BIZ YoShLAR – AQIDAPARAST OQIMLARGA QARShIMIZ

Xalqimizning tabiatiga mutlaqo yot boʻlgan diniy ekstremizm, aqidaparastlik  va boshqa yovuz oqimlarning mintaqamizga  kirib kelishi va tarqalishi tinchlik va osoyishtalikka, yoshlarimizning kelajagiga katta xavf tugʻdirishini  odamlar ongiga chuqur singdirib borish – har bir ongli va qalbi uygʻoq insonning zimmasidagi yuksak masʼuliyatdir.

Din kishilarni hamisha yaxshilikka, ezgu ishlarga chorlagan. Jumladan, ota-bobolarimiz muqaddas bilib eʼtiqod qoʻygan islom dini ham yuksak insoniy fazilatlarning shakllanishiga xizmat qiladi. U tufayli xalqimiz ming yillar mobaynida boy islomiy maʼnaviyati va merosi, oʻzligini omon saqlab keldi.

Shu nuqtai nazardan qaraganda, odamlarning eʼtiqodi va diniy hissiyotlaridan foydalanib, ekstremistlar va terrorchilar tomonidan islom bayrogʻi ostida sodir etilayotgan jinoyatlar ularning asl qiyofasini namoyon etmoqda, deyish mumkin. Ayni paytda, bunday jarayonlar kishilarni doimiy ogoh boʻlishga, haqiqiy diniy qadriyatlarni ularning soxta va gʻarazli  talqinlaridan farqlashga  yordam beradigan  bilimlarni egallashga undaydi.

Terrorizm – jamiyatda beqarorlik keltirib chiqarish, aholining keng qatlamlarida vahima va qoʻrquv uygʻotishga qaratilgan siyosiy kurashning oʻziga xos usulidir. U yashirin ruhdagi tashkilotlar tomonidan beqarorlik keltirib chiqarish orqali davlat hokimiyatini egallash maqsadida qoʻllaniladi. Terrorchi uyushmalar  ommaviy boʻla olmagani uchun ham koʻp hollarda aholining keng qatlamlari nomidan harakat qilish taassurotini uygʻotish maqsadida diniy shiorlardan niqob sifatida foydalanadilar.

Terrorizmning eng asosiy xususiyatlaridan biri bunday harakat tarafdorlarining "zoʻrlik davlatni qulatuvchi va hokimiyatga erishishni osonlashturuvchi parokandalikka olib keladi”, degan gʻoyaga asoslanib harakat qilishlarida yaqqol koʻrinadi. Terrorizmning yana bir xususiyati hech qanday urush boʻlmayotgan, tinchlik hukmronlik qilayotgan, jamiyatda demokratik institutlar faoliyat koʻrsatayotgan bir sharoitda muqobil usullarni atayin inkor etgan holda, siyosiy masalalarni zoʻrlik yoʻli bilan hal qilishga intilishida koʻrinadi.

Mintaqamizda diniy ekstremizm va terrorizmning namoyon boʻlishining oʻziga xos xususiyatlari, yoshlar va xotin-qizlarning bunday kuchlarning asosiy nishoniga aylanishi  sabablari, gʻaraz maqsadlarda buzib talqin qilinayotgan "halifalik”, "shahidlik” kabi islomiy tushunchalarning asl mazmunini anglash, jaholatga qarshi maʼrifat bilan kurashish bugungi davr talabidir.                        

 Demak, biz yoshlar doimo ogoh boʻlishimiz va bunday yot gʻoyalarga aldanib qolmasligimiz kerak. Buning uchun yaxshi oʻqishimiz va har kimga ishonmasligimiz, ota-onamizning yuzini yorugʻ qiladigan komil inson boʻlishimiz lozim.

Paygʻambarimizning hadislaridan birida: "ikki neʼmat borki, koʻpchilik odamlar ularning qadriga yetmaydilar. Ular sihat-salomatlik  va tinchlikdir” deyilgan.

Shunday tinch yurtda yashayotganimizdan, shu yurtda oʻsib, ulgʻayayotganimizdan,  shu yurtning farzandi boʻlganimizdan xursand boʻlishimiz kerak. Oʻzbekiston mustaqillikka erishgandan keyin qanchadan qancha inshootlar, koʻplab kasb-hunar kollejlari, maktab va boshqa oʻquv oʻrinlari qurib bitkazildi. Ayniqsa, Yurtboshimizning biz yoshlar uchun jon kuydirib qilayotgan fidoyiliklariga javoban vatanparvar va xalqparvar, mard insonlar boʻlib voyaga yetishimiz zarur. Bu – biz yoshlarning xalq va Vatan oldidagi eng sharafli farzandlik burchimizdir.

Olimjon MURODOV, 

Muhammad ibn Ahmad al-Beruniy nomli oʻrta maxsus islom bilim yurti  2-kurs talabasi. 

(Foto - http://slayd.arxiv.uz)