BELGILANMAGAN HUDUDLARDA ChOʻMILISh –HAYoT UChUN XAVFLI

Har faslning oʻziga xos gashti, shu bilan birga yetarlicha  tashvishlari ham bor. Ayniqsa, yoz faslining jazirama issiq ob-havosi yosh-u keksani birday salqinlanishga majbur qiladi. Hatto saraton quyoshi zaptiga olgan kunlarda soya-salqin joylarda ham issiq hovurdan odamning nafasi qaytib ketadi va beixtiyor suv havzalarini qoʻmsab qolamiz.

Oqar suvda choʻmilishning ham ajib gashti, inson salomatligi uchun foydali jihatlari bor. Lekin choʻmilish qoidalariga qatʼiy amal qilinmasa, koʻpdan-koʻp noxush holatlar yuz berishi tabiiy. Ayniqsa, oqar suvning oqish tezligi yuqori, suv sathi chuqur boʻlsa, choʻkib ketish yoki ogʻiz va burunga suv kirishi oqibatida jiddiy kasallikka chalinish xavfi yuqori boʻladi. Shu bois, har yili yoz mavsumida fuqarolar, ayniqsa, yosh bolalarni bunday xavf-xatardan himoyalash maqsadida Favqulodda vaziyatlar Vazirligi va mazkur Vazirlikning tumanlardagi boʻlimlari tomonidan zarur chora-tadbirlar koʻrilib, hududlardagi barcha suv havzalari qatʼiy nazoratga olinadi va choʻmilish taqiqlangan hududlarga maxsus taʼqiqlovchi belgilar oʻrnatilib, favqulodda vaziyatlar xodimlari tomonidan tushuntirish ishlari olib boriladi. Aholi oʻrtasida tez oqar suv yoʻllarida, oʻta chuqur boʻlgan kanallarda, ayniqsa, daryolarda iloji boʻlsa, choʻmilmaslik boʻyicha tavsiyalar beriladi.

Shunday boʻlsa-da, har yili yurtimizda ayrim fuqarolar belgilanmagan joylarda, spirtli ichimliklar isteʼmol qilgan holda choʻmilishlari va boshqa sabablarga koʻra, yuzlab insonlar nobud boʻlmoqda. Ularning aksariyati voyaga yetmaganlarni tashkil etadi. Bu kabi holatlarning oldini olish har birimizning burchimiz sanaladi. Shunday ekan, azizlar, har birimizdan farzandlarimizni nazoratsiz qoldirmaslik, choʻmilish qoidalariga qatʼiy rioya qilish talab etiladi.

Qoraqalpogʻiston Respublikasi Vazirlar Kengashining Raisi – Fuqaro muhofazasi boshligʻining 2023-yil 18-may kungi va Amudaryo tumani hokimi – Fuqaro muhofazasi boshligʻining 2023-yil 22-maydagi “2023-yil choʻmilish mavsumida aholining suvda choʻkishi bilan bogʻliq baxtsiz hodisalarning oldini olish boʻyicha kompleks chora-tadbirlar toʻgʻrisida”gi buyrugʻi va koʻrsatmalari rahbarlikka olishni taʼminlash maqsadida Amudaryo tumani Favqulodda vaziyatlarning oldini olish va ularni bartaraf etish boʻlimi tomonidan davlat quyi tizimiga kiruvchi idora, korxona va tashkilotlar bilan birgalikda reydlar oʻtkazilmoqda.

Amudaryo tumani Faqulodda vaziyatlar boʻlimi boʻlinma boshligʻi kapitan Bekzod Tajiboyev rahbarligida tegishli tashkilotlar bilan tumanimiz hududidan oqib oʻtuvchi Amudaryo daryosining qirgʻoqlarida belgilanmagan hududlarda choʻmilayotgan yoshlar bilan uchrashuvlar oʻtkazilib, ularga suvda choʻkkanda birinchi yordam koʻrsatish boʻyicha zarur tavsiyalar berilmoqda va birinchi yordam koʻrsatish boʻyicha amaliy mashgʻulotlar tashkillashtirilmoqda.

Shu bilan bir qatorda daryo boʻyida va daryoga yaqin hududlarda yashovchi fuqarolarga kichik hajmli kema (qayiq)lardan toʻgʻri foydalanish, oʻz vaqtida roʻyxatdan va texnik koʻrikdan oʻtkazish boʻyicha ogohlantirishlar berilib, bunday holatlarga yoʻl qoʻygan shaxslar tegishli tartibda maʼmuriy javobgarlik tortilishi haqida tushuntirish ishlari ham olib borilmoqda.

Aziz yurtdoshlar! Xalqimiz bekorga “suv balosidan asrasin”, degan xavf-xatardan ogoh etuvchi iborani takrorlamaydi. Suv – qanchalik qimmatli obi-hayot manbai boʻlishidan qatʼiy nazar, ochiq va tezoqar suv havzalarida choʻmilish shunchalik xavfli va ayrim holatlarda inson  umriga nuqta qoʻyishi mumkin. Shu bois,  farzandlaringizning belgilanmagan hududlarda choʻmilishiga aslo yoʻl qoʻymang.

Robiya YOʻLDOShEVA.