FAVQULODDA VAZIYaTLARNING OLDINI OLIShGA BAGʻIShLANGAN YIGʻILISh OʻTKAZILDI

Joriy yilning 14-noyabr sanasida Amudaryo tuman hokimligi binosida Favqulodda vaziyatlarning oldini olishga bagʻishlangan yigʻilish boʻlib oʻtdi.

Yigʻilishda Favqulodda vaziyatlarning oldini olish va ularni bartaraf etish boʻyicha hududiy komissiyasi aʼzolari, kun tartibidagi masalalarga aloqador idoralar, korxona hamda tashkilotlarning rahbarlari, tuman hokimining oʻrinbosari Nodirbek Kamolov, tuman Favqulodda vaziyatlar boʻlimi boshligʻi oʻrinbosari Salomat Berdekeyev, boʻlinma boshligʻi Behzod Tojiboyevlar, shuningdek sohaga aloqador tashkilotlarning masʼul mutaxassislari ishtirok etishdi.

 Yigʻilishda Favqulodda vaziyatlarning oldini olish va ularni bartaraf etish boʻyicha Hukumat komissiyasining 2022-yil 10-noyabrdagi 49-sonli bayoni va Qoraqalpogʻiston Respublikasi Vazirlar Kengashining 11-noyabrdagi 596-sonli bayoni ijrosini taʼminlash, shuningdek, 2022-yil 15-noyabrdan 15-dekabrgacha “Yongʻin xavfsizligi oyligi”ni oʻtkazish haqidagi masala muhokama etildi.

Sohada amalga oshirilgan chora-tadbirlar natijasida tumanda 2022-yilning oʻtgan davri mobaynida iqtisodiyot tarmoqlari, ijtimoiy soha obʼektlari hamda uy-joy fondida yongʻin xavfsizligini taʼminlash borasida qator tizimli ishlar amalga oshirildi.

Jumladan, yongʻinlarning oldini olish yoʻnalishida roʻyhatga olingan obʼektlarda rejali va nazorat tartibidagi tekshirishlar, tadbirkorlik subʼektlariga tegishli obʼektlarda yongʻinga qarshi profilaktika koʻriklari oʻtkazildi. Yakka tartibdagi uy-joylar, koʻp xonadonli uylarning yongʻinga qarshi holati tekshirildi. Yongʻin xavfsizligini targʻib qilish boʻyicha fuqarolar bilan suhbatlar oʻtkazilib, yoʻl-yoʻriqlar berildi.

Amalga oshirilgan ijobiy ishlarga qaramasdan joriy yilning 10 oyi davomida tumanning turli hududlarida 43 ta yongʻin sodir boʻlib, yongʻin oqibatida kuyish va tan jarohati olganlar, oʻlim holatlari boʻlmasa-da, Boyovul, Toryop va Oʻzbekiston mahallalarida hamda Jumurtov shaharchasi, Kuyuk koʻpir, Qilichboy, Qipchoq ovullarida yongʻin sodir boʻlish holatlari koʻpaygan.

Tahlillarga koʻra, yongʻinlarning 81 foizi aholi turar joylarida sodir boʻlgan hamda aksariyati tabiiy gazga moʻljallangan hamda elektr isitish jihozlaridan notoʻgʻri foydalanish oqibatida yuz bergan.

Yigʻilishda masʼullar tomonidan joylardagi yongʻinlar boʻyicha mavjud holatni inobatga olib, ayrim favqulodda vaziyatlarning oldini olish va ularni bartaraf etish boʻyicha hududiy komissiyalari tomonidan iqtisodiyot tarmoqlari va ijtimoiy soha obʼektlari hamda uy-joy fondida yongʻinlarning oldini olish masalalariga yetarli eʼtibor qaratilmayotganligi taʼkidlab oʻtildi.

Shuningdek, yigʻilishda yongʻinlarning oldini olish sohasida amalga oshirilayotgan chora-tadbirlar yuzasidan mutasaddi idoralar rahbarlarining hisobotlari ham tinglandi, dolzarb muammolar va yoʻl qoʻyilayotgan kamchiliklar batafsil tahlil va muhokama qilindi.

Yigʻilish yakunida belgilangan topshiriqlar ijrosini taʼminlash, iqtisodiyot tarmoqlari va ijtimoiy soha obʼektlari hamda uy-joy fondida yongʻinlarning oldini olish, shuningdek, ushbu sohada mavjud muammolarni bartaraf etish maqsadida, hududiy komissiya tomonidan tuman hududida 2022-yil 15-noyabrdan 15-dekabrgacha “Yongʻin xavfsizligi oyligi”ni oʻtkazish toʻgʻrisida qaror qabul qilinib, mazkur oylikni tashkil etish va samarali oʻtkazish boʻyicha hududiy komissiyasi tarkibi va amalga oshiriladigan chora-tadbirlar rejasi tasdiqlab olindi.

Robiya YOʻLDOShEVA.