YaShIL MAYDONLARNI SAQLASh VA KOʻPAYTIRISh – DOLZARB VAZIFA
Atrof-muhitga ekologiyaning salbiy taʼsirini kamaytirishda oʻsimlik qoplami – chor-atrofimizning koʻkalamzorlashtirilishi, yaʼni "yashil” himoya qatlami muhim ahamiyatga ega.
Oʻsimliklar atmosferani chang va ifloslantiruvchi moddalardan tozalaydi, insonning maqbul yashash muhitini yaratadi va taʼminlaydi. Shaharlarda tabiiy hududlar – oʻrmon massivlari, suv havzalarini saqlash, oʻsimliklar bilan qoplangan maydonlarni koʻpaytirish muhim vazifa sanaladi.
Mustaqillik yillarida Oʻzbekistonda shahar va aholi punktlarining zamonaviy qiyofasini yaratish, arxitekturasini yaxshilash boʻyicha salmoqli ishlar amalga oshirildi. Bunda ushbu hududlarni koʻkalamzorlashtirishga alohida eʼtibor qaratilmoqda.
Shu nuqtai nazardan, yangi tahrirdagi "Oʻsimlik dunyosini muhofaza qilish va undan foydalanish toʻgʻrisida”gi qonun loyihasini ishlab chiqish lozimligini davr taqozo etmoqda. Amaldagi qonun ayrim muammolarni yuzaga keltirayotgan bir qator kamchiliklarga ega. Masalan, undagi "oʻsimlik dunyosi obʼektlari” tushunchasining talqini oʻsimliklarning xilma-xil turlarini asrash nuqtai nazaridan ularning biologik xususiyatlarini toʻliq qamrab olmagan. Botanika, dendrologiya bogʻlari va boshqa oʻsimlik dunyosi obʼektlarini muhofaza qilish va ulardan foydalanishni tartibga soluvchi normalar mustahkamlanmagan. Yangi tahrirdagi qonunning qabul qilinishi va amalga oshirilishi atrof-muhitni muhofaza qilish va tabiiy resurslardan oqilona foydalanish tizimini takomillashtirishga, tabiiy oʻsimliklar va ularning oʻsish muhitini, yovvoyi holda oʻsuvchi va manzarali daraxtlar majmualarini saqlashga, oʻrmon fondi yerlaridan tashqaridagi oʻsimlik dunyosi obʼektlaridan oqilona va barqaror foydalanishni taʼminlashga, milliy qonunchilikka xalqaro normativ-huquqiy hujjatlar, shuningdek shartnoma va konventsiyalarning oʻsimlik dunyosini muhofaza qilish va undan foydalanish sohasida xalqaro amaliyotda keng qoʻllanilayotgan normalarini implementatsiya qilinishiga, huquqni qoʻllash amaliyoti samaradorligini oshirishga, huquq-tartibotni taʼminlashga hamda oʻsimlik dunyosini muhofaza qilish, undan foydalanish va takror yetishtirish sohasidagi huquqbuzarliklar uchun yuridik va jismoniy shaxslarning javobgarligini kuchaytirishga xizmat qiladi.
Mamlakatimiz hududlarida tabiiy-iqlim sharoitlarning turli tumanligi va oʻzgaruvchanligi arxitektura obʼektlarini loyihalash va amalga oshirishda shahar muhitining mikroklimatik rejimini tahlil qilishni taqozo etadi. Arxitektorlarning vazifasi hududning mahalliy iqlim sharoitlariga passiv holda moslashish emas, balki atrof muhitning tabiiy sharoitlaridagi mavjud kamchiliklarni bartaraf etuvchi samarali tadbirlarni ishlab chiqishdan iboratdir.
Shahar va qishloqlardagi yashil maydonlarning saqlanishi va koʻpaytirilishi shovqin va issiqlik taʼsiri darajasini pasaytirishni, mikroiqlimni yaxshilashni taʼminlaydi, insonlarning faol dam olishi uchun imkoniyatlarni yaratishga ham xizmat qiladi.
Mamlakatimizda tabiiy oʻsimlik dunyosini saqlash uchun amalga oshirilayotgan chora-tadbirlarni ushbu jarayonlarga fuqarolik jamiyatini keng jalb qilgan holda izchil roʻyobga chiqarish har bir fuqaroning maqbul atrof-muhitga boʻlgan huquqi printsipini mustahkamlashga hamda tabiiy resurslardan kelgusi avlodlarga ziyon yetkazmagan holda oqilona foydalanishga qaratilgandir.
Jumanazar ATOJONOV,
Zafar XANIYaZOV,
Oʻzbekiston Respublikasi Oliy Majlisi Qonunchilik palatasi deputatlari.
(Foto - http://sensorika.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
