SABR-U ChIDAM BILAN
Men 1962-yilning noyabr oyidan 1965-yilning noyabr oyigacha, uch yil sobiq sovet armiyasi safida xizmat qilganman. Uch yil ota-onangdan, tugʻilib-oʻsgan yurtingdan uzoqda boʻlish oson emasligini tengdoshlarimiz yaxshi bilishadi. 70-yillarda armiya xizmati uch yildan ikki yilga tushirildi. Hozir esa bir yil.
Bizlar harbiy xizmatga chaqirilgan davrimizda iloji boricha koʻpchilik harbiy xizmatdan qolishga harakat qilishardi. Oʻtgan asrning 64-65-yillarida esa oliy oʻquv yurtida oʻqiyotganlar, bitirganlar ham harbiy xizmatga chaqirila boshlandi.
Xoʻsh, hozir qanday? Armiya yoshidagi yoshlarimizga havas qilsak arziydi. Negaki, ular hozir bir yil oʻz Vatanida xizmat qiladi. Shu bilan birgalikda ancha imtiyozlarga ega boʻlishadi. Avvallari bunday imtiyozlar yoʻq edi.
Harbiy qismlarda turli millat vakillari xizmat qilishardi. Natijada oʻzaro kelishmovchilik, tortishuv, oʻzidan boshqa millatni mensimaslik holatlari ham uchrab turardi. Men xizmat qilgan qism temir yoʻldan 15-20 chaqirim uzoqlikda, qalin oʻrmon ichida joylashgandi. Qismimizga temir yoʻl orqali turli qurilish mollari kelardi, ularni esa kechiktirmay vagonlardan tushirish lozim edi. Shu boisdan ham temir yoʻl stantsiyasida navbatchilik qilardik. Bir kuni yarim tunda yuk keldi. Navbatchilar boshligʻi rus millatiga mansub zobit edi. Yarim kecha boʻlishiga qaramay, u meni qismga xabar berish uchun yubordi. Bunga 60-yilcha vaqt oʻtgan boʻlsayam, u kun tez-tez yodimga tushib turadi.
Zobit buyrugʻini bajarish askar uchun qonun. Xullas, yarim tunda oʻrmon ichidan qismga yayov bir oʻzim yetib borganman.
Yuk kelganligi haqidagi xabarni qism rahbariyatiga ertalab yetkazsa ham boʻlardi. Xolbuki, buni zobitimiz tushunishni istamadi va meni – oʻzbek millatiga mansub askarni ayash haqida oʻylagisi ham kelmadi. Biz ana shunday bosimlar ostida xizmat qilganmiz.
Darhaqiqat, bizlar uch yil barcha qiyinchiliklarga bardosh berib, sabr-u chidam bilan xizmat qildik. Natijada boshqa orzularimizga uch yil kechikib yetishganmiz.
S.XOʻJANIYoZOV, faxriy jurnalist, sobiq askar.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
