Mustaqillik bayrami arafasida shahrimiz koʻchalarida obodonlashtirish ishlari amalga oshirilmoqda
Ayni kunlarda Amudaryo tumanida eng ulugʻ, eng aziz bayram – mamlakatimiz mustaqilligining 33 yilligiga tayyorgarlik koʻrish va uni munosib nishonlash maqsadida izchil saʼy-harakatlar olib borilmoqda. Asrlar osha shakllanib, avloddan-avlodga meros boʻlib kelgan milliy qadriyatlarimizdan biri bu – ommaviy bayramlar oldidan yurtimizning har bir ovul va mahallalarida obodonlashtirish tadbirlarini tashkil etish hisoblanadi. Shu maʼnoda Mangʻit shahri va shahar atrofidagi mahallalarda, koʻchalarda atrof-muhitni obodonlashtirish, ozodaligini taʼminlash maqsadida koʻplab ishlar amalga oshirilmoqda. Ushbu xayrli ishlarga keng aholi vakillari ham bosh qoʻshgani ish unumini yanada oshirmoqda.
Xususan, Durunki mahallasida tashkil etilgan tadbirlarda mahalla ahli oʻz xonadonlari atrofini tozalash, ariq va yoʻl chetidagi oʻt-chimlarni chopib, daraxtlarning qurigan shoxlarini kesish kabi ishlarda faol ishtirok etmoqdalar. Aholining faol va samarali mehnatlari sababli xonadonlar oldidagi gulzorlar tozalanib, sarishta qilinmoqda, atrofi yanada fayzli goʻshaga aylantirilmoqda. Oʻzaro hamjihatlik, inoqlik asosida tashkil etilgan xayrli tadbirlar natijasida mahalla koʻchalari ozoda, shinam va obod holga keltirilib, koʻrkam qiyofa kasb etmoqda. Atrof-muhitning yanada sarishta, fayzli boʻlganidan nafaqat mahalla ahlining, balki mehmonlarning ham bahri-dili ochilishi tabiiy.
Xalq deputatlari Amudaryo tuman Kengashi deputati Oybek Begimovga saylovchilar tomonidan bildirilgan murojaatlarga koʻra, Durunki mahallasining Ahmad Yassaviy koʻchasida tabiiy gaz va elektr energiyasi taʼminotidagi kamchiliklar bartaraf etildi. Deputat Oybek Begimov tegishli soha xodimlarini jalb qilgan holda bayram arafasida mahalla hududida bir qator xayrli ishlarni amalga oshirmoqda.
Maʼlum boʻlishicha, Ahmad Yassaviy koʻchasidagi aholini tabiiy gaz bilan taʼminlovchi quvurlarga fuqarolar tomonidan nostandart ravishda ulanishlar oqibatida ayrim nosozliklar yuzaga kelgan. Xususan, tayanch ustunlari belgilangan oraliqlarga oʻrnatilmaganligi va yetarli darajada taʼminlanmaganligi sababli tabiiy gaz quvurlarida osilib qolish holati kuzatilgan. “Amudaryotumangaz” gaz taʼminoti boʻlimi xodimlari tomonidan ushbu kamchiliklar joyida bartaraf etildi.
Bundan tashqari, aholi xavfsizligini taʼminlash, favqulodda holatlarning oldini olish maqsadida tuman Elektr tarmoqlari korxonasi xodimlari tomonidan elektr ustunlari, elektr uzatuvchi simlar holati tekshirildi. Albatta, xonadonlarga, ijtimoiy obʼektlarga elektr energiyasini uzluksiz yetkazish, aholi xavfsizligini taʼminlash soha xodimlarining asosiy vazifalaridan hisoblanadi.
Obodonlashtirish tadbirlari davomida Durunki mahallasidan oʻtuvchi asosiy yoʻllarda taʼmirlash ishlari ham olib borildi. Xususan, yoʻlning taʼmirtalab qismiga asfalt qoplamalari yotqizildi. Aholi turmush darajasini yaxshilash va xalqni rozi qilish maqsadida olib borilayotgan ezgu tashabbuslar natijasida mahalla va koʻchalar qiyofasi tobora yaxshilanib, fuqarolar va transport vositalari harakati uchun yanada qulaylik yaratildi.
Darhaqiqat, atrof-muhitni obod etish xalqimizning betakror qadriyatlaridan biri hisoblanadi. Bu kabi tadbirlar chor-atrofni yanada obod, pokiza boʻlishida alohida ahamiyat kasb etishi bilan birga, odamlarda yakdillik, oʻzgalarga koʻmak qoʻlini uzatish, hamjihatlik, ahillik kabi fazilatlarning yanada kuchayishiga xizmat qiladi.
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
