Tuman Prokuraturasi tashabbusi bilan yoshlar uchun madaniy-maʼrifiy tadbirlar, musobaqalar tashkil qilindi

Maʼlumki, Prezidentimiz tashabbusi bilan baʼzi toifa yoshlar Prokuratura organlari xodimlariga otaliqqa biriktirilgan edi. Amudaryo tumani Prokuraturasi xodimlari ham oʻzlari masʼul qilib biriktirilgan yoshlar tarbiyasi, ularning boʻsh vaqtlarini mazmunli oʻtkazish, bilim olib, kasb-hunar egallab, mamlakat va jamiyat taraqqiyotiga hissa qoʻshadigan insonlar boʻlib voyaga yetishlari uchun zarur amaliy yordamlarni koʻrsatib kelmoqda.

Amudaryo tumani prokurori Aziz Roʻzmetov tashabbusi bilan shu kunlarda tumanning 2-sektori hududida yashovchi, organ xodimlariga otaliqqa biriktirilgan yoshlar ishtirokida turli tadbirlar, musobaqalar, madaniy-maʼrifiy kechalar oʻtkazildi.

26-aprel kuni erta tongdan bir guruh yoshlar tuman Prokuraturasi tashabbusi bilan Xorazm viloyatining Xiva shahriga sayohatga joʻnatildi. Ushbu sayohat dam olish kunlarida yoshlarning boʻsh vaqtlarini mazmunli oʻtkazish, qolaversa, yoshlar ongida tariximizga hurmat, vatanparvarlik tuygʻularini mustahkamlash hamda ichki turizmni rivojlantirish maqsadida tashkil qilindi. Tuman hokimligi binosi oldidan 60 nafarga yaqin yoshlar Xiva shahriga maxsus avtobuslarda joʻnatildi.

Soʻngra yana bir guruh yoshlar tumanning Qilichboy hududidagi harbiy qismga tashrif buyurib, harbiylar hayoti bilan yaqindan tanishdilar.

Harbiy qismda yoshlar chegarachi harbiylar hayoti, ularning yashash sharoitlari, harbiy texnika va qurol-aslahalar, chegara zonalaridagi ajratuvchi toʻsiqlar va simlarning joylashuvi bilan yaqindan tanishdilar. Ayniqsa, davlat xavfsizlik xizmati chegara qoʻshinlarining xizmat davomida foydalanidagan texnikalar, aloqa uskunalari, xizmat itlari va otlar yoshlarda katta tassurotlar qoldirdi.

Amudaryo tumanining Qilichboy ovulida joylashga Davlat xavfsizlik xizmati chegara qoʻshinlariga qarashli harbiy qism rahbariyati va bu yerda oʻz yigitlik burchini oʻtayotgan harbiylar bilan uchrashuv davomida yoshlar Milliy Armiya safida xizmat qilishning naqadar sharafli va masʼuliyatli burch ekanligini yana bir bora anglab yetdilar. Ularning aksariyati kelgusida harbiy xizmat aynan chegara qismlarida oʻtashga qaror qilgan boʻlishsa, ajab emas.

Qilichboy madaniyat markazida ham mazkur hududda yashovchi Prokuratura organlari xodimlariga otaliqqa biriktirilgan yoshlar va ularning tengdoshlari uchun musiqiy-koʻngilochar dastur tashkil qilindi. Yoshlarni madaniyat va sanʼatga oshno qilish, ularning ijodiy va intellektual salohiyatini rivojlantirish maqsadida oʻtkazilgan ushbu tadbirda ovulning iqtidorli yoshlari oʻz tengdoshlariga qobiliyatlarini namoyish qildilar.

Madaniyat markazi binosida shuningdek, tadbirga tashrif buyurgan ovul yoshlari uchun boʻsh ish oʻrinlari va vakant lavozimlar yarmarkasi tashkil qilindi. Tuman prokurori tashabbusi bilan oʻtkazilgan mehnat yarmarkasida 2-sektor hududida yashovchi band boʻlmagan, Prokuratura organlari xodimlari tomonidan otaliqqa olingan yoshlar ishtirok etishdi.

Shu kuni tushlikdan keyin 2-sektor hududida yashovchi, Prokuratura organlari xodimlariga otaliqqa biriktirilgan yoshlar va ularning tengdoshlari uchun Amudaryo tumani Madaniyat markazi binosida ham tadbirlar tashkil qilindi.

Markaz binosiga kirish qismida Amudaryo tumani Axborot-kutubxona markazining kitoblar koʻrgazmasi hamda turli maktablar, maktabdan tashqari taʼlim muassasalarida tashkil qilingan toʻgaraklarda oʻquvchilar tomonidan tayyorlangan mahsulotlar koʻrgazmasi namoyish qilindi.

Yoshlarni kitobxonlikka jalb qilish va maktabdan tashqari toʻgaraklar orqali tarbiyalash, ularning intellektual va maʼnaviy rivojlanishida muhim rol oʻynaydi. Kitobxonlik yoshlarda mustaqil fikrlash, keng dunyoqarashni shakllantirish va maʼnaviy barkamollikka erishishda asosiy omil hisoblanadi. Shuningdek, maktabdan tashqari toʻgaraklar yoshlarning ijtimoiy koʻnikmalarini rivojlantirish, ularning ijodiy salohiyatini, isteʼdodlarini namoyon qilish uchun zarur sharoitlarni yaratadi.

