Doʻstlik mahallasida yoshlar oʻrtasida jinoyatchilikni oldini olish boʻyicha yigʻilish boʻlib oʻtdi

2023-yil 28-iyun kuni Oʻzbekiston Respublikasi Prezidenti rahbarligida hududllarda huquqbuzarliklarni oldini olish va jinoyatchilikka qarshi kurashish holati hamda bu boradagi ustuvor vazifalarga bagʻishlangan videoselektor yigʻilishi oʻtkazilgan, unda respublikamiz ovul va mahallalarida jinoyatchilikni jilovlash samaradorligini oshirish, xavfsiz muhitni yaratish, kriminogen vaziyatni yaxshilash orqali ogʻir va oʻta ogʻir jinoyatlar sodir etilishining oldini olish hamda ularni kamaytirishga erishish boʻyicha qator vazifalar belgilab berilgan edi.

Ushbu vazifalarning ijrosini taʼminlash maqsadida Qoraqalpogʻiston Respublikasi Prokurori, Ichki ishlar vaziri va Milliy gvardiya Qoraqalpogʻiston Respublikasi boshqarmasi boshliqlari, ularning oʻrinbosarlari, tegishli boshqarma boshliqlari jinoyatchilikning oldini olish, sodir etilgan huquqbuzarliklarni, jinoyatlarni chuqur tahlil qilgan holda, qayta sodir boʻlishining oldini olish, kriminogen vaziyatni atroflicha muhokama qilib, kelgusida amalga oshirilishi lozim boʻlgan aniq chora-tadbirlarni belgilash maqsadida shahar, tumanlarga masʼul qilib biriktirilgan edi.

Ushbu vazifaga muvofiq Qoraqalpogʻiston Respublikasi Ichki ishlar vazirligi Tezkor qidiruv xizmati boshligʻi Umida Kurbanbeva, Amudaryo tumani Ichki ishlar boʻlimi boshligʻi oʻrinbosarlari Zamir Saparbayev, Sharapat Joldasbayevlar Amudaryo tumanining “qizil” toifaga kiruvchi Doʻstlik mahallasida jinoyatchilikning oldini olish boʻyicha yigʻilish oʻtkazdilar.

Yigʻilishda hudud profilaktika inspektori Ilauatdin Jumamuratov, mahalla fuqarolar yigʻini masʼullari hamda koʻcha boshchilari, nuroniy otaxon va onaxonlar, hududda joylashgan korxona va tashkilotlardan vakillar qatnashdi.

Yigʻilishda Qoraqalpogʻiston Respublikasi Ichki ishlar vazirligi Tezkor qidiruv xizmati boshligʻi Umida Kurbanbeva soʻzga chiqib, yoshlar oʻrtasida huquqbuzarlik va jinoyatchiliklarning oldini olish masalasi bugungi kunda yoshlarga oid davlat siyosatining dolzarb yoʻnalishlaridan biri ekanligi, huquqni muhofaza qiluvchi organlar, vazirlik va idoralar, nodavlat notijorat tashkilotlari bilan birga jamoatchilik vakillari tomonidan yoshlarning siyosiy faolligini oshirish, huquqiy ongi va madaniyatini rivojlantirish, yoshlar oʻrtasida jinoyatchilikning oldini olish borasida ham keng koʻlamli chora-tadbirlar amalga oshirilayotganini taʼkidlab oʻtdi. Shuningdek tumanimizda ham jinoyatchilik va huququbuzarliklarning oldini olish borasida qator amaliy ishlar olib borilayotgani haqida toʻxtaldi.

Hudud profilaktika inspektori Ilauatdin Jumamuratov oʻz soʻzida aholi oʻrtasida giyohvandlik, odam savdosi, diniy ekstremizm kabi jinoyatlarning oldini olish yuzasidan mahalla yoshlari orasida muntazam tushuntirish ishlarini olib borayotganini, kelgusida oʻsmirlar va yoshlar bilan ishlashishni yanada yaxshilashga harakat qilishini bildirdi. Shuningdek, yoshlarning taqdiriga ota-onalar ham befarq qaramasligi, ular ustidan doimiy nazorat olib borishlari lozimligini taʼkidladi.

 Shundan soʻng, tuman Ichki ishlar boʻlimi boshligʻi oʻrinbosari Zamir Saparbayev soʻzga chiqib, har bir hududda sodir etilgan maʼmuriy va jinoiy holatlar aholi oʻrtasida muhokama qilinishi, jinoyat sodir etilishi sabablari oʻrganilishi kerakligi va jinoyat sodir etishga imkon bergan shart-sharoitlarni bartaraf etish choralari koʻrilishi lozimligi haqida soʻz yuritdi.

Qolaversa, mast holatda avtotransport vositasini boshqarish va boshqa qoʻpol qoidabuzarliklar mahalla hamda mehnat jamoalarida muhokama etilishi muhimligini, oiladagi notinchlik, kelishmovchilik tufayli sodir etilgan ogʻir va oʻta ogʻir jinoyatlar chuqur tahlil qilinishi kerakligini alohida eʼtirof etdi.

Yigʻilish yakunida mahalla fuqarolar yigʻini masʼillari soʻzga chiqib, yosh oilalar va uyushmagan yoshlar, xotin-qizlar oʻrtasida huquqbuzarliklar profilaktikasi va jinoyatchilikka qarshi kurashish boʻyicha bir qancha ishlar amalga oshirilganligi, huquqbuzarlik va jinoyatchilikning oldini olish boʻyicha mahallalarda keng targʻibot-tashviqot ishlari olib borilayotganligi haqida maʼlumot berib oʻtdilar.

Yigʻilishda Doʻstlik mahallasini “qizil” toifadan chiqarish boʻyicha yigʻin masʼullariga tegishli topshiriqlar berildi.

Tuman hokimligi Axborot xizmati