HAMIShA NAVQIRON BAYRAM

Kelib chiqishi sharq xalqlarining olis oʻtmishiga borib taqaluvchi, qariyb toʻrt ming yildan ortiq vaqtdan beri zamonlar silsilasidan omon oʻtib, haqiqiy  milliy bayramimizga  aylangan Navroʻzi olam ayyomining  qadr-qimmati istiqlol yillarida ayniqsa yuksaldi. Oʻzligimizga, oʻz yurtimizga oʻzimiz egalik qilish imkonini bergan mustaqillik tufayli ajdodlarimiz aql-u zakosi ila yaratilgan jamiki maʼnaviy boyliklar, urf-odatlar, anʼanalar, qadriyatlar hayotimizga yana qaytdi, yil sayin yangi-yangi maʼno, mazmun bilan boyimoqda, turmushimizdan tobora teran joy olmoqda.

Muhtaram Yurtboshimizning Farmoniga binoan umumxalq bayrami – dam olish  kuni, deya eʼlon qilingan 21-mart – Navroʻz bayrami oʻlmas qadriyatlarimizni, urf-odatlarimizni oʻzida mujassam etgani bilan ham koʻnglimizga yaqin va qadrlidir.

Ha, bayram kunlarida xalqimizning haqiqiy oʻzbekona bagʻrikenglik, saxiylik, hamjihatlik kabi ezgu fazilatlari yanada yorqinroq namoyon boʻladi, koʻngillar koʻngillarga payvand boʻladi.

Butun mamlakatimizda boʻlgani kabi Navroʻz bayrami tantanalari necha kundirki tumanimizning ovul, mahallalarida, mehnat jamoalarida, oʻquv muassasalarida oʻziga xos tarzda shod-u xurramlikda nishonlanmoqda. Elimiz intiq kutgan bahorini, Navroʻzini ezgu niyatlar bilan qarshilab, tantana qilmoqda.

19-mart kuni Mangʻit shahridagi Markaziy oʻyingohda nishonlangan "Assalom, Navroʻz!” deya nomlangan teatrlashtirilgan bayram tomoshasiga tashrif buyurgan yurtdoshlarimiz koʻnglidagi yuksak koʻtarinki kayfiyat hatto beqaror, oʻzgaruvchan bahor havosiga ham oʻz taʼsirini oʻtkazganday, quyosh saxiylik bilan nur sochdi. Navroʻz bayramiga xos qulf urib ochilgan gullar, novdalar, yashillik, bahoriy bezaklar bilan oro berilgan oʻyingoh tashqarisida tumanimizdagi ovul, mahallalarda faoliyat yuritayotgan fermer xoʻjaliklarida oʻtgan yilda yetishtirilgan meva, poliz mahsulotlari, sabzavotlarning, shuningdek pazanda ayollar tayyorlagan bahoriy taomlar, pishiriqlar koʻrgazmalari namoyish etildi. Tumanimiz rahbariyati va tantanaga tashrif buyurgan aziz mehmonlar koʻrgazmalarni, usta hunarmandlarimiz mehnati mahsuli namoyishini zavq bilan tomosha qilib, yuqori baho berdilar.

Tantana boshlanishiga bagʻishlangan joʻshqin musiqani barcha olqishlar bilan qarshi oldi.

Tantana tuman hokimining birinchi oʻrinbosari B.Ernazarovning tuman hokimi, Qoraqalpogʻiston Respublikasi Joʻqorgʻi Kengesi deputati Rajabboy Yoʻldoshevning tumanimiz xalqiga yoʻllagan bayram tabrigini oʻqib eshittirishi bilan boshlandi. Yigʻilganlar tabrikni koʻngillarida ulkan hayajon va quvonch bilan tingladilar, tumanimiz rahbariga mustahkam sogʻlik, tolmas kuch-quvvat tiladilar.

Navroʻz bayramiga bagʻishlab tuman Madaniyat va sport ishlari boʻlimi tomonidan tayyorlangan "Assalom, Navroʻz!”, deb nomlangan ulkan teatrlashtirilgan tomosha boshlandi.

Sogʻ-omonlikda, tinchlik-xotirjamlikda, qoʻmsab, sogʻinib yetganimiz – koʻklamni, qadimiy va hamisha navqiron milliy Navroʻz ayyomini, ona Vatanni, tinchlik, osoyishtalikni tarannum etgan kuy, qoʻshiq, aytishuvlar, raqslar, ramziy Bahoroyning, Dehqonboboning tashrifi barchaga zavq bagʻishladi, koʻngillarda mehr-oqibat, doʻstlik, birodarlik bilan umrguzaronlik qilayotganimiz – shu muqaddas zaminimizga, yurtimizga mehr-muhabbat kabi eng ezgu tuygʻular joʻsh urdi.

Tantana sport musobaqalari, kurash, qoʻchqor urishtirish kabi milliy koʻngilochar oʻyinlar bilan uzoq davom etdi.

Navroʻz bayramiga bagʻishlangan tantanada Qoraqalpogʻiston Respublikasi Vazirlar Kengashi raisi B.Yangiboyev ishtirok etdi.

Oygul RAJABOVA.