AMUDARYoLIK YoShLAR STARTAP TANLOVIDA OʻZ LOYIHALARI BILAN IShTIROK ETIShDI

Amudaryolik yoshlar oʻrtasida IT Park Qoraqalpogʻiston filiali hamda Amudaryo tumani hokimligi bilan hamkorlikda startap tanlovi tashkil etildi.

2023-yil 28-dekabr kuni tuman hokimligi binosida boʻlib oʻtgan ushbu tanlov boshlanishida IT Park Qoraqalpogʻiston filiali masʼullari, Yoshlar ishlari agentligi tuman boʻlimi rahbari Sardor Ismailov hamda raqamli iqtisodiyotni rivojlantirish boʻyicha loyiha menejeri Dilmurod Rahimovlar tanlov tartibi va shartlari haqida tushunchalar berishdi.

Yoshlarning innovatsion gʻoya va startap loyihalarini qoʻllab-quvvatlash maqsadida Prezidentimizning 2022-yildagi 22-avgustdagi “2022-2023-yillarda axborot-kommunikatsiya texnologiyalari sohasini yangi bosqichga olib chiqish chora-tadbirlari toʻgʻrisida” Qaroriga koʻra oʻtkazilgan ushbu tanlovda 18-30 yosh oraligʻidagi 17 ta jamoa ishtirok etdi. Mazkur jamoalardagi 30 nafarga yaqin yoshlar oʻzlarining kreativ va innovatsion gʻoyalar asosida yaratgan turli loyihalarini taqdim etishdi.

Maʼlumki, dunyoning iqtisodiy jihatdan ilgʻor mamlakatlari qatori Oʻzbekistonda ham iqtisodiyot, fan, taʼlim, sogʻliqni saqlash, qishloq xoʻjaligi kabi tayanch sohalarga zamonaviy innovatsion texnologiyalar tatbiq etilmoqda. Soʻnggi yillar davomida yurtimizda innovatsion ekotizimni rivojlantirishda startaplarni qoʻllab-quvvatlashga alohida eʼtibor berilmoqda.

Amudaryo tumanida ham 400 nafarga yaqin turli yoshdagi fuqarolar IT sohasida oʻqitishga jalb etildi. Ushbu sohada 200 nafarga yaqin yoshlar oʻzini oʻzi band qilishiga erishildi.

Taʼkidlash joizki, startaplar innovatsiyalarga asoslangan holda mavjud mahsulotlarning kamchiliklarini bartaraf etadi, tovarlar, xizmatlarning mutlaqo yangi toifalarini yaratadi va butun sanoat uchun fikrlash, biznes yuritishning anʼanaviy usullarini oʻzgatirib yuboradi. Soʻnggi davrlarda koʻplab sohalarda startaplar yangiliklar yaratuvchi sifatida tanilmoqda.

Startap loyihalarning har biri yangi turdagi mahsulot, dastur yoki xizmat koʻrsatish sohasini oʻz ichiga oladi. Jumladan, turizm sohasida “Oʻzbekiston turistik shaharlarining 3D va VR BOX modellarini yaratish”, “NazzAR” startap loyihalari muvaffaqiyatli amalga oshirilmoqda. Tibbiyot sohasida “LiPach” teri parvarishi uchun gigiyenik-kosmetik vositasi klinik oldi tekshiruvlardan muvaffaqiyatli oʻtdi, “Bioferron” biologik faol qoʻshimchasi, implantatsiya qilinadigan yuqori texnologiyali tibbiy asbob-uskunalarni innovatsion ishlab chiqarish yoʻlga qoʻyilmoqda.

Qishloq hoʻjaligi sohasida agrolotok, koʻchatlarni “in-vitro” usulida koʻpaytirish laboratoriyasi tashkil etilmoqda. Oziq-ovqat sohasida olma kukunidan qandolatchilikda keng foydalaniladigan pektin ishlab chiqaruvchi “Onsite” MChJ tashkil etildi.

Yana bir istiqbolli loyiha biologik mahsulotlarni quritish mexanizmini takomillashtiruvchi elektromagnit parchalovchi qurilma tizimi ishlab chiqilmoqda. Mazkur tizim mahsulotning yakuniy tannarxiga katta taʼsir qiluvchi yakuniy bosqichda energiya sarfini qariyb 4-6 baravargacha qisqartirish imkonini beradi.

Amudaryolik yoshlar oʻrtasida oʻtkazilgan mazkur tanlovda ham ishtirokchilar oʻzlarining sogʻliqni saqlash va ekologiya, moliya-iqtisodiyot va aholi bandligini taʼminlash, qishloq va suv xoʻjaligi, transport, taʼlim va turizm, qurilish, energetika va robototexnika yoʻnalishlari boʻyicha tayyorlagan loyihalarini tanishtirib, batafsil maʼlumotlar berishdi.

Tanlov yakunida Shohruhxon Poʻlatboyevning taʼlim yoʻnalishidagi startap loyihasi 1-oʻringa loyiq deb topildi va unga noutbuk sovgʻa qilindi. “Dream team” jamoasining sogʻliqni saqlash yoʻnalishidagi startap loyihasi 2-oʻringa munosib koʻrilib, jamoaga planshet sovgʻa qilindi. Shuningdek, 3-oʻrin gʻolibi boʻlgan “Kids App” jamoasi taʼlim yoʻnalishidagi loyihasi uchun smartfon sovgʻa qilindi. Gʻoliblar va sovrindorlarning har biriga “Faxriy yorliqlar” topshirildi.

O.Xudoyberganova.