IBRAT SABOQLARIGA AYLANGAN “XOTIRA DARSLARI”

"Inson – aziz, xotirasi - muqaddas”, - derdilar doim Oʻzbekistonning birinchi Prezidenti, barchamiz uchun qadrli, xalqparvar, vatanparvar inson Islom Abdugʻaniyevich Karimov.

Butun hayotini el-yurt obodligi, xalq farovonligi va osoyishtaligi, millatlararo totuvlik va tinchlikni taʼminlash ishiga bagʻishlagan Oʻzbekiston Respublikasining birinchi Prezidenti Islom Karimov haqiqatan ham aziz xalqini, har bir Oʻzbekiston fuqarosini qadrlab, ulugʻ ajdodlar xotirasiga dilidagi cheksiz hurmat va ehtiromini amaliy ishlari bilan ifoda etib yashadilar.

Mamlakatimizning barcha oʻquv muassasalarida 4-sentyabr kuni boʻlib oʻtgan Oʻzbekiston Respublikasining birinchi Prezidenti xotirasiga bagʻishlangan "Xotira darslari”da Islom Abdugʻaniyevich Karimovning Oʻzbekiston xalqiga nechogʻlik buyuk ehtiromlar koʻrsatgani, pirovardida oʻzbek xalqini kelajagi porloq, eng ulugʻ va eng aziz yoʻlga olib chiqqani, bu yoʻlda qilgan sabr-matonati, mamlakat rahbari sifatidagi buyuk jasorati haqida hikoya qilindi.

Ulugʻ Yurtboshimizning ona Vatan ravnaqi, xalqimiz oldidagi buyuk xizmatlarini yodga olish maqsadida tashkil etilgan "Xotira darslari” tumanimizdagi akademik litsey, kasb-hunar kollejlari va barcha umumtaʼlim maktablarida ham boʻlib oʻtdi.

Oʻquvchilar I.Karimovning tarjimai holi bilan tanishtirilgach, Islom Karimovning Oʻzbekistonni mustaqil davlat  sifatida ravnaq toptirish, jahondagi rivojlangan davlatlar qatoriga olib chiqish yoʻlidagi fidoyiliklari, Oʻzbekiston mustaqilligining asoschisi, shu barobarida mamlakat mustaqil taraqqiyot dasturini ishlab chiqqan, milliy taraqqiyot yoʻlini belgilab bergan atoqli davlat  arbobi, mustaqillik yillarida mamlakatimizda amalga oshirilgan ulkan islohotlar, mislsiz oʻzgarishlarning tashabbuskori va rahnamosi sifatidagi xizmatlari haqidagi lavhalar namoyish etildi.

Ayniqsa, oʻquvchilarga "Xotira darslari”da xalqimizning oʻziga xos xususiyatlari hamda jahon tajribalarini oʻzida mujassamlashtirgan iqtisodiy islohotlarning  yangi modeli – iqtisodiyotning siyosatdan ustunligi, qonun ustuvorligi, oʻtish davrida davlatning oʻzi bosh islohotchi ekanligi, islohotlarni bosqichma-bosqich amalga oshirish va nihoyat kuchli ijtimoiy himoya kabi besh mashhur tamoyilni oʻz ichiga olgan jahonga mashhur taraqqiyotning "Oʻzbek modeli” xususida keng va mazmunli hikoya qilindi.

Oʻzbekiston Respublikasining hududiy yaxlitligi, sarhadlar daxlsizligini taʼminlashga qodir Qurolli Kuchlar, Chegara va Ichki qoʻshinlarni zamonaviy islohotlar asosida tashkil etish, maʼnaviy qadriyatlarga nisbatan yuksak eʼtibor va ehtirom bilan munosabatda boʻlish, xalqaro  maydonda Oʻzbekistonning obroʻ-eʼtiborini yuksaltirish, odamlarning ong va tafakkurini oʻzgartirish, ular ongida yangi milliy gʻoya, milliy mafkura asoslarini shakllantirish, millatlararo totuvlik, dinlararo va konfessiyalararo bagʻrikenglikni qaror toptirishdek oʻta ulkan va masʼuliyatli vazifani jasorat bilan uddalagani "Xotira darslari”ning mazmun-mohiyatiga singdirildi. Xususan, mazmun-mohiyatiga koʻra mutlaqo yangi taʼlim-tarbiya tizimi – Kadrlar tayyorlash milliy dasturining yaratilishi va uni amalga oshirishda Prezidentning oʻzi bosh-qosh boʻlgani haqida batafsil soʻz yuritildi.

- "Xotira darslari”da oʻquvchilar Oʻzbekistonning Birinchi Prezidentiga qalblarida katta hurmat va ehtirom bilan ishtirok etdilar, - deydi xalq deputatlari tuman Kengashi deputati, 40-sonli umumtaʼlim maktabi direktori Sanobar Xoʻjamurodova. – Ayniqsa, Prezidentimizning yoshlarga qarata: "Aziz farzandlarim, marrani baland olinglar, oʻqib-oʻrganish, kasb egallash, izlanishdan bir muddat ham toʻxtamang”, – degan murojaatini takrorlashib, kelajakda hayotda va oʻqishda Islom Karimov orzu qilganiday salohiyatli insonlar boʻlib yetishishga harakat qilishlarini izhor etdilar.

"Xotira darslari” tumanimizning barcha oʻquv maskanlarida beqiyos hurmat va ehtirom ila oʻtkazildi va yurtga fidoyilik, vatanparvarlik, matonat va jasorat, odamiylik timsoli sifatida yuksak maʼnaviyat hamda ibrat saboqlariga aylanib ketdi.

Robiya YOʻLDOShEVA,

jurnalist.

Suratda: 36-sonli umumtaʼlim maktabida "Xotira darsi”.