Yoshlar muammolari tuman hokimining doimiy eʼtiborida

Mamlakatimizda yosh avlodni har tomonlama qoʻllab-quvvatlash, isteʼdod va qobiliyatini roʻyobga chiqarishga koʻmaklashish maqsadida tizimli ishlar amalga oshirilmoqda.

Shuningdek, yoshlarning muammolari tegishli korxona, tashkilot mutasaddilari tomonidan joyida hal qilinib, murojaat egalariga amaliy yordamlar koʻrsatilib kelinmoqda. Bu boradagi ishlarni tashkil etishda muntazam ravishda oʻtkazilib kelinayotgan “Hokim va yoshlar uchrashuvlari” muhim ahamiyat kasb etmoqda.

13-oktyabr kuni Amudaryo tumanining Uyshin madaniyat markazida tuman hokimining yoshlar bilan navbatdagi uchrashuvi boʻlib oʻtdi.

Unda tuman hokimi Sultonboy Yoʻldashev, tuman Xalq qabulxonasi boʻlimi mudiri Erkin Rajabov, hokim oʻrinbosari Mahmud Shermetov hamda tegishli tashkilot masʼullari ishtirok etishdi.

Uchrashuvda tuman Xalq qabulxonasi boʻlimi mudiri Erkin Rajabov yurtimizda faol, aniq maqsadiga ega, tadbirli, bilimdon yigit-qizlarni qoʻllab-quvvatlash davlat siyotining yetakchi maqsadiga aylanligini taʼkidlab, bu boradagi tadbirlarni samarali amalga oshirish, har bir yosh bilan alohida ishlab, ularning muammolariga yechim topish, katta hayotga dadil qadam qoʻyishlarida qanot boʻlishini aytib oʻtdi.

Shundan soʻng, tuman hokimi Sultonboy Yoʻldashev yoshlarga yaratilayotgan imkoniyatlar xususida toʻxtalib oʻtdi. Jumladan, Oʻzbekiston Respublikasi Prezidentining 2022-yil 31-avgust kungi “Qoraqalpogʻiston Recpublikasida tadbirkorlik, innovatsion texnologiyalar va infratuzilmalarni jadal surʼatlarda rivojlantirish orqali aholi farovonligini oshirishning qoʻshimcha chora-tadbirlari toʻgʻrisida”gi Farmonida tadbirkorlarga berilayotgan imtiyozlar, oilaviy tadbirkorlikni rivojlantirish dasturlari doirasida yaratilayotgan yengilliklar, shuningdek, oliy taʼlim muassasalariga qabul uchun ajratilgan qoʻshimcha kvotalar haqida batafsil maʼlumot berdi.

Shundan soʻng, yoshlarning taklif va muammolaridan iborat murojaatlari tinglandi. Uyshin mahallasida istiqomat qiluvchi yoshlardan biri Nabijon Jumamuratov hamda Matluba Yangiboyeva kontrakt toʻlovi qoplab berilishi boʻyicha murojaat qildilar. Murojaat egalarining oilaviy sharoitlari shu yering oʻzida oʻrganib chiqilib, muammo ijobiy hal qilinadigan boʻldi.

Undan tashqari, mahallaning faol yoshlaridan Dildora Tileumuratova tikuvchilik kasbining sir-asrorlarini qunt bilan oʻrganganligini, bugungi kunda bir nechta shogirdlari borligini, ammo tikuvchilik tsexi ochish uchun aholi zich tarzda joylashgan yerdan qulay bino topa olmayotganligini aytib, tuman hokimiga murojaat qildi. Ushbu murojaat ham joyida oʻrganib chiqilib ijobiy hal qilinadigan boʻldi.

Hozirgi kunda yoshlarga oid amalga oshirilayotgan islohotlarning oʻzi davlat tashkilotlari oldiga yangi-yangi vazifalarni qoʻymoqda. Zero, oldimizga qoʻyilayotgan vazifalar zamirida elu yurtimizning tinchligi va osoyishtaligini mustahkamlash, xalqimiz, xususan, qishloqlarda istiqomat qiluvchi yoshlarning bandligini taʼminlash, hech kimdan kam boʻlmagan barkamol avlodni tarbiyalashdek ezgu niyatlar mujassam.

Tuman hokimligining Axborot xizmati.