DIYDOR ShIRIN

"Jayxun ilhomlari” NNT aʼzosi sifatida "Taraqqiyot koʻzgusi” gazetasi tahririyatida tez-tez boʻlib turaman. Har safar tumanimiz ijod ahlining homiysi boʻlgan qutlugʻ dargohga kelganimda bu yerda ijod qilayotgan insonlar bilan diydorlashishdan koʻnglimda ajib shodlik, mehr uygʻonadi. Ijodiy xodimlar bilan uchrashish, diydorlashish, ijod haqida beminnat maslahatlarini olishga har doim oshiqib turishimning boisi ham shunda.

Ijodkorlarning bilim saviyasini oshirish, fikr doirasini kengaytirish maqsadida bu yerda keng koʻlamli ishlar olib borilmoqda. NNT raisi, ustozimiz Ahmad aka Nafasov boshchiligida tumanimizdagi taʼlim maskanlarida adabiy-badiiy tadbirlar, ijodkor yoshlar bilan tez-tez uchrashuvlar, mushoiralar oʻtkazilmoqda, koʻrik-tanlovlar uyushtirilib, ularning badiiy ijod, tasviriy sanʼat yoʻnalishidagi ijod mahsullari tumanimiz gazetasi sahifalarida muntazam yoritilmoqda. Tashkilot huzuridagi kutubxona esa bugungi kunda tumanimiz yoshlarining haqiqiy maʼnaviyat maskaniga aylangan.

NNT kutubxonasi jamgʻarmasidagi 2 mingdan ortiq kitoblar orasida yoshlar hayotiga oid eng sara asarlar, ayniqsa, tarixiy mavzudagi adabiyotlar oʻrin olgan. Kutubxonada kitoblar javonidan oʻrin olgan bolalar adabiyoti durdonalarini koʻrib, koʻzingiz quvnaydi.

- Kutubxonamiz aʼzolari asosan yoshlar, - deydi NNT raisi Ahmad aka Nafasov. – Lekin yoshi ulugʻ kitobxonlarimiz ham anchagina. – Yoshlar bilan bab-baravar kitob oʻqiyotgan kitobxonlarimizdan Ismoil Yusupov, Ibrohim Ismoilov, Tursunboy Abdullayev, Norimbat Tojiboyev, faxriy jurnalist Saʼdulla Xoʻjaniyozovlar kutubxonamizning eng faol aʼzolari.

Tumanimiz maʼnaviy-maʼrifiy hayotida oʻz oʻrniga ega bu ustozlarning biri umrining 35-40-yilini yosh avlod taʼlim-tarbiyasiga bagʻishlagan boʻlsalar, ustoz Saʼdulla aka Xoʻjaniyozov butun umr oʻz ijodiy faoliyati davomida yosh ijodkorlarga gʻamxoʻrlik qilib kelmoqda.

- "Jayxun ilhomlari”  NNT ning tashkil etilishi nafaqat yoshlar, balki biz keksalar uchun ham ayni muddao boʻldi, - deydi Ismoil aka Yusupov – kitobxonlik bahonasida tez-tez bir-birimiz bilan diydorlashib turibmiz.

- Toʻgʻri aytasiz, - suhbatimizga qoʻshildi Norimbat aka Tojiboyev, - diydor shirin. Bir-birimiz bilan boʻladigan samimiy  suhbatlar undan-da shirin.

- Ana shu suhbatlar asnosida kutubxonaga tashrif buyurayotgan yosh kitobxonlar, ijodkor yoshlar bilan tanishib, ularning ijod mahsullaridan ham bahramand boʻlmoqdamiz, - quvonchini yashira olmaydi ustozimiz Saʼdulla aka Xoʻjaniyozov.

Haqiqatan ham qisqa vaqt ichida "Jayxun ilhomlari” NNT tumanimiz axlining, ayniqsa, yosh ijodkorlarning sevimli dargohiga aylandi. NNT ofisiga haftaning qaysi kunida kelmang, hamisha qandaydir tadbirning guvohi va ishtirokchisiga aylanasiz. "Kitob sayillari”, "Kitobxonlik – maʼnaviyat kaliti” tadbirlari, davra suhbatlaridan tashqari, oʻquv maskanlari, ovul va mahallalalarda oʻtkazilayotgan "Maʼnaviyat kunlari”, "Sanʼat gʻunchalari” kontsert dasturlarida yuzlab yoshlar ishtirok etishmoqda. Bunday samimiyat, oʻzaro mehr-oqibat, millatlararo totuvlik ufurib turgan uchrashuv kechalarida bir-birlari bilan diydorlashayotgan ijodkor yoshlar qalbida milliy maʼnaviyatimizga daxldorlik, ona Vatanga, istiqlol gʻoyalariga sadoqat tuygʻulari joʻsh urmoqda. Bu joʻshqinlik ularni yanada sermahsul ijod sari undashi tabiiy. Chunki bunda ijod ahliga va demakki, ularning koʻngil mulkiga eʼtibor va ragʻbat bor. Koʻngil esa hamisha eʼtiborga, iliq mehrga tashna. Bu tashnalik davosi samimiyat va diydordir. "Jayxun ilhomlari” NNT oʻz tadbirlari bilan qalblarga ana shunday iliq mehr va samimiy diydor quvonchini ato etadi.