REFERENDUMDA FAOL IShTIROK ETISh – BARChAMIZNING FUQAROLIK BURChIMIZ

Shu kunlarda yurtimizda muhim siyosiy jarayon – 30-aprel kuni boʻlib oʻtadigan umumxalq referendumiga tayyorgarlik ishlari qizgʻin kechmoqda. Ushbu referendumda Oʻzbekiston Respublikasi Oliy Majlisining Qonunchilik palatasi tomonidan qabul qilingan yangi tahrirdagi Konstitutsiya toʻgʻrisidagi Qonun ovozga qoʻyiladi.

Yangilangan Konstitutsiya jamiyatimiz hayotining barcha yoʻnalishlarini isloh qilish, mamlakatimizni demokratik rivojlantirish yoʻlida eng muhim huquqiy poydevor boʻlib xizmat qiladi. Konstitutsiyaviy Qonun loyihasiga kiritilgan yangi normalar barcha sohalarni taraqqiy ettirishga, shu jumladan, davlat hokimiyatining yanada samarali tashkil qilinishiga yordam beradi. Ushbu loyihani ishlab chiqishda keng jamoatchilik, siyosiy partiyalar, jamoat tashkilotlari, ekspertlik va ilmiy doiralar vakillari, ziyolilar faol ishtirok etgan. Umumxalq muhokamalarida 220 mingdan ziyod takliflar kelib tushgan. Loyihada ushbu takliflar eʼtiborga olingan. Shunga koʻra, yangilanayotgan Konstitutsiya tom maʼnoda xalq Konstitutsiyasi deb eʼtirof etilmoqda. 

Har bir saylovchining ovozi mamlakat kelajagi, xalqimizning baxtli hayotini taʼminlashda muhim ahamiyatga ega. Shu sababli, barcha yurtdoshlarimizni 30-aprel kuni boʻlib oʻtadigan referendumda faol ishtirok etgan holda, oʻz fuqarolik burchini bajarib, kelajagimiz uchun ovoz berishga chaqiraman.

Muyassar Rahmatullayeva,

Xalq deputatlari tuman Kengashi deputati.