KELAJAKNI OLDINDAN KOʻRUVChI DAHO EDILAR
Men to nafaqaga chiqqunga qadar 40-sonli umumtaʼlim maktabida oʻquvchi-yoshlarga tarix fanidan dars berdim. Mening oʻqituvchilik faoliyatim mustaqillik yillarida yuksak qadrlandi. 2002-yilda, "Ustoz va murabbiylar kuni” – umumxalq bayrami arafasida Prezident Islom Karimovning Farmoniga koʻra "Shuhrat” medali bilan taqdirlandim. Mustaqillik nafaqat mening xizmatlarimni qadrladi, balki farzandlarim, oilam uchun keng imkoniyatlar eshigini ochib berdi. Toʻrt nafar farzandimning barchasi oliy maʼlumotli kadrlar boʻlib yetishishdi. Prezident Islom Karimov tashabbusi bilan tumanimizda bunyod etilgan namunali uylardan birining sohibasi boʻldim. Men avvalo ona, ayol, ustoz-murabbiy sifatida Yurtboshimiz tomonidan yaratib berilgan shart-sharoitlar va imtiyozlardan toʻla bahramand boʻldim, deb ayta olaman. Hayotimga, turmush tarzimga beqiyos oʻzgarishlar olib kirgan Prezident Islom Karimovning nomi bizning oilamiz uchun hamisha qadrli.
Men tarixchi, faxriy oʻqituvchi sifatida shuni ishonch bilan ayta olamanki, Islom Karimov kelajakni oldindan koʻra olgan va ana shu kelajak ufqlari sari intilib yashagan ulugʻ donishmand edilar. Bu ulugʻ zot mustaqillikning birinchi yilida nimaiki orzu qilgan boʻlsalar, barchasi ijobat boʻldi. U – Vatanda tinchlik, farovonlik, obodlik yaratmoqni istadi! Ming-ming shukur – bugun Oʻzbekiston hur, ozod, erkin, farovon va obod goʻshaga aylandi! U farzandlari sogʻlom, aqlli va dono yurtni orzu qildi va bugungi Oʻzbekiston yoshlari aynan Prezident orzusidagi barkamol avlod sifatida shakllandilar!
Ayolga sharqona ehtirom, keksalarga beqiyos izzat-ikrom koʻrsatish, ajdodlar dahosiga sodiqlik – Islom Karimov hayoti va faoliyatining uzviy qismi edi. Nazarimda, Oʻzbekistonning birinchi Prezidenti jamiki ezgu ishlari bilan oʻzi yaxshi koʻradigan aziz xalqi yuragiga singib ketdi. U hamisha, har kuni, har soat, har lahzada biz bilan, oʻzlari boshlab ketgan ezgu ishlar rivoji bilan yashayveradi.
Xushroʻy YeShChANOVA,
faxriy oʻqituvchi,
"Shuhrat” medali sohibasi.
(Foto - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
