QILIChBOYDA NURONIYLAR VA QIShLOQ AYoLLARI UChUN TADBIR OʻTKAZILDI

Yoshi ulugʻ insonlarga hurmat-ehtirom koʻrsatish, ularning Vatanimiz ravnaqi yoʻlida qilgan fidoyi mehnatlarini eʼtirof etish, yoshlarni ularning ulkan hayotiy tajribalaridan oʻrnak olishga ruhlantirish maqsadida mamlakatimizda keng miqyosli chora-tadbirlar amalga oshirilmoqda. Har yili oktyabr oyining birinchi haftasida “Keksalar haftaligi” oʻtkazib kelinayotgani ham shu maqsadga qaratilgan.

Joriy yilning 3-9-oktyabr kunlarida ham har yilgi anʼanaga muvofiq “Keksalarni eʼzozlash ularga hurmat-ehtirom koʻrsatish – xalqimizga xos fazilat” gʻoyasi ostida keksa avlod vakillarini ijtimoiy himoya qilish, ularga eʼtibor va gʻamxoʻrlikni kuchaytirish, turmush sharoitlarini yaxshilash, faol va mazmunli hayot kechirishlarini taʼminlash, boy hayotiy tajribalaridan yosh avlod tarbiyasida unumli foydalanish maqsadida “Keksalar haftaligi” uyushqoqlik bilan oʻtkazildi.

Yaqinda Qilichboy ovulidagi “Temur-Anvara” toʻyxonasida ovul va ovul tarkibidagi mahallalarda istiqomat qiluvchi yurtimiz fayzi, xonadonlar koʻrki hisoblanmish yoshi ulugʻ nuroniy otaxon, onaxonlar uchun toʻkin dasturxon yozildi. Aziz mehmonlarni ovul fuqarolar yigʻini raisi Bahrom Qodirov haftalik bilan qutlab, yoshi ulugʻ insonlarga hurmat ehtirom koʻrsatish, ularni qadrlash bizning asriy urf-odatlarimiz, milliy qadriyatlarimiz va yashash tarzimizdan chuqur joy olganini taʼkidladi, ularga uzoq umr, sihat-salomatlik tiladi.

Ushbu davraga 15-oktyabr – Xalqaro ayollar kuni munosabati bilan ovul, ovul tarkibidagi mahallalarda istiqomat qiluvchi 52 nafar faol, turli sohalarda faoliyat yuritib, yutuqlarga erishgan, munosib oʻgʻil-qizlarni tarbiyalab voyaga yetkazgan, elda eʼzoz topgan ayollar ham taklif etildi.

Oʻziga xos fayz kashf etgan tadbirda tuman hokimi oʻrinbosari Goʻzal Soburova, “Mahalla va nuroniylarni qoʻllab-quvvatlash boʻlimi” boshligʻi Gʻulomjon Duysenboyevlar ham ishtirok etdilar va nuroniylarni “Keksalar haftaligi”, ayollarni 15-oktyabr – Xalqaro qishloq ayollari kuni bilan qizgʻin qutlab, ularga sogʻ-salomat boʻlib uzoq umr koʻrishini tiladilar. Shu kuni tadbirga taklif etilgan 52 nafar ayollarga ovul fuqarolar yigʻini nomidan sovgʻalar taqdim etildi.

Shu oʻrinda taʼkidlash joizki 2019-yildan buyon “Xalqaro qishloq ayollari kuni” nishonlab kelinmoqda.

Sana munosabati bilan va “Keksalar haftaligi” doirasida Qilichboy ovulida oʻtkazilgan tadbirda ayollar va nuroniylarga xalqimizning sevimli milliy taomi – palov tortildi.

Qilichboy Madaniyat markazi va tumanimizning taniqli sanʼatkorlari dilrabo kuy-qoʻshiqlari bilan davraga yana ham joʻshqin kayfiyat va fayz kiritdi. Azal-azaldan hududda yashab, qishloq xoʻjaligi, turli sohalarda mehnat qilib, keksalik yoshiga yetgan nuroniylar, qishloq ayollari tadbir bahona diydorlashib, dildan suhbatlar qurdilar, koʻngillari yayradi.

Mehmonlar ularni qadrlab, hurmatlab shunday davra tashkil etgan ovul fuqarolar yigʻini masʼullariga minnatdorchilik bildirdilar.

Oygul RAJABOVA.