IShChI GURUH “YaShIL MAKON” UMUMMILLIY LOYIHASI DOIRASIDA AMALGA OShIRILAYoTGAN IShLAR BILAN TANIShDI

2021-yilning 2-noyabr kuni davlatimiz rahbari tomonidan oʻtkazilgan videoselektor yigʻilishida “Yashil makon” umummilliy loyihasini amalga oshirish, mazkur loyiha doirasida mamlakat boʻyicha yiliga 200 million tup daraxtlar va butalar koʻchatlarini ekish belgilangan edi. Loyihadan koʻzlangan maqsad respublika hududida yashil maydonlar hududini koʻpaytirishdir. Loyihani amalga oshirish boʻyicha qabul qilingan “Respublikada koʻkalamzorlashtirish ishlarini jonlantirish, daraxtlar muhozafasini yanada samarali tashkil etish chora-tadbirlari toʻgʻrisida”gi Prezident Farmoni esa daraxtlarni ekish va parvarish qilish sohasidagi, hududlarning tuproq-iqlim va boshqa xususiyatlarini aniqlashga qaratilgan tadqiqot va tahlillarni oʻtkazish shu asosda ekiladigan koʻchatlarni tanlash, koʻchatxonalarni koʻpaytirish sohasidagi vazifalar belgilab berilgan.

Amudaryo tumanida ham loyiha doirasida hududimiz iqlim sharoitiga mos mevali va manzarali daraxtlar koʻchatlari, gul va butalar koʻchatlari ekish, parvarishlar borasida muayyan ishlar amalga oshirilmoqda.

Xalq deputatlari tuman Kengashining tegishli qaroriga asosan 2022-yil kuz mavsumida loyiha doirasidagi koʻchat ekish ishlariga jami 500 million soʻm pul mablagʻi ajratilgan. Tuman Obodonlashtirish boshqarmasi tomonidan 320 million, tuman Xalq taʼlimi boʻlimiga qarashli muassasalar tomonidan 100 million, tuman Maktabgacha boʻlim tomonidan 80 million soʻmlik koʻchatlar ekilgan.

Shuningdek, joriy yilning bahorida tumanimiz hududiga 770 ming dona mevali va manzarali daraxtlar, butalar, gullar koʻchatlarini ekish rejashtirilgan. Shuning 8 ming tupi umumfoydalanishdagi yoʻllar boʻylariga, 48 ming tupi qishloq xoʻjaligi yerlarida ihota daraxtzorlar barpo etiladigan yerlarga, 210 ming tupi fermer xoʻjaliklarining ekin maydonlari chetlariga, qolganlari taʼlim, sogʻliqni saqlash va boshqada muassasalar, idoralar atroflariga ekilishi belgilangan.

Bu boradagi ishlarning borishi bilan tanishish maqsadida Qoraqalpogʻiston Respublikasi Joʻqorgʻi Kengesida tuzilgan ishchi guruh tumanimizga tashrif buyurdi.

Ishchi guruh aʼzolari dastlab tumandagi umumfoydalanishdagi yoʻllar chetlariga, korxona-tashkilotlar hududlariga ekilgan mevali, manzarali daraxtlarning oʻsishi, muhofaza qilinishi, sugʻorish tizimlarining yoʻlga qoʻyilishi ahvoli bilan tanishdilar.

Keyingi manzil Qipchoq davlat oʻrmon xoʻjaligida bunyod etilayotgan yashil maydonlar boʻldi. Ishchi guruh aʼzolari xoʻjalikda oʻtgan yillarda ekilgan daraxtlar koʻchatlarining holati bilan tanishdilar. Keyin xoʻjalik koʻchatxonasida koʻchat yetishtirish ishlarining borishi bilan qiziqdilar.

Eʼtirof etish joizki, mazkur xoʻjalikda tumanimizda yashil maydonlarni koʻpaytirish uchun ochiq va issiqxona sharoitida koʻchat yetishtirish yoʻlga qoʻyilgan. Jiyda, tut, terak, qayrogʻoch, archa va boshqada koʻpgina daraxtlarning hamda koʻpyillik gullarning koʻchatlari mazkur xoʻjalik koʻchatxonalarida yetishtirilayapti.

Hozirgi kunda tumanimiz hududida iqlim sharoitimizga mos virgin archasi, sharq tuyasi, yapon saforasi, katalpa, shumtol, jiyda, tut, zarang, akatsiya, terak, yongʻoq, uzum qalamchalarini ekish ishlari boshlanib ketdi.

Ishchi guruh aʼzolari tumanimizda “Yashil makon” umummilliy loyihasi doirasida amalga oshirilayotgan ishlarga yuqori baho berdilar.

Oygul RAJABOVA.