YoNGʻIN XAVFSIZLIGI QOIDALARIGA EʼTIBORSIZ BOʻLMANG!

Yongʻin xavfsizligi qoidalari talablariga amal qilinsa,  salbiy oqibatlar, kutilmagan ofatlarning oldi olinadi. Afsuski, ayrim fuqarolarning bu qoidalarga eʼtiborsizligi yongʻin kelib chiqishiga sabab boʻladi.

Joriy yilning 6 oyi mobaynida tumanimizda 28ta yongʻin hodisasi sodir boʻlib, 165 mln. 197 ming soʻm moddiy zarar koʻrilgan. Yongʻinlarning asosiy qismi aholi turar joy binolari va molxonalarida qayd qilindi. Shulardan 1tasi ochiq dala maydonida, olovga ehtiyotsizlik tufayli, 1tasi paxta qabul qilish punktida texnika xavfsizlik qoidalarining buzilishi, yana 1ta hodisa chorva mollari bozorida texnika xavfsizligi qoidalarining buzilishi, 11ta yongʻin esa aholi yashash uylarida, 14ta yongʻin molxonalarda sodir boʻlgan.

Bunday katta-kichik yongʻinlar fuqarolarga anchagina moddiy va maʼnaviy zarar keltirmoqda. Yongʻin kelib chiqish sabablarini tahlil qilib koʻrganimizda, bulardan asosiysi, uyda maishiy elektr asboblaridan va elektr tarmoqlaridan toʻgʻri foydalanmaslik, yosh bolalarning qarovsiz qolib, gugurt oʻynashlari va isitish moʻrikonlarining nosozligi oqibatida kelib chiqqan.

Bunday noxush hodisalarning oldini olish uchun, avvalo, har birimiz yongʻinning oldini olishga doir talab, qoidalarga amal qilishimiz, gaz va elektr uskunalaridan toʻgʻri foydalanishimiz, bolalarni uyda qarovsiz qoldirmasligimiz, turar joylar, korxona, muassasa binolaridagi suv qozonlari oʻchoq pechlarning yaroqliligini, moʻrilar va gaz plitaning joʻmraklari sozligini tekshirib, koʻrikdan oʻtkazib qoʻyishimiz lozim boʻladi.

H.Hayitboyev, tuman FVB inspektori.