Soʻngra ishtirokchi yoshlar madaniyat markazining tomoshalar zaliga taklif qilinib, ular uchun vatanparvarlik ruhidagi kontsert dasturi namoyish qilindi.

Taʼkidlash joizki, bu kabi madaniy tadbirlar, ayniqsa yoshlar uchun tashkil etiladigan kontsertlar, milliy gʻurur va vatanparvarlikni mustahkamlashda muhim rol oʻynaydi. Bu kabi tadbirlar nafaqat yoshlarning boʻsh vaqtlarini mazmunli oʻtkazish, balki ularni vatanga muhabbat va sadoqat ruhida tarbiyalashga ham xizmat qiladi. Yosh estrada yulduzlari va havaskorlar ishtirokida ijro etilgan kuy-qoʻshiqlar xalqlar oʻrtasidagi doʻstlik va hamjihatlik, tinchlik va totuvlik, yurtga sadoqat va muhabbat tuygʻulari tarannum etildi.

Inson kamolotida jismoniy tarbiya sportning ham oʻrni alohida. Ayniqsa, sport bilan shugʻullangan yoshlar nafaqat jismonan sogʻlom, balki irodali, oʻziga ishonchi baland boʻladi. Bu esa, oʻz navbatida, jamiyatning turli sohalarida ularning muvaffaqiyatli faoliyat yuritishlariga zamin yaratadi. Shu maqsadda turli musobaqalar, sport tadbirlar oʻtkazib kelinmoqda. Prokuratura organlari xodimlariga otaliqqa biriktirilgan yoshlar va sektor hududidagi uyushmagan yoshlar ishtirokida tuman bolalar va oʻsmirlar sport maktabida oʻtkazilgan kurash musobaqasi murosasiz bellashuvlarga boy boʻldi.

Bu kabi sport musobaqalari va tadbirlar yoshlarni faollikka undab, ularni ijtimoiy faollikka chaqiradi. Tuman prokuraturasi, Yoshlar ishlari agentligi tuman boʻlimi, bolalar va oʻsmirlar sport maktabi va boshqa hamkor tashkilotlar bilan birgalikda tashkil qilingan kurash musobaqalarida bir necha vazn toifalari boʻyicha oʻgʻil va qiz bolalarning kuch va chaqqonliklari sinovdan oʻtkazildi.  

Bu kabi sport tadbirlari yoshlarni jinoyatchilikdan uzoqlashtirishda, ularning maʼnaviy kamolotida muhim rol oʻynaydi. Bunday tadbirlar yoshlarning jamiyatdagi oʻrnini mustahkamlashga va ularning kelajakdagi muvaffaqiyatlariga zamin hozirlashga ham xizmat qiladi. Musobaqa soʻngida gʻoliblarga tashkilotchilarning esdalik sovgʻalari, diplom va medallar topshirildi.

Prokuratura organlari xizmatchilariga otaliqqa biriktirilgan yoshlar uchun Amudaryo tumani Prokuraturasi tashabbusi bilan tashkil qilingan tadbirlar tumandagi 21-sonli Bolalar musiqa va sanʼat maktabida ham davom etdi.

Bu yerda ham tuman Axborot-kutubxona markazining kitoblar koʻrgazmasi hamda 21-sonli Bolalar musiqa va sanʼat maktabida tashkil qilingan toʻgaraklarning faol aʼzolari tomonidan tayyorlangan qoʻl mehnati mahsulotlari koʻrgazmasi namoyish qilindi. Toʻquvchilik, tikuvchilik, rassomlik, duradgorlik toʻgaraklarining aʼzolari tomonidan tayyorlangan sanʼat asarlari, kashtalar, quroqlar, uy-roʻzgʻor buyumlari ishtirokchilarda qiziqish uygʻotdi va yoshlarni ham kasb-hunar egallashga chorladi.

Soʻngra maktabning tantanalar zalida kontsert dasturi tashkil qilindi. Aytish joizki, musiqa inson ruhiyatiga kuchli taʼsir koʻrsatadi va bu taʼsir turli tadqiqotlarda koʻp marta isbotlangan. Musiqa terapiyasi, masalan, stressni kamaytirish, kayfiyatni yaxshilash va hatto jismoniy ogʻriqlarni yengillashtirish uchun ishlatiladi.

Yoshlarning ruhiy va maʼnaviy rivojlanishida musiqa va sanʼatning oʻrni beqiyosdir. Musiqa, rassomlik, adabiyot va boshqa sanʼatning boshqa turlari yoshlarga oʻzlarini ifoda etish va ijodiy fikrlash uchun keng imkoniyatlar yaratadi.

Amudaryo tumani Prokuraturasi va hamkor tashkilotlar ishtirokida tashkil qilingan ushbu tadbirlar unda ishtirok etgan yoshlarda ulkan taassurotlar qoldirdi.