KONSTITUTsIYa BERGAN BAXT

Davlat oʻqituvchilarning shaʼni va qadr-qimmatini himoya qilish, ularning ijtimoiy va moddiy farovonligi, kasbiy jihatdan oʻsishi toʻgʻrisida gʻamxoʻrlik qiladi.

Konstitutsiyaning 52-moddasidan.

Oʻqituvchi boʻlishni niyat qilgan inson oʻz zimmasiga jamiyat va davlatni rivojlantirishga hissa qoʻshish, har tomonlama sogʻlom, maʼnaviy barkamol avlodni voyaga yetkazish, ularni Vatanga mehr-muhabbatli insonlar qilib tarbiyalashdek yuksak masʼuliyatni oladi.

Amudaryo tumandagi 30-sonli maktabning ona tili va adabiyot fani oʻqituvchisi Umidaxon Rahimboyeva umumtaʼlim maktabini tugatib, oʻqituvchi boʻlishni niyat qilganida, keyinchalik Qoraqalpoq Davlat Universitetining filologiya va tillarni oʻqitish fakultetida tahsil olgan kezlarida ham oʻqituvchi zimmasidagi ana shu yuksak masʼuliyat zalvorini qayta-qayta, yuragidan his etdi. Umidaxonning talabalik davri 2013-2017-yillarga, talaba-yoshlar, hatto professor-oʻqituvchilar uchun ham paxta yaganasiga chiqish, paxta terimi-yu, adogʻi koʻrinmaydigan turli xil shanbaliklar tarzidagi majburiy mehnatga jalb etish bilan bogʻliq ishlar avj olgan davrga toʻgʻri keldi.

Haqiqatan ham oʻsha yillari talaba-yoshlar bilan oʻqituvchilar jalb etilmagan sohaning oʻzi yoʻq edi. Obodonlashtirish ishlari, aholini roʻyxatga olish, paxta yaganalash, chopiq qilish, begona oʻtlardan tozalash, chilpish, paxta terish, turli tadbirlarda zalni toʻldirish, hatto namunali uylar qurilishiga hasharga chiqish, ... kabi sanogʻiga yetib boʻlmaydigan “vazifalar”ni bajarishardi oʻqituvchilar.

Umidaxon bundayin “vazifalar”ning talabalikda ming mashaqqatini chekkani uchunmi, ayni paytda oʻqituvchi obroʻsiga, shaʼniga hurmatsizlik tarzidagi bu kabi hatti-harakatlarga barham berilganidan mamnunligini quvonib izohlaydi:

– Oʻqituvchi uchun berilib, chin dildan ishlaydigan davr endi boshlandi, – deydi u. – Yangi tahrirdagi Konstitutsiyamizda oʻqituvchi maqomi toʻgʻrisida davlat beqiyos gʻamxoʻrlik koʻrsatishi belgilab qoʻyilgan. Biz oʻqituvchilar uchun ana shu konstitutsiyaviy kafolatdan ham yuksak gʻamxoʻrlik yoʻq.

Darvoqe, Yangi tahrirdagi Konstitutsiyamizning 52-moddasida oʻqituvchi davlat va jamiyatni rivojlantiruvchi buyuk maʼnaviyat va maʼrifat sohibi sifatida eʼtirof etilib, “... davlat ularning ijtimoiy va moddiy farovonligi, kasbiy jihatdan oʻsishi toʻgʻrisida gʻamxoʻrlik qilishi” belgilab qoʻyilgan.

Ana shu davlat gʻamxoʻrligidan bahramand faoliyat yuritayotgan oʻqituvchi va murabbiylar yosh avlod taʼlim va tarbiyasi sohasida quvonarli yutuqlarga erishmoqdalar. Oʻzining pedagogik faoliyatini boshlaganiga endi 6-yil boʻlgan U.Rahimboyeva erishayotgan yutuqlar, u amalga oshirayotgan ibratli ishlar ham ana shu gʻamxoʻrlikning samarasidir. Ilk faoliyatini 2017-yildan 30-sonli maktabda ona tili va adabiyot fani oʻqituvchisi sifatida ishlashdan boshlagan Umidaxon  oʻzining izlanuvchanligi, tashabbuskor va bilimdonligi bilan kasbdoshlarining hurmat-eʼtiborini qozondi. 2020-yilda u Xalqaro tadqiqotlarga tayyorgarlik koʻrish “Oʻqish savodxonligi” yoʻnalishi treneri, 2021-yildan esa ona tili va adabiyot fani boʻyicha trener-oʻqituvchi maqomiga ega boʻldi. Shuningdek, 2022-yilda “Eng yaxshi ona tili va adabiyot fani oʻqituvchisi” koʻrik-tanlovining tuman va hududiy bosqichlari gʻolibi, “Yosh kitobxon” tanlovining eng tashabbuskor, faol ishtirokchisi boʻldi. Oʻsha yili “Oʻzbek tilim – iftixorim” esselar tanlovida oʻquvchisi, “Maʼnaviyatli jamiyat – Uchinchi Renessans poydevori” esselar tanlovida Umidaxonning oʻzi tuman va hududiy bosqichlar gʻolibligini qoʻlga kiritdi. 2023-yil ham Umidaga oʻz bilim va salohiyatini namoyish etish uchun imkoniyatlar yili boʻldi. Tashabbuskor va izlanuvchan  pedagog Xalq taʼlimi vaziri jamgʻarmasi mukofoti sohibasi boʻldi. Oʻzbekiston milliy tiklanish demokratik partiyasi markaziy Kengashi tomonidan tashkillashtirilgan “Nodirai davronlar” koʻrik-tanlovining hududiy bosqichida 2-oʻrinni egalladi.

Umidaxon, oʻqituvchining jamiyatdagi maqomi yuksak tutilib, qadr-qimmati, obroʻ-eʼtibori oshishi, avvalo uning namunali mehnat faoliyatining mahsuli ekanligini chuqur anglagani uchun ham qisqa vaqt ichida el aro hurmat, eʼtibor topdi, mohir pedagog sifatida shakllandi. Bularning barchasi Umidaxon Rahimboyevaga Konstitutsiya bergan imkoniyat. Zero, oʻqituvchi uchun emin-erkin, oʻquvchilari davrasida oʻzining sevimli kasbiy faoliyati bilan shugʻullanishdan ham ulugʻroq baxt yoʻq.

Robiya YOʻLDOShEVA.