OʻRTA QALʼA OVULIDA “KEKSALAR HAFTALIGI” DOIRASIDA QATOR TADBIRLAR OʻTKAZILDI

Oʻzbekiston Respublikasi Vazirlar Mahkamasining 2019-yil 27-sentyabrdagi “Keksa avlod vakillarining jamiyatdagi oʻrni va ijtimoiy faolligini yanada oshirish chora-tadbirlari toʻgʻrisida”gi Qaroriga asosan har yili oktyabr oyining birinchi haftasida butun mamlakatimiz miqyosida “Keksalar haftaligi”ni oʻtkazish belgilangan.

“Keksalarni eʼzozlash, ularga hurmat-ehtirom koʻrsatish xalqimizga xos ezgu fazilat” degan bosh gʻoyani oʻzida mujassam etgan “Keksalar haftaligi” Amudaryo tumanida ham koʻtarinki ruhda oʻtkazildi.

6-oktyabr kuni tumanning Oʻrta qalʼa ovuli hududida yashovchi keksa avlod vakillari – nuroniy otaxon va onaxonlar oʻz farzandlari bilan birgalikda 5 ming qadam dasturi doirasida ertalabki badantarbiya mashqlarini bajarishdi.

Tadbirda nuroniy keksalar bilan birga ularni qoʻllab-quvvatlash maqsadida yoshlarning ham faol ishtirok etayotgani nuroniy otaxon va onaxonlarga ruhiy koʻtarinkilik bagʻishladi.

Ayniqsa, butun Oʻrta qalʼaliklarning hurmatli otaxoni Yoʻldosh boboning bu kabi tadbirlar nafaqat keksalar salomatligini mustahkamlash, balki qalblarda oʻzaro hurmat, eʼtibor va ehtirom tuygʻularini uygʻotishga xizmat qilishi haqidagi fikrlari tonggi badan tarbiya mashgʻulotlari ishtirokchilarini yanada ruhlantirib yubordi.

Aytish kerakki, tumanda mazkur haftalik doirasidagi ijtimoiy-maʼrifiy tadbirlarni keksa avlod vakillariga nisbatan hurmat-ehtirom, mehr-muruvvat va saxovat tamoyillari asosida oʻtkazish maqsadida Amudaryo tumani hokimi Sultonboy Yoʻldashev boshchiligida majlis oʻtkazilib, zarur topshiriqlar berildi.

Tumanda oʻtkaziladigan ijtimoiy va maʼnaviy-maʼrifiy tadbirlar rejasi ishlab chiqilib, belgilangan jadval asosida barcha ovul va mahallalarda, jamoat tashkilotlarida nuroniylar holidan xabar olish, ularni moddiy va maʼnaviy qoʻllab-quvvatlash, hurmat-ehtirom koʻrsatish maqsadida qator tadbirlar oʻtkazildi. Haftalik doirasidagi tadbirlarning “mahallabay” amalga oshirilishi yakka-yolgʻiz, oʻzgalar parvarishiga, mehr-muruvvatiga muhtoj insonlar qalbiga quvonch bagʻishlamoqda.

Oʻrta qalʼa ovul fuqarolar yigʻini xodimlari ham oylik doirasida qator tadbirlarni tashkil qilishdi. Ovul nuroniylarining tumanimizdagi tarixiy-oʻlkashunoslik muzeyiga sayohati ham shular jumlasidandir.

Bu muzey nafaqat amu elining, balki butun qoraqalpoq xalqining buyuk va betakror tarixi haqidagi manbalarga ega boʻlgan, olis oʻtmishga sayohat qildiruvchi maskanga aylandi. Bugungi kunda ushbu maskanga faqat tumanimizdangina emas, Respublikamizning turli hududlaridan tashrif buyuruvchilar soni ortmoqda.

Sayohat davomida ovul nuroniylari tumanimiz tarixi, ota-bobolarimizning hayot tarzi bilan yaqindan tanishdilar. Muzey rahbari Shavkat Chorshamov har bir eksponatning tarixi haqida maʼlumotlar berdi.

Aytish kerakki, “Keksalar haftaligi” doirasida Oʻrta qaʼla ovul fuqarolar yigʻini masʼullari ovulga biriktirilgan shifokorlar bilan birgalikda yakka-yolgʻiz, nogironligi, bor keksalarning xonadonlarida boʻlishib, ularning yashash sharoitlari, sogʻligini koʻzdan kechirishdi, muammolarini oʻrganib, ijobiy hal etish boʻyicha chora-tadbirlar ishlab chiqishdi.

Ovulning Nonvoyqalʼa mavzesida yashovchi 1934-yilda tugʻilgan Tursun momo Tojimurodova umr boʻyi oʻz fidoyi mehnati bilan el-yurt farovonligiga munosib hissa qoʻshgan onaxonlardan biridir. “Keksalar haftaligi” doirasida ovul masʼullari Tursun momo Tajimurodovaning xonadonida boʻlishdi va momoning sogʻligi shifokorlar koʻrigidan oʻtkazildi.

Haftalik doirasidagi bu kabi mehr-muruvvat, keksa avlodga ehtirom koʻrsatish tadbirlari deyarli har kuni amalga oshirildi.

“Keksalar haftaligi” doirasida amalga oshirilayotgan barcha tadbirlarda ovulda istiqomat qiluvchi mehnat faxriylari, keksalar va shu barobarida yoshlar ham faol ishtirok etishdilar.

Robiya YOʻLDOShEVA.