Qurbon hayiti muborak boʻlsin!

Istiqlol tufayli jannatmakon mamlakatimizda islom dini ravnaqi yoʻlida keng imkoniyatlar ochildi. Eʼtiqod erkinligi qonuniy ravishda kafolatlab qoʻyildi. Barcha milliy va diniy qadriyatlar tiklandi, masjid va madrasalarning binolari, nodir tarixiy manbalar, osori atiqalar musulmonlarga qaytarib berildi. Ularning emin-erkin ibodat qilishlari, diniy taʼlim  olishlari, diniy adabiyotlarni nashr etishlari va ommaviy axborot vositalaridan bahramand boʻlishlari uchun barcha sharoitlar yaratildi. Ramazon hayiti va Qurbon hayitlarining birinchi kunlari dam olish kunlari deb belgilanib, bayram sifatida nishonlanmoqda.

Hayit bayramlari qadimdan yurtimizda oʻzgacha, xalqimizga xos mehr-muruvvat, bagʻrikenglik va saxovat ifodasi boʻlib kelgan. 9-sentyabr kuni Prezidentimizning "Qurbon hayitini nishonlash toʻgʻrisida”gi Farmoni eʼlon qilindi. Bu davlatimiz tomonidan yurtimiz musulmonlariga koʻrsatilayotgan eʼtibor namunasidir.

Qurbonlik qilish – zakot, fitr sadaqasi kabi moliyaviy ibodat boʻlib, u  Qurʼoni karim, hadisi sharif bilan sobitdir. Qurbonlik qilish boshqa ibodatlar kabi Alloh uchun deyilsa-da, aslida foydani inson koʻradi. Qurbonlik qilingan hayvonning goʻshtidan soʻygan odamning oʻzi va faqir-fuqarolar manfaatdor boʻladi. Alloh taolo esa insonning qalbidagi niyatiga koʻra muomala qiladi. Haqiqatan, qurbonlikka soʻyilgan hayvonlarning goʻshtlariga ham, qonlariga ham Alloh muhtoj emas. Qurbonlik qilishdan maqsad bandaning Yaratuvchi amriga itoatini va taqvosini namoyon etishidir. Banda ixlos bilan qurbonlik qilib, Alloh yoʻlida jonlik soʻymoqdami, demak oʻsha bandaning Alloh taologa taqvosi bor ekan. Allohning rizoligi uchun borini qurbon qilishga tayyor ekan.

Qurbonlik qilish qonun-qoidalari va odoblari haqida koʻplab fiqh kitoblarida batafsil maʼlumotlar berilgan. Qurbonlik soʻyish hayit namozini oʻqib boʻlgach, boshlanadi. Shariatimiz koʻrsatmasiga binoan qurbonlik qilish zakot nisobiga qodir kishilargagina vojib, deb bayon qilingan (bu yilgi zakot nisobi 11.500.000 (oʻn bir million besh yuz ming soʻm deb belgilangan edi). Agar biror kimsa qurbonlik soʻyish vaqtigacha mazkur pul mablagʻiga ega boʻlsa, unga qurbonlik soʻyish vojib boʻladi. Qurbonlikning avvali hayit namozi ado etilganidan soʻng soʻyiladi. Uning oxirgi vaqti esa hayitning uchinchi kuni asr vaqtigacha.

Mana Qurbon hayiti ham kirib keldi. Odatda hayit kunida hamma bir-birini ulugʻ kun bilan samimiy muborakbod etadi. Hayit namozini ado etgandan soʻng birinchi oʻrinda bizlarning dunyoga kelishimizga sababchi boʻlgan ota-onalarimizni, ulardan keyin qarindosh-urugʻlarimizni, yoru-birodarlarimizni, bemorlarni borib ziyorat etamiz. Ularning koʻnglini soʻrash va koʻtarishga harakat qilamiz. Ayrim sabablar bilan oʻzaro arazlashgan kishilar ham bir-birlarini muborak bayram kunida kechirib, oʻzaro uzrlar aytib, bir-birlariga quchoq ochadilar. Bu kun barchaga quvonch ulashadigan kundir.

Qurbon hayitingiz qutlugʻ boʻlsin, azizlar!

Abdurahmon Matsapoyev, "Yusuf eshon bobo” jomeʼ masjidi imom-xatibi.

(Foto-http://static.norma.uz)