ELEKTR ENERGIYaSI TAʼMINOTIDA UZILIShLARGA BARHAM BERILMOQDA

Mamlakatimizda isteʼmolchilarni sifatli va uzluksiz elektr energiyasi bilan taʼminlash dolzarb masalalardan biri hisoblanadi. Aholi xonadonlari, ishlab chiqarish korxonalari hamda ijtimoiy soha obʼektlarining elektr energiyasiga boʻlgan talabini uzluksiz qondirishga qaratilgan chora-tadbirlar tufayli “Hududiy elektr tarmoqlari”, aktsiyadorli jamiyati tasarrufidagi hududiy filiallar va ularning quyi tizimlari, jumladan, tuman va shahar elektr taʼminoti korxonalari tomonidan keng koʻlamli ishlar amalga oshirilmoqda.

Islohotlar jarayonlarida oʻtgan asrning 70-80-yillarida oʻrnatilgan yogʻoch ustunlarni temir-beton ustunlarga almashtirish, aholi soni oʻsib borishi bilan elektr energiyasi uzatish quvvati kamlik qilayotgan transformator punktlarini yangi, yuqori quvvatli va zamoniy transformatorlarga almashtirish, rekonsturktsiya qilish, tejamkor SIP sim kabellari bilan taʼminlash ishlari muvaffaqiyatli tarzda amalga oshirilmoqda.

“Hududiy elektr tarmoqlari” aktsiyadorlik jamiyati Qoraqalpogʻiston Respublikasi filialiga qarashli Amudaryo tumani elektr taʼminoti korxonasi tomonidan ham elektr energiyasi isteʼmolchilari uchun zarur shart-sharoitlar yaratish, aholini uzluksiz elektr energiyasi bilan taʼminlash maqsadida eskirgan, oʻz muddatini oʻtab boʻlgan elektr uzatish tarmoqlarini yangilash, taʼmirtalab uskunalarni qayta taʼmirlash ishlariga alohida eʼtibor qaratilmoqda. Natijada oʻtgan 2023-yil davomida tuman hududida isteʼmolchilarni elektr energiyasi bilan taʼminlashda uzlishlar minimallashtirildi va aholiga sifatli xizmat koʻrsatishga erishildi.

Xususan, Oʻzbekiston Respublikasi Prezidentining joylardagi past kuchlanishli elektr tarmoqlarini modernizatsiyalash va eskirgan uskunalarni yangidan qurish borasidagi koʻrsatmalari asosida Amudaryo tumanining “Obod qishloq” va “Obod mahalla” dasturlariga kiritilgan hududlaridagi taʼmirtalab elektr uzatish tarmoqlari hamda transformator punktlari modernizatsiya va rekonsturuktsiya qilindi.

Maʼlumki, elektr uskuna va tarmoqlarni yangilashda zamonaviy texnologiyalarni qoʻllash bugungi kunning eng muhim masalalaridan hisoblanadi. Shu bois, tayanchda oʻrnatilgan germetik transformatorlar, izolyatsiyalangan SIP simlardan foydalanish natijasida tarmoqdagi yoʻqotishlar va inson hayotiga xavf soluvchi omillarning oldi olinmoqda.

Amudaryo tumani elektr taʼminoti korxonasi tomonidan oʻtgan 2023-yil davomida jami 14ta transformator punkti yangidan oʻrnatilib, 34,6 kilometr uzunlikdagi zamonaviy SIP kabellar tortildi.

Tumanning Qilichboy ovuli hududi aholisining ham elektr energiyasiga boʻlgan kundalik ehtiyoji oʻrganilib, aholi murojaatlari asosida hududda modernizatsiya va rekonstruktsiya ishlari olib borildi. Ovul hududiga yangidan 166 dona temir-betonli tayanch ustunlari oʻrnatildi. 12,7 kilometr uzunlikdagi zamonaviy SIP kabellari tortilib, 170dan ziyod xonadonlarda elektr energiyasidan foydalanish sifati yaxshilandi. Ayni paytda ovul isteʼmolchilariga elektr energiyasi barqaror tarzda yetkazib berilmoqda.

Islohotlarning yangi bosqichida aholi bilan, ularning murojaatlari bilan ishlashga alohida eʼtibor qaratilayotgani bois, sohadagi muammolar oʻz vaqtida bartaraf etilishiga erishilmoqda.

Robiya YOʻLDOShEVA.