BAYRAM MUNOSABATI BILAN YoShI ULUGʻ ONAXONLAR HOLIDAN XABAR OLINIB, SOVGʻALAR ULAShILDI

Ayol azaldan mehr-shavqat, vafo va sadoqat timsoli boʻlib kelgan. Ayol bu eng avvalo moʻʼtabar onadir. Ayol soʻzini eshitishimiz bilan koʻz oʻngimizda ulugʻ va tabarruk onajonlarimiz gavdalanadi. Har bir inson hayotning siru-asrorlari va saboqlari, ezgulik va yaxshilik, pastu-balandini mehru-saxovatli onalardan oʻrganadi. Shu bois bayramlar arafasida keksalik gashtini surayotgan ulugʻ yoshdagi tabarruk onaxonlarga ehtirom koʻrsatish ezgu anʼanaga aylangan.

8-mart – Xalqaro xotin-qizlar bayrami arafasida ham amudaryolik yoshi ulugʻ, umri mehnat maydonlarida oʻtgan va jamiyatga nafi tegadigan oʻgʻil-qizlar oʻstirib, hozirgi kunda esa yoshlarga hayot maktabidan saboq berib kelayotgan aziz onaxonlar holidan xabar olinib, bayram sovgʻalari ulashildi. Bayram bilan tabriklab kelgan masʼullar onaxonlar bilan dildan suhbat qurib, ularga koʻtarinki va bayramona kayfiyat baxsh etishdi.

Tuman hokimi oʻrinbosari, Oila va xotin-qizlar boʻlimi boshligʻi Goʻzal Soburova hamda fuqarolar yigʻini masʼullari Doʻstlik mahallasida istiqomat qiluvchi 90 yoshga yaqinlashgan Oʻrolxon momo Shomurodovani yoʻqlab, uning xonadoniga tashrif buyurdi. Farzandlari, nevaralari va chevaralariga bosh boʻlib kelayotgan onaxon Ikkinchi jahon urushi yillarida front ortida jonbozlik koʻrsatib, fidokorona mehnat qilgan. Oʻrolxon momo bugungi kunda nevara-chevaralar davrasida duogoʻy va maslahatgoʻydir. Tuman hokimi oʻrinbosari Oʻrolxon momo bilan suhbatlashib, 8-mart – Xalqaro xotin-qizlar bayrami bilan qizgʻin tabrikladi. Tabarruk momoning duolarini oldi va unga sovgʻa-salomlar topshirdi.

Shundan soʻng, Oila va xotin-qizlar boʻlimi boshligʻi Goʻzal Soburova hamda Kuyukkoʻpir ovul fuqarolar yigʻini masʼullari shu hududda yashovchi nuroniy onaxon Sharifa momo Boboniyozovaning xonadoniga tashrif buyurishdi. Ushbu tashrifdan boshi koʻkka yetgan onaxon mehmonlar bilan miriqib suhbatlashdi. Oʻzining ogʻir davrlarda kechgan zahmatli bolalik va yoshlik yillari, paxta dalalarida oʻtgan hayoti, avvalgi va hozirgi sharoitlar, imkoniyatlar haqida soʻzladi. Yoshlarga oʻgit-nasihatlar berib, mana shunday aziz va tabarruk zaminda, ayolini boshida tojdek koʻtargan Vatanda yashayotgani uchun shukronalar aytib duolar qildi. Bayramga bagʻishlangan laparlari, xalq qoʻshiqlaridan kuyladi, sheʼrlar aytdi. Masʼullarning tashrifidan onaxonning koʻngli togʻdek koʻtarilib, kayfiyati chogʻ boʻldi.

Masʼullar Choykoʻl ovulidagi 100 yoshdan oshgan nuroniy Xadicha momo Bekanova holidan ham xabar olishdi. Butun amu elining tabarruk onaxoni boʻlgan Xadicha Bekanova Ikkinchi jahon urushi davrida front orqasidagi mehnat maydonlarida zahmat chekkan. Umrini el xizmati, farzandlar tarbiyasiga bagʻishlagan ushbu onaxon ham bugungi dorilomon kunlarda yashayotganidan baxtli ekanini aytdi. Tinch va osoyishta yurtimizning yanada taraqqiy etishi, dasturxonlarimiz toʻkin-sochinligi va turmushimiz farovonligini Yaratgandan soʻrab duolar qildi. Bayram arafasida yoʻqlab kelishgani va berilgan sovgʻalar uchun masʼullarga minnatdorchilik bildirib, katta rahmat aytdi.

Nuroniy onaxonlar bayram arafasidagi ushbu yoʻqlovlar, oʻzlariga koʻrsatilgan mehr va gʻamxoʻrlikdan koʻngillari togʻdek koʻtarilib, nihoyatda mamnun boʻldilar.

Ozoda Xudoyberganova.