Mahallalar infratuzilmasini yaxshilash yoʻlida

Prezidentimiz tomonidan shu yilning 31-avgustida imzolagan “Qoraqalpogʻiston Recpublikasida tadbirkorlik, innovatsion texnologiyalar va infratuzilmalarni jadal surʼatlarda rivojlantirish orqali aholi farovonligini oshirishning qoʻshimcha chora-tadbirlari toʻgʻrisida”gi farmoni bilan Qoraqalpogʻistonni rivojlantirishning yangi dasturi belgilab berildi. Ushbu farmonlar asosida Respublikamizda keng koʻlamli invistitsion loyihalar amalga oshirilib, qurilish ishlari olib borilmoqda, yangidan yangi tadbirkorlik subʼektlari ishga tushirilmoqda.

Prezidentimiz respublikadagi mahallalar infratuzilmasini yanada yaxshilash, aholining turmush sharoitini yuqori darajaga koʻtarish maqsadida aniq belgilangan chora-tadbirlarni belgilab berdilar.

Shu maqsadda 2022-yil 6-sentyabr kuni Oʻzbekiston Respublikasi Vazirlar Mahkamasining “Qoraqalpogʻiston Respublikasi hududlarini ijtimoiy-iqtisodiy rivojlantirish, qulay biznes muhitini yaratish, innovatsion texnologiyalarini joriy etish va infratuzilmalar bilan taʼminlanganlik darajasini yanada yaxshilash orqali aholi farovonligini oshirishning qoʻshimcha chora-tadbirlari toʻgʻrisida”gi qarori qabul qilindi.

Ushbu qaror ijrosini taʼminlash maqsadida Amudaryo tumanida jami 24 km uzunlikdagi ichki xoʻjalik yoʻllarini taʼmirlash rejalashtirilgan boʻlsada, tuman Obodonlashtirish boshqarmasi qoʻshimcha ravishda yana 13 km yoʻlni ortigʻi bilan taʼmirlashni reja qilgan. Aniqroq aytganda, endilikda tumanda jami 37 km ichki xoʻjalik yoʻllari taʼmirlanadi. Buning uchun davlat byudjetidan 2 mlrd. 964 mln soʻm mablagʻ ajratilgan.

Aytish kerakki, Oʻzbekiston Respublikasi Vazirlar Mahkamasi tomonidan ushbu qarorning qabul qilinishi orqali Qoraqalpogʻistondagi mahallalar infratuzilmasini rivojlantirishning asosiy parametrlari va moliyaviy masalalari yechib berildi. Aholi esa ushbu qarorlarning ijrosiga amalda guvoh boʻlib, mamlakatimizda “Inson qadri uchun” tamoyili asaosida amalga oshirilayotgan islohotlar bardavomligiga toʻliq ishonch hosil qilmoqda.

Mangʻit shahrining Oybek nomli mahallasida qaror asosida olib borilayotgan ishlar qizgʻin surʼatlarda davom etmoqda. Ushbu mahalla aholisining kayfiyatiga ichki xoʻjalik yoʻllarining taʼmirtalab ahvolga kelib qolganligi salbiy taʼsir koʻrsatar edi, albatta. Yozda chang, qishda loyga belanadigan bu yoʻllar har qanday insonning taʼbini hira qilardi.

Endilikda esa mahalla ahlida yoʻl bilan bogʻliq bu kabi muammolar boʻlmaydi. Mahallaning 4,5 km uzunlikdagi tuproq yoʻllariga tosh yotqizish ishlari boshlab yuborildi.

Shuningdek, Oybek nomli mahalladan tashqari Durunki mahallasidagi 5,2 km uzunlikdagi yoʻllar ham taʼmirlanib, tosh yotqizish ishlari olib borilmoqda. Ushbu mahalla ahlining ham oʻz mahallalarida amalga oshirilayotgan bu kabi hayrli va ezgu ishdan nihoyatda mamnun ekanliklarini yuz ifodalaridan sezish qiyin emas.

Yurt rivoji yoʻlidagi bu kabi hayrli ishlar Qoraqalpogʻistonning barcha hududlarida, jumladan tumanimizda ham davom etadi. Zero, insonlarni oʻtayotgan har bir kunidan rozi boʻlib yashashlariga sharoit yaratish davlatimiz siyosatining bosh maqsadidir.

Tuman hokimligining Axborot xizmati.