HUNARIDAN RIZQ TOPAYoTGAN AYoL

Olmazor mahallasi tumanimizning yashil toifadagi tinch-osoyishta, obod va fayzli goʻshalaridan hisoblanadi. Mahalla fuqarolar yigʻini masʼullari hududdagi xonadonlarda tez-tez boʻlishib, ishsiz, ishga yaroqli fuqarolarning bandligini taʼminlashga, ularga munosib turmush sharoitlari yaratishga harakat qilishadi, ayniqsa manzilli qoʻllab-quvvatlash daftarlariga kirilgan yoshlar, ayollarning holidan xabar olishib, imkon qadar qoʻllab-quvvatlashga intilishadi.

“Ayollar daftari”ning 6-toifasiga roʻyxatga olingan Shahlo Bekmurodova 5 nafar farzandning onasi, 4 nafari hali voyaga yetmagan, kichkinasi esa 2 yoshda. U uzoq yillar farzandlari tarbiyasi bilan shugʻullandi. Turmush oʻrtogʻi Rustam Oʻtaboyev oʻz xizmat lavozimida sidqidildan ishlab, oilasini taʼminlab qoʻyishga harakat qilayotgan boʻlsa-da, Shahlo bekor oʻtiraverishni oʻziga ep koʻrmadi.

Mamlakatimizda ayol-qizlarni qoʻllab-quvvatlash, ularning hech kimdan kam boʻlmay mehnat qilishlariga, oʻz iqtidorini namoyon etishlariga sharoit yaratish uchun qilinayotgan gʻamxoʻrliklar unga dalda boʻldi. Ishlash istagini, lekin farzandlarini qarovsiz qoldirib keta olmasligini mahalla fuqarolar yigʻini masʼullariga borib aytdi. Ularning maslahatiga koʻra, tikuvchilik faoliyatini yoʻlga qoʻyib, oʻzini oʻzi band qildi.

Uning aynan tikuvchilik yoʻnalishini tanlagani bejiz emasdi. Chunki bolaligida buvisi unga doʻppi, kiyimlar tikishni oʻrgatgan, har bir qizning qoʻlida hunari boʻlsa, hayotda qiynalmaydi, hunarli boʻl, xor boʻlmaysan, deya koʻp nasihat qilardi. Oʻzi nevarasining qoʻliga ninani olib, choklarni tikishini kuzatib oʻtirar, erinmay xato qilgan joylarini qayta tikishni buyurardi, ulgʻaygach, ishni tikuv mashinada ishlaydigan boʻldi. Shu tariqa yillar oʻtib, binoyiday chevar boʻldi. Ota uyida vaqtida dastlab Mangʻitdagi, keyinchalik Toshkentdagi tikuv tsexlarida ishladi.

Shahlo Bekmurodovaning buvisidan oʻrgangan bu hunari hayotida juda asqotdi. Hozirgi kunda ham oʻz oilasida, farzandlariga koʻz-quloq boʻlib oʻtirib tikkan kiyimlari mijozlarga juda manzur boʻlayotir. U buyurtma asosida turli fasonlarda ayollar, erkaklar va bolalar kiyimlarini tikishdan tashqari, turli oʻlchamdagi kiyimlarni tikib, bozorga ham chiqaradi.

Ota-bobolarimiz “hunar ­– hunardan rizqing unar”, deb bejiz aytishmagan. Qolaversa, nechta hunaring boʻlsa-da, koʻplik qilmaydi odamga. Buni juda yaxshi his qilgan Shahlo Bekmurodova mahalla fuqarolar yigʻini masʼullari koʻmagida 5,5 million soʻm imtiyozli kredit hisobiga turli pishiriqlar pishiradigan uskuna sotib oldi va bu borada ham ancha mahoratga ega boʻldi. Tinib-tinchimas ayol yaqinda tadbirkorlik asoslari boʻyicha oʻquv kursida oʻqib, maxsus sertifikat oldi va faoliyatini kengaytirish, tadbirkor sifatida tikuv tsexi ochish niyatida.

Mamlakatimizda tadbirkorlik faoliyatini tashkil etish va amalga oshirish bilan bogʻliq munosabatlar tartibga solinib, tadbirkorlarga keng imkoniyatlar yaratilayotgani uni ulkan marralarga chorlaydi, fuqarolarning tadbirkorlik faoliyatida erkin ishtirok etishi va manfaatdorligi uchun shart-sharoitlar yaratilganligi, qonuniy manfaatlari himoya qilinayotganidan quvonadi.

Yurtimizda Shahlo kabi intiluvchan, mehnatkash va oilasiga fidoyi ayollar koʻpayaverishini tilab qolamiz.

Oygul RAJABOVA