MUALLIMA OPANING BAXTI
Inson umri qilgan ezgu ishlari bilan oʻlchanadi. Uning shu yaxshi amallari odamlar xotirasiga muhrlanib qoladi.
Yoshlarning sevimli ustozi Zulfiya opa Poshshiyevaning bu yil mehnat faoliyatini boshlaganiga 35 yil toʻladi. Bu yillar davomida Zulfiya opa qanchadan-qancha yoshlarga saboq berib, hayotga yoʻlladi. Xushmuomala va kamtar ayol Zulfiya opa tumanimizdagi "Boʻz yop” ovulida, ziyoli oilasida dunyoga keldi. Uning otasi Farhod aka umr boʻyi boshlangʻich sinflarga dars berib kelgan. Zulfiya opa ham ilk saboqni oʻz otasidan olgan. Shu sabablimi, Zulfiya opa kelajakda otasi kabi oʻqituvchi boʻlishni orzu qilib, oʻrta maktab tahsilidan soʻng, 1980-yilda Nukus Davlat Universitetining biologiya fakultetiga oʻqishga kirdi. Universitetni muvaffaqiyatli tugatib, oʻzi tahsil olgan 49-sonli maktabda ilk oʻqituvchilik faoliyatini boshlangʻich sinf oʻqituvchisi boʻlib ishlashdan boshladi.
Zulfiya opa oʻz mehnati samarasini shogirdlari kamolida koʻrib, quvonadi. Sevimli oʻquvchisi Ikrom Tojiboyev Toshkent Davlat Milliy Universitetining fizika-astronomiya fakultetini tugatib, hozirda shu bilim dargohida obroʻ-eʼtiborli oʻqituvchi, oʻz sohasi boʻyicha doktorlik dissertatsiyasini yoqlash arafasida. Yana bir shogirdi Hayitboy Ortiqov ham Mirzo Ulugʻbek nomidagi Oʻzbekiston Milliy Universitetining tuproqshunoslik, agroximiya fakultetiga oʻqishga kirib, uning magistratura boʻlimini tugatdi va Chexiya Agrar Universitetining granti sohibi boʻldi. Bir yil-u ikki oy davomida Praga shahrida tahsil olib keldi. Zulfiya opaning bu oʻquvchisi hozirgi vaqtda Oʻzbekiston Milliy Universitetida oʻqituvchi boʻlib faoliyat yuritmoqda. Ustozning yana bir shogirdi Gʻayrat Tojiboyev Toshkent Davlat tibbiyot oliygohini tamomlab, tuman tibbiyot birlashmasida, xalq salomatligi yoʻlida fidoyilik bilan mehnat qilmoqda.
- Oʻquvchilarimning yutugʻi – mening ham yutugʻim, - deydi ustoz mamnuniyat bilan. – Mening bergan sabogʻimdan ozgina boʻlsa-da, koʻngillari nurlansa, ana shu nur ila jamiyatga aralashib, singib yashashsa, demak, mehnatim besamar ketmabdi, deb quvonaman.
Hayit va bayramlarda Zulfiya opa Poshshiyevaning xonadonidan mehmonlarning qadami uzilmaydi. Uzoq-yaqindan opani qutlagani shogirdlari kelishadi. Opaning quchogʻi gullarga, qalbi esa quvonchga toʻlib ketadi. Oddiy muallimaning baxti ham, obroʻ-martabasi ham shunda, shogirdlari kamolida!
Ullijon KAZAKOVA,
49-sonli maktab oʻqituvchisi.
(Foto - http://uzssgzt.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
