FUQARO MUHOFAZASI KUNI MUNOSABATI BILAN AMALIY MAXSUS-TAKTIK OʻQUV MAShQI TAShKIL ETILDI

Amudaryo tumani hududida 1-mart kunidan 1-aprelga qadar “Favqulodda vaziyatlardan muhofaza qilish va fuqaro muhofazasi oyligi” deb eʼlon qilingan boʻlib, oylik doirasidagi tadbirlar davom etmoqda. Oylik doirasida joylarda amaliy maxsus-taktik oʻquv mashqi va targʻibot tadbirlari oʻtkazilmoqda.

Joriy yilning 11-mart kuni tumandagi 1-sonli maktabda “Fuqaro muhofazasi kuni” mavzusida boʻlib oʻtgan amaliy maxsus-taktik oʻquv mashqida tuman Favqulodda vaziyatlar boʻlimi xodimlari Bekzod Tajiboyev, Bekzod Allabergenov hamda Sanitariya epidemiologiya osoyishtalik va jamoatchilik salomatligi boʻlimi sanitariya shifokori Munavvar Koshkarovalar qatnashishdi. Shuningdek, maktab direktori Dilrabo Sherboyeva, Chaqiriqqa qadar boshlangʻich tayyorgarlik rahbari Xurshid Ishniyazov va maktab oʻquvchilari ishtirok etishdi.

Tuman fuqaro muhofazasi xizmatlarining hamkorlikdagi harakatlarini takomillashtirish, ularning kechiktirib boʻlmaydigan avariya va qutqaruv ishlariga tayyorgarligini kuchaytirish hamda favqulodda vaziyatlar yuzaga kelganda oʻz majburiyatlarini aniq, toʻgʻri bajarishini amaliyotda sinash va oʻrganish kabi maqsadlar koʻzlangan ushbu maxsus-taktik oʻquv-mashqi ikki bosqichda oʻtkazildi.

Oʻquv mashqining birinchi bosqichi, yaʼni nazariy qismida 1-sonli maktabda “Maktabda yuzaga kelishi mumkin boʻlgan favqulodda vaziyatlarda fuqaro muhofazasi guruhlari va maktab rahbariyatining harakatlari” mavzusida tushunchalar berildi. Oʻquvchilarga tabiiy va texnogen tusdagi favqulodda vaziyatlar yuzaga kelganda evakuatsiya chiqish yoʻllarida toʻgʻri harakat qilish koʻrsatib berilib, koʻnikmalar shakllantirildi. Shundan soʻng, ular guruhlarga boʻlingan holda maktab hovlisiga olib chiqildi.

Ikkinchi bosqichda esa maktab binosida favqulodda avariya holati sodir boʻlishi natijasida maktab fuqaro muhofazasi guruhlari, tuman Yongʻin-qutqaruv qismlarining hamda tez tibbiy yordamning jabrlanganlarni qutqarish va ularga birinchi tibbiy yordam koʻrsatish kabilarni bajarish ishlari amalda koʻrsatib berildi. Jabrlangan fuqarolarga tezda birinchi yordam koʻrsatish tartibi amaliy bajarib koʻrsatildi.

Oʻquv mashqiga maktab rahbarlar tarkibi va fuqaro muhofazasi tuzilmasidan 32 nafar oʻquvchi, tuman Favqulodda vaziyatlar boʻlimidan 7 nafar xodim va 1 ta maxsus texnika, Tez tibbiy yordam boʻlimidan 3 nafar xodim va 1 ta maxsus texnika jalb etildi. Tadbir yakunida 1-sonli maktabning rahbarlar tarkibi va fuqaro muhofazasi tuzilmalari guruhlari shaxsiy tarkibi favqulodda vaziyatlarda harakat qilishga «Cheklangan tayyor» deb baholandi. Shuningdek, ishtirokchilarning kamchiliklari koʻrsatilib, kelgusida bunday kamchiliklarga yoʻl qoʻymaslik kerakligi tushuntirildi.

Shu kuni tuman Favqulodda vaziyatlar boʻlimi xodimlari “Favqulodda vaziyatlarning oldini olish va fuqaro muhofazasi” oyligi doirasida Navoiy nomli mahalladagi yangi tugʻruq kompleksi binosida qurilish ishlarini olib borayotgan “Temir Beton” masʼuliyati cheklangan jamiyati ishchilariga tushuntirish-targʻibot ishlarini oʻtkazishdi.

Ushbu yangi tugʻruq kompleksi binosining qurilish loyihasi “Paytaxt mega proyekt” masʼuliyati cheklangan jamiyati tomonidan ishlab chiqilgan. Loyihada yongʻindan va tutundan xabar beruvchi signalizatsiyalarni oʻrnatish koʻrsatilgan. Hozirgi kunda bitish arafasida turgan ushbu binoda yongʻinga qarshi suv taʼminoti, yaʼni 50 metr kubli 2 ta usti yopiq suv saqlagichlar qurib bitkazilgan. Fasad qismiga yonmaydigan mahsulotlar bilan ishlov berilgan.

Bino 4 qavatli boʻlib, unda 1 dona isitish qozonxonasi, 3 ta zinapoya mavjud. Loyihada 1 dona lift ham koʻrsatilgan boʻlib, binoning umumiy maydoni 1217,3 metr kvadratga teng. Hozirgi kunda qurilish ishlari qizgʻin pallada davom etmoqda.

Targʻibot tadbiri davomida ushbu qurilish ishlarida qatnashayotgan ishchi-xodimlarga texnika xavfsizligi, fuqaro muhofazasi boʻyicha tushunchalar berilib, eslatmalar ham tarqatildi.

S.Bedekeyev, tuman FVB boshligʻi oʻrinbosari.