundan uy-joyga muhtoj 86 nafar ehtiyojmand xotin-qizlarning 11 nafari mahalliy byudjet va homiylik hisobidan uy-joy bilan taʼminlandi va 20 nafarning ijara pullari kompensatsiya sifatida toʻlab berildi.

Shuningdek, 115 nafar ehtiyojmand xotin-qizlardan 8 nafarining uy-joyi xomiylik hisobidan taʼmirlandi va 46 nafar ayollarning uylarida taʼmirlash ishlari davom etmoqda.

Anjumanda xotin-qizlarni kasbga oʻqitish, bandligini taʼminlash, jamiyatdagi nufuzini oshirish eng dolzarb vazifalardan biri ekanligi taʼkidlandi va bu borada tumanda amalga oshirilayotgan ishlarga toʻxtalib oʻtildi.

Qayd etilishicha joriy yilning 8 oyi davomida ijtimoiy himoyaga muhtoj, ishsiz 1 208 nafar ehtiyojmand xotin-qizlardan 1 196 nafarining bandligi taʼminlandi. 907 nafar ehtiyojmand xotin-qizlarning 805 nafariga “Ayollar jamgʻarmasi” tomonidan bazaviy hisoblash miqdorining 4 barobari miqdorida bir martalik moddiy yordamlar koʻrsatildi.

Undan tashqari, ayollarning oʻz tomorqasidan unumli foydalanishlari uchun 70 nafar ayol-qizga hududdagi fermerlar biriktirilib, fermer xoʻjaliklari raxbarlari tamonidan homiylik yordamlari sifatida bugʻdoy, un, yogʻ, parranda va boshqa oziq-ovqat mahsulotlari tarqatildi.

Anjumanda ayol-qizlar orasida sodir etilayotgan huquqbuzarlik va jinoyatchilikning oldini olish boʻyicha amalga oshirilayotgan ishlar xususida tuman Ichki ishlar boʻlimining Xotin-qizlar masalalari boʻyicha inspektori Inobat Oʻrazmatovaning axboroti tinglandi.

Axborotda joriy yilning 8 oyi davomida tumandagi ayollar tomonidan sodir etilgan huquqbuzarlik va jinoyatlar hamda ularni yuzaga keltirgan sabablar xususida soʻz yuritildi.

Shuningdek, ayollar tomonidan sodir etilayotgan jinoyatlarning oldini olishda mahallalarda tashkil etilgan “Oqila ayollar harakati” aʼzolari faol boʻlishlari lozimligi taʼkidlab oʻtildi.

Anjuman yakunida jurnalistlar oʻzlarini qiziqtirgan savollar bilan murojaat qilib, tegishlicha javoblar oldilar.

Tuman hokimligining Axborot xizmati