DAVLAT TILI – KUCh-QUDRAT VA ILHOM MANBAI

Til – millatning maʼnaviy boyligi, mamlakat timsoli va qimmatbaho mulkidir. Davlat tilimizga boʻlgan eʼtibor bugungi kunda, balki tarixning barcha davrlarida ham dolzarb ahamiyat kasb etib kelgan. Shu oʻrinda Behbudiy bobomiz aytgan shu soʻzlarni eslatib oʻtaman: "Har bir millatning dunyoda borligʻini koʻrsatadurgʻon oynai hayoti til va adabiyotidir. Milliy tilni yoʻqotmak millat ruhini yoʻqotmakdir".

Soʻnggi yillarda Oʻzbekistonda barcha soha va tarmoqlardagi kabi ona tilimiz qadri va nufuzini yanada oshirish borasidagi asosiy va amaliy ishlar ham yangi bosqichga koʻtarilmoqda. Xususan, bizning tumanimizda va 79-sonli maktabda bu borada bir qancha ishlar olib borilmoqda. Maktabimizda har yili 21-oktyabr – Oʻzbek tiliga davlat tili maqomi berilgan kun munosabati bilan katta tadbir oʻtkaziladi.

Undan tashqari, maktabda oʻquvchilarning savodxonligini, fikrlash qobiliyatini rivojlantirish maqsadida har haftalikda "Soʻz oʻyini", "Eng chiroyli husnixat egasi", "Men oʻzbek tilida qancha soʻz bilaman" kabi tanlovlar oʻtkazib boriladi. Eng faol qatnashgan oʻquvchilar esa ragʻbatlantiriladi. Ushbu tanlovlar oʻquvchilarni tilimizni qadrlashga oʻrgatib borishda muhim ahamiyat kasb etmoqda. Joriy yilgi oʻquv yili boshlanganidan shu paytga qadar "Qadring baland boʻlsin ona tilim!" shiori ostida "Soʻz oʻyini", "Harflar raqsga tushganda", "Diktantlar tanlovi" musobaqalari oʻtkazildi. Bular orqali oʻquvchilar oʻzbek tilining qanchalar boy va sof til ekanligini anglab olishdi.

Qoraqalpogʻiston Respublikasi metodik xizmat koʻrsatish boʻlimining oʻzbek tili metodisti Oʻtkir Matmurodov ham biz fan oʻqituvchilariga yangi pedagogik texnologiyalarni qoʻllagan holda dars oʻtishni, turli metodlar, ish tajribalarini oʻrgatib, mahoratimizni oshirishga koʻmaklashib kelmoqda. Oʻz ustimizda ishlab, dars  mashgʻulotlarini yangicha uslublarni qoʻllagan holda oʻtish boʻyicha zarur tavsiyalar, maslahatlar berib, yoʻl-yoʻriqlar koʻrsatmoqda.

Ona tili millatning ruhi, borligimiz va birligimiz, davlat timsoli. Shu sababli har bir darsimizda oʻquvchi-yoshlarning milliy tilimizga boʻlgan eʼtiborini oshirish bilan birga tilimizni qadrlashga oʻrgatib borish bizning eng asosiy vazifamizdir. Xulosa oʻrnida shu fikrlarimni keltirib oʻtmoqchiman: Tilimiz boy, tilimiz sof, goʻzaldir! Har bir soʻzi, gapi maqol, jumlasi masal va mataldir!

Laylo Rajabboyeva, 79-sonli maktabning ona tili va adabiyot oʻqituvchisi